Nasayaat ti amin

Nagpipinnateg dagiti nagkauna a kameng iti tunggal maysa kadakuada ania man dagiti nagtaudanda a mainaig iti gimong, ekonomia, wenno politika. Uray pay daytoy ti nangpabayag iti panagrang-ayda, mangigapu iti saan a pannakagin-awa, wenno bukod a panagsakripisio wenno panagbannog, nagtititinnulongda iti tunggal maysa.

Iti lubongtayo nga adda dagiti panggep a tun-oyen ken kapartido, ad-adda nga ipangpangruna dagiti panggep ti sangapartido wenno bukod ngem iti panagpipinnateg wenno panangpapigsa iti pagarian ti Dios. Iti gimongtayo ita, dagiti panangragpattayo kadagiti panggep a tun-oyen iti politika ket mabalin nga agparang a pangrukod iti kinapategtayo.

Ti panangituding ken panggun-od kadagiti panggep a tun-oyen ket mabalin a napintas a panggep. Ngem no umay ti balligi iti panangragpat kadagiti panggep a tun-oyen a pakaigapuan ti saan a panangibilang, saan a panangikankano, wenno panangpasakit kadagiti sabali, mabalin a nakapatpateg ti gatad dayta a balligi.

Inaywanan dagiti nagkauna a kameng dagiti kakaduada, ken kinitada pay dagiti simmaruno kadakuada, ket nagmulada para kadagiti lugan a simmurot.

Ammoda ti pigsa ti pamilia ken dagiti gagayyem. Ket gapu ta nagpannurayda iti tunggal maysa, nagbalinda a napigsa. Nagbalin a pamilia dagiti gagayyem.

Nagserbi dagiti nagkauna a kameng a kas nasayaat a palagip ti no apay a nasken a parmekentayo ti sulisog a mangibukod iti bagitayo, ngem ketdi, danunen tapno tulungan ti tunggal maysa ken maaddaan iti asi ken agiinnayat iti maysa ken maysa.

“Maykay’ Sasanto; awan pagbutnganyo.”

Nagbalin daytoy a binatog a kansion kadagiti nabannog nga agdaldaliasat. Narigat a panunoten no kasano ti karigat ti panagbannog dagitoy naindaklan a kararua. Pannagna ti maysa kadagiti kalakaan nga inaramidda. Nasken nga agtitinnulongda nga agbannog tapno makaipaayda iti taraon, makatarimaan kadagiti karison, makaaywanda kadagiti ayup, makapagserbida kadagiti masakit ken nakapuy, makasapul ken makapagsakdoda, masaluadanda dagiti bagbagida kadagiti dumteng a peggad ti tiempo ti panawen ken adu pay a makapeggad a banag iti let-ang.

Agriingda iti tunggal agsapa nga addaanda kadagiti nalawag a panggep ken tun-oyen a maawatan ti amin: tapno agserbi iti Dios ken kadagiti padada a tao ken makasangpet iti Salt Lake Valley. Inaldaw a nalawag kadakuada dagita a panggep ken tun-oyen; ammoda no ania ti masapul nga aramidenda ken napateg ti panagdur-as ti tunggal aldaw.

Iti panawentayo—a nalaka unay a ragpatentayo ti kaaduan ti tartarigagayantayo—makasulisog ti agsikko wenno sumuko no kasla narusanger wenno nasang-at wenno nateppang ti kalsada a pagnaan iti sanguanantayo. Kadagita a kanito, mabalin a maparegtatayo a mangpanunot maipapan kadagiti lallaki, babbai, ken annak a saan a nangpalubos iti sakit, rigat, saem, ken uray pay patay tapno manglapped kadakuada iti pinilida a dalan.

Naadal dagiti nagkauna a kameng a ti panagaramid kadagiti narigat a banag ket nangpauneg ken nagpapigsa iti bagi, panunot, ken espirituda; nangpalawa iti pannakaawatda maipapan iti nadiosan a kababalin; ken nangpadakkel iti kinaasida kadagiti dadduma. Daytoy nga ugali ti nangpatibker kadagiti kararuada ken nagbalin a parabur kadakuada iti napaut kalpasan ti gibus ti panagbaniagada kadagiti kapatagan ken kabambantayan.

Idi nagkanta dagiti nagkauna a kameng, nangipeksada iti maikatlo nga adalen: “Yisemyo ti rigat.”

Daytoy ti maysa kadagiti naindaklan nga ironia [kayatna a sawen a sao a kasupadina ngem pudno] ti panawentayo a nakaparaburantayo iti nawadwad ngem mabalin a nalidaytayo. Dagiti datdatlag ti kinarag-ay ken teknolohia ti mangparag-o kadatayo ken mangtedda kadatayo iti seguridad, ragragsak, apagkanito a pannakapnek, ken nam-ay, ngem iti baet ti amin dagitoy mariknatayo ti nalaus unay a panagliday.

Dagiti nagkauna a kameng, a nalaus ti panagsakripisioda, nagnada nga awanan a pulos ken nabisinanda uray koma la dagiti kangrunaan a kasapulan tapno agbiagda. Naawatanda a saan a dumteng ti ragsak kas bunga ti gasat wenno pasamak a di namnamaen. Awan duadua a saan a dumteng daytoy manipud iti kaadda ti amin a tarigagay a pimmudno. Saan a sumangbay ti ragsak manipud kadagiti pasamak iti ruar. Sumangbay daytoy manipud iti uneg—ania man ti mapaspasamak iti aglawlawtayo.

Ammo dagiti nagkauna a kameng dayta, ken addaan iti dayta nga espiritu nasarakanda ti ragsak iti tunggal pasamak ken tunggal pannubok—uray kadagita a pannubok a nangaring kadagiti kaunggan a paset dagiti kararuada.

No dadduma malaglagiptayo maipapan iti panagibtur dagiti nagkauna a kameng ken sigigin-awa nga isaotayo, “Agyamanak ta diak pay nagbiag iti dayta a panawen.” Ngem ania ngata no dagita a natured a nagkauna a kameng no makitadatayo koma ita, ket saanda kadi a mayebkas ti isu met la a pakaseknan.

Nupay nagbalbaliwen dagiti panawen ken pasamak, saan a nagbalbaliw dagiti pagbatayan para iti panangsango kadagiti pannubok ken naballigian a panagbiag a sangkamaysa kas managpipinnateg ken rumangrang-ay a komunidad iti Dios.

Manipud kadagiti nagkauna a kameng masursurotayo ti maaddaan iti pammati ken panagtalek iti Dios. Masursurotayo ti maaddaan iti panangngaasi kadagiti dadduma. Masursurotayo a ti aramid ken kinagaget ti mangparabur kadatayo saan laeng a temporal no di ketdi pay espiritual. Masursurotayo a sidadaan a gun-odentayo ti ragsak ania man dagiti kasasaadtayo.

Ti kapintasan a wagas a makapagdayaw wenno maipakitatayo ti panagyaman kadagiti nagkauna a kameng ket ti panangusartayo iti bukodtayo a biag dagiti kinapudno kadagiti bilin ti Dios, panangngaasi ken panagayattayo kadagiti padatayo a tao, ken ti kinagaget, panangnamnama iti nasayaat, ken ragsak dagiti nagkauna a kameng nga impakitada a naimbag iti bukodda a panagbiag.

No aramidentayo daytoy, madanontayo iti panaglabas dagiti dekada ti panawen, a mangkibin kadagita a natakneng a nagkauna a kameng, ket inayontayo dagiti bukodtayo a timek iti timekda bayat ti panakipagkantatayo kadakuada iti: “Nas’yaat! Nas’yaat!”