Aolep Men Renaaj Em̧m̧an

Paineer ro rekar kea kōn doon ilo aer jab lukkuun leļo̧k aer n̄an iiaio ko, wāween ko rejelet jeram̧m̧an an juon laļ, ak iktōltōl ilo kareleel ko an kien. Mekarta jet iien ej karum̧wij aer eddōkļo̧k, jelet er ilo wāween ko rejjab em̧m̧an, ak kijejeto ilo aer wujlepļo̧k im en̄taan in jerbal, rekar jipan̄ doon.

Ilo kōttōbar eo ad im ad rie im jipan̄ doon ilaļ in, kajjojo ak jibadbad ko an aolep remaron̄ bōk wāween eo ej ņamejļan kōjparok doon ak kōkajoorļo̧k aelōn̄ in kiin̄ eo an Anij. Ilo jukjukinpād eo rainin, tōpar jet kōttōbar ko rem̧m̧an remaron̄ waļo̧k āinwōt juon jon̄ak in ad aorōk.

Kōm̧m̧an im kōttōbraki kōttōbar ko emaron̄ in juon men em̧m̧an. Ak n̄e tōprak eo ilo tōpar kōttōbar ko jej būki jān kowaan, ak kōmetak ro jet, wōnāān tōprak in emaron̄ bōlen elukkuun ļap an em̧m̧an.

Paineer ro rekar oņaake ro otemjej ilo kom̧pani eo aer, ak rekar barāinwōt ļōmņak kōn ro rekar itok ālkier, rekar ekkat jikin kallib ko n̄an waikōn ko rekar ekkatak im renaaj ļoor er.

Rekar jeļā kajoor eo an baam̧le ko im ro m̧ōttāer. Im kōnke rekar pedped wōt ioon doon, rekar erom kajoor. Ro m̧ōttāer rekar erom baam̧le.

Paineer ro rej jerbal āinwōt juon kakeememej eo em̧m̧an kōn etke jej aikuj jekadļo̧k jān kapo ko im kōm̧akeļo̧k make kōj im, barāinwōt, pukōtļo̧k n̄an jipan̄ ro jet im tiriam̧o̧ kake er im iakwe doon.

“Jen jab jan̄ ak ļōmņak bwe men kein renaaj pen.”

Naan in ekar erom juon al eaorōk n̄an rito itak ro remōk. Elukkuun pen n̄an kōļmenļo̧kjeņ kake wāween an kar pen an jetōb kein reļļap kar jerbal. Etetal ekar juon iaan men ko repidodo rekar kōm̧m̧ane. Er aolep raar aikuj in koba ippān doon n̄an ekkwaļo̧k m̧ōn̄ā, kōkm̧anm̧anļo̧k wakōn ko, kōjparok menin mour ko, kōjeram̧m̧an rinan̄inmej ro im rimōjņo̧, kappok im etteen̄tok dān, im bōbrae er jān kauwōtata ko reidin̄ rewaļo̧k im mejatoto ko rekauwōtata ko rewaļo̧k iānejam̧dān.

Rej jerkak kajjojo jibbon̄ kōn kōttōbar ko ralikkar im jibadbad ko bwe aolep remeļeļe: n̄an jerbal n̄an Anij im n̄an armej ro doer im n̄an tōparļo̧k ilo Salt Lake Valley. Aolep raan jibadbad kein im kōttōbar ko rekar alikkar n̄an er; rekar jeļā ta ko rekar menin aikuj n̄an kōm̧m̧ani im bwe kajjojo raan in eddōkļo̧k ekar aorōk.

Ilo tōre in ad—n̄e etar jān jon̄an ta eo jekōņaan innām epidodo n̄an kōj n̄an tōpare—ekapopo n̄an oktak ak leļo̧k kōj make jabdewōt iien n̄an kōkkaj eo epād im̧aad ekkajkaj ak jab kōjparok n̄an jutak jon̄an wōt ad maron̄ im̧aad. Ilo iien kein, emaron̄ karreiļo̧k kōj n̄an ad kejōkļo̧kjeņ kōn em̧m̧aan rein, kōrā rein, im ajri rein ro ren kar jab aikuj nan̄inmej, apan̄, metak, im aaet kar mej jān iaļ in rekar kālet e.

Paineer ro rekar katak bwe jān aer kōm̧m̧ani men ko reppen rej kakijn̄en̄eikļo̧k im kōkajoorļo̧k ānbwin, ļōmņak, im jetōb; kōļapļo̧k aer meļeļe kōn mour kwojarjar eo aer; im lelōn̄ļo̧k aer tiriam̧o̧ n̄an ro jet. Imminene in ekar kapen jetōb ko aer im ekar juon kōjeram̧m̧an n̄an er ālkin juon iien eaitok in aer kijoone iaļen ito itak eo aer ilo toļ jiddik ko im ilo kar jemļo̧kin toļ ko.

Ke paineer ro rekar al, rekar al eoon jilu: “Wōnm̧aanļo̧k ippān m̧ōņōņō.”

Ekar juon iaan men ko ejeja an waļo̧k ilo iiō kein ad bwe jekar lukkuun in jeram̧m̧an im kiiō jejjab maron̄ būrom̧ōj. Kabwilōn̄lōn̄ ko an ro ineer im kein jerbal ko raan kein rekōm̧m̧an an ļo̧kjān ad im letok n̄an kōj kōjparok, kalimomo, kam̧m̧oolol, im wāween ko rekkar. Im kiiō men otemjej ipeļaakid jej loi eļap aer kabūrom̧ōjm̧ōj.

Paineer ro, ro rekar wūjlepļo̧k ijo eļap, rekar deblo̧k ilo ejjeļo̧k jabdewōt im kar kwōle kōn men dikdik ko remenin aikuj n̄an mour. Rekar meļeļe bwe m̧ōņōņō in ejjab itok āinwōt juon waļo̧k jān jide ak jidilo̧k. Menin ejjab itok enan̄in aolepān jān an kōņaan ko ad aolep itok im kūrm̧ool. M̧ōņōņō ejjab itok jān jekjek ko jān likin. Ej itok jān jekjek ko itulowaa—mekarta ta eo ej waļo̧k ipeļaakid.

Paineer ro rekar jeļā menin, im ippān jetōb in rekar loe m̧ōņōņō ilo aolep jekjek im ilo aolep mālijjon̄—aaet ilo jabdewōt kapo ko me repād ijoko ilo ilaļ eo im kar kainepataik dān ko rem̧wilaļ in jetōb ko aer.

Jet iien jej reilikļo̧k ioon ta eo paineer ro rekar kijenmeje im kōn m̧ōņōņō jej ba, “Ilukkuun in m̧ōņōņō bwe ikar jab mour ilo iien kane.” Ak ij bwilōn̄ bwe paineer rein reperan, n̄e ren kar maron̄ loe kōj rainin, remaron̄ kar kwaļo̧k ainikien inepata rot in.

Iien ko reppen im jekjek ko reppen raar oktak, pedped in ad jelm̧ae kapo im tōprak in ad mour ippān doon āinwōt juon jukjukinpād ekōjparok im ej eddōkļo̧k jān Anij ekar jab oktak.

Jān paineer ro jemaron̄ katak bwe en wōr tōmak ippād im lōke ilo Anij. Jemaron̄ in katak bwe en wōr ad tiriam̧o̧ n̄an ro jet. Jemaron̄ in katak bwe jerbal im niknik en kōjeram̧m̧an kōj jab wōt ilo kanniōk ak barāinwōt ilo jetōb. Jemaron̄ katak bwe m̧ōņōņō in ej pojak n̄an kōj jekdo̧o̧n jekjek ko ad.

Wāween eo em̧m̧antata im jemaron̄ kautiej im kwaļo̧k ad kam̧m̧oolol n̄an paineer ro ej jān kakkobaiktok ilo mour ko ad make tiljek n̄an kien ko an Anij, tiriam̧o̧ im iakwe n̄an ro m̧ōttad, im niknik, kijenmej, im lan̄lōn̄ eo paineer ro rekar lukkuun kōmeļeļeiki ilo mour ko aer make.

Ilo ad kōm̧m̧an āindein, jemaron̄ kijooni iien ko rellōn̄, bōk ilo peid pein paineer rein routiej, im kobaik ippān ainikien ko ad make āinwōt ad al ippāer: “Aolep men renaaj em̧m̧an! Aolep men renaaj em̧m̧an!”