Gyina dɛ Kan

Meenya akwanya akɔ kusum amambra afedzi ahorow a wɔayɛ dze akã temple a worutu ahyɛ Nyame nsa ho. Maapɛ ne nyina, a dza ɔnnkyɛree a mokɔɔr no wɔ Phoenix, Arizona, USA, mfeda Ɔbrɛfɛw mu no, kã ho.

Nda a Odzi Ekyir Ahotseweefo mbabun a nna wɔkã kusum amambra afedzi ho no dzii agor a nna ɔyɛ nwanwa kɛse. Mfeda wɔ Phoenix, aka kakra ara ma afedzi no aso no, Mekãa kyerɛɛ hɔn a wɔkã ho no dɛ, “Hom yɛ kan mba.”

Mepɛ dɛ Asɔr no mbabun nyina hu dɛ wɔyɛ kan mba. Dɛm ntsi, wɔwɔ asodzi dɛ wɔbɛyɛ “dɛ nkandzea wɔ wiadze mu” (Philippifo 2:15). Wɔwɔ asɛdze dɛ wɔkyɛ asɛmpa no nokwar no. Wɔwɔ ɔfrɛ dɛ wogyina dɛ temple kandzea, wɔhyerɛn asɛmpa kandzea no kɔ wiadze a ɔrokɔ do yɛ sum no mu. Wɔwɔ asodzi dɛ wɔma hɔn kandzea no dzɛw na ɔyerɛw hyerɛɛn.

Ama yɛaayɛ “esusudo ma agyedzifo no” (1 Timothy 4:12), no otwar dɛ hɛnankasa yɛgye dzi. Otwar dɛ yenya gyedzi no a ohia ma yebedzi konyim sunsum mu na yɛatow kan ama binom. Otwar dɛ yɛnyɛn hɛn dasegye kɛpem dɛ ɔbɛyɛ sekyɛ ama hɛn abrabɔ.

Dza ɔkã akwanhorow a oye dodow ma yenya na yesie gyedzi a yehia no ndɛ nye dɛ yɛbɛkenkan na yesũa kyerɛwsɛm no na yɛataa na yɛawɔw do abɔ mpaa. Asɔr ne mbabun no, mese, sɛ hom nnyɛɛ dɛm a, hom nya daa daa kyerɛwsɛm adzesũa na mpaabɔ ho suban sesei. Ndzeyɛɛ ebien a ohia tsitsir yinom nnyi hɔ a, abowano nhyɛdo na ɔtɔfabi a abrabɔ mu nkõdzen no botum ama hom kandea no akɔ famu anaa oedum no mpo.

Mbasirmbaber no nda famu. Ɔyɛ mber tsitsir a Satan bɔsɔ hom ahwɛ na ɔayɛ dza obotum nyinara dze ato hom brada efi kwan a obegya hom asan hom ɔsor fie ho. Naaso ber a hom kenkan na hom bɔ mpaa na dɛ hom som na hom yɛ setsie no, hom bohu “kan a ɔhyerɛn sum mu” no yie (N & A 6:21), hɛn Fasusu na hɛn ahoɔdzen—Ewuradze Jesus Christ mpo no. Ɔno nye kandzea no a ɔwɔ dɛ yɛma do wɔ sor dze hwetse sum a ɔroboa ano no (hwɛ 3 Nephi 18:24).

Hom dze Agyenkwa no No ho dasegye a ɔyɛ dzen na N’asɛmpa nsan-ananmu no, hom botum ahyerɛn wɔ akwan horow a onnyi kabea mu. Otwa homho hyia dabiara, wɔ gyinabew biara a hom bɔwɔ mu no. Ber a hom dzi Agyenkwa no fasusu do no, hom benya kwan abɛyɛ kandzea, sɛ yɛrekã a, wɔ hɔn a woetwa homho ehyia no abrabɔ mu—sɛ wɔyɛ homara hom ebusuafo, skuulfo, edwumamufo, anyɛnkofo ara, anaa ahɔho koraa no.

Sɛ hom yɛ kan ma wiadze a, nkorɔfo a wɔwɔ hom nkyɛn no tse sunsum soronko bi nkã a ɔbɛma wɔapɛ dɛ wɔnye hom dzi nkitaho na woedzi hom fasusu do.

Mototɔserɛ hɛn mbabun awofo na baanodzifo dɛ wɔmboa hɔn ma wongyina pintsinn mma nokwar na tsenenee. Hom mboa mbue adzesũa, ntseasee na Nyankopɔn ahenman mu som no mbobow no kɛse ma wonhu. Hom nhyɛ hɔn ahoɔdzen wɔ hɔn mu ma wonsiw wiadze nsɔhwɛ kwan. Hom mma hɔn pɛ ma wɔnantsew ɔbrapa na gyedzi mu, wɔmbɔ mpaa na wɔnhwɛ sor dɛ hɔn daa daa sɛkyɛ.

Mese hɛn mbabun no, dɛ, hɛn Ɔsor Egya dɔ hom. Hom so ntse ɔdɔ a Asɔr baanodzifo wɔ ma hom no. Hom nya pɛ daa dɛ hom bɔsom hom Ɔsor Egya na Ne Ba no. Na hom nnantsew daapem wɔ nokwar mu na hom ngyina dɛ kan wɔ Nyankopɔn Ne mba mu.