សារលិខិតគណៈប្រធានទីមួយ ខែ សីហា ឆ្នាំ ២០១៥
ឈរជាពន្លឺ
ខ្ញុំបានមានឯកសិទ្ធិចូលរួមកម្មវិធីវប្បធម៌ជាច្រើនដែលបានប្រារព្ធធ្វើឡើងស្របពេលជាមួយគ្នានឹងការឧទ្ទិសឆ្លងព្រះវិហារបរិសុទ្ធ ។ ខ្ញុំបានចូលចិត្តកម្មវិធីទាំងអស់នោះ រួមមាន កម្មវិធីមួយដែលប្រារព្ធនាពេលថ្មីៗបំផុត នេះ ដែលខ្ញុំបានចូលរួមនៅហ្វីនីក អារីហ្សូណា ស.រ.អា. កាលពីខែ វិច្ឆិកា ឆ្នាំមុន ។
យុវវ័យបរិសុទ្ធថ្ងៃចុងក្រោយដែលបានចូលរួមនៅក្នុងកម្មវិធីវប្បធម៌នោះ បានបង្ហាញនូវកម្មវិធីដ៏អស្ចារ្យ ដែលមិនអាចបំភ្លេចបាន ។ ឆ្នាំមុន នៅ ហ្វីនីក ពីមុនពិធីនោះ ខ្ញុំបានប្រាប់ដល់អ្នកចូលរួមថា « អ្នករាល់គ្នាជាកូនចៅនៃពន្លឺ » ។
ខ្ញុំចង់ឲ្យយុវវ័យទាំងអស់នៃសាសនាចក្រដឹងថា ពួកគេគឺជាកូនចៅនៃពន្លឺ ។ ដូច្នេះពួកគេមានទំនួលខុសត្រូវមួយដើម្បីធ្វើដូចជា « តួពន្លឺនៅក្នុងលោក » (ភីលីព ២:១៥) ។ ពួកគេមានកាតព្វកិច្ចមួយដើម្បីចែកចាយសេចក្តីពិតនៃដំណឹងល្អ ។ ពួកគេមានការហៅបម្រើមួយដើម្បីឈរជាតំណាងនៃព្រះវិហារបរិសុទ្ធ បញ្ចាំងពន្លឺនៃដំណឹងល្អទៅកាន់ពិភពលោកដែលកាន់តែងងឹតទៅៗ ។ ពួកគេមានទំនួលខុសត្រូវមួយ ដើម្បីរក្សាពន្លឺរបស់ខ្លួនឲ្យឆេះសន្ធោសន្ធៅ និង ភ្លឺចែងចាំង ។
ដើម្បីឲ្យពួកយើងក្លាយ « ជាគំរូដល់ពួកអ្នកជឿ » ( ធីម៉ូថេទី ១ ៤:១២ ) យើងខ្លួនឯងផ្ទាល់ត្រូវតែជឿសិន ។ យើងត្រូវតែអភិវឌ្ឍសេចក្តីជំនឿ ដែលចាំបាច់ដើម្បីធ្វើឲ្យវិញ្ញាណរស់រានមានជីវិត ហើយបញ្ចាំងពន្លឺដល់មនុស្សដទៃ ។ យើងត្រូវតែចិញ្ចឹមបីបាច់ទីន្ទាល់របស់យើង រហូតវាក្លាយជាយុថ្កាមួយសម្រាប់ជីវិតរបស់យើង ។
ក្នុងចំណោមវិធីដ៏មានប្រសិទ្ធភាពបំផុត ដើម្បីបង្កើន និង រក្សាសេចក្តីជំនឿដែលយើងត្រូវការសព្វថ្ងៃនេះ នោះគឺ អាន និង សិក្សាព្រះគម្ពីរ ហើយអធិស្ឋានឲ្យទៀងទាត់ និង ជាប់លាប់យ ។ ចំពោះយុវវ័យនៃសាសនចក្រ ខ្ញុំសូមនិយាយថា បើសិនអ្នកពុំបានធ្វើការណ៍នោះទេ សូមធ្វើវាឥឡូវនេះ គឺទម្លាប់នៃការសិក្សាព្រះគម្ពីរ និង ការអធិស្ឋានប្រចាំថ្ងៃ ។ បើគ្មានការអនុវត្តកិច្ចការចាំបាច់ទាំងពីរនេះទេ នោះឥទ្ធិពលនៃពិភពលោកខាងក្រៅ និងពេលខ្លះភាពពិតនៃជីវិតដ៏ឃោរឃៅ អាចធ្វើឲ្យពន្លឺរបស់អ្នកស្រអាប់ ឬ ពន្លត់ពន្លឺរបស់អ្នកបាន ។
អាយុកាលយុវវ័យ ពុំមែនជាអាយុកាលងាយស្រួលទេ ។ វាជាឆ្នាំដ៏សំខាន់ ជាពេលដែលសាតាំងនឹងល្បួងអ្នក ហើយធ្វើអស់ពីសមត្ថភាពវា ដើម្បីដាក់អន្ទាក់អ្នកចេញពីផ្លូវដែលនឹងនាំអ្នកត្រឡប់ទៅកាន់ផ្ទះសួគ៌ារបស់អ្នកវិញ ។ ប៉ុន្តែនៅ ពេលអ្នកអាន និង អធិស្ឋាន ហើយបម្រើ និង គោរពតាម នោះអ្នកនឹងដឹងកាន់តែប្រសើរអំពី « ពន្លឺដែលភ្លឺមកក្នុងសេចក្តីងងឹត » ( គ និង ស ៦:២១ ) ដែលជាគំរូរបស់យើង កម្លំាងរបស់យើង—គឺព្រះអម្ចាស់យេស៊ូវគ្រីស្ទ ។ ទ្រង់គឺជាពន្លឺដែលយើងលើកឡើង ដើម្បីកំចាត់កញ្ចុំនៃភាពងងឹត ( សូមមើល នីហ្វៃទី ៣ ១៨:២៤ ) ។
ជាមួយនឹងទីបន្ទាល់ដ៏រឹងមាំអំពីព្រះអង្គសង្គ្រោះ និងដំណឹងល្អដែលបានស្តារឡើងវិញរបស់ទ្រង់ នោះអ្នកមានឱកាសរាប់មិនអស់ដើម្បីបំភ្លឺ ។ ទីបន្ទាល់នោះនៅជុំវិញអ្នករាល់ថ្ងៃ ទោះបីជាអ្នកនៅក្នុងស្ថានភាពបែបណាក៏ដោយ ។ នៅពេលអ្នកធ្វើតាមគំរូរបស់ព្រះអង្គសង្គ្រោះ គំរូរបស់អ្នកក្លាយជាឱកាសនៃពន្លឺមួយ ដូចដែលវាធ្លាប់ជាពន្លឺក្នុងជីវិតនៃអស់អ្នកដែលនៅជុំវិញអ្នក—សូម្បីតែពួកគេជាសមាជិកនៃគ្រួសារអ្នកផ្ទាល់ មិត្តរួមថ្នាក់ អ្នករួមការងារ អ្នកស្គាល់គ្នា ឬ អ្នកចម្លែកមុខទាំងអស់ ។
នៅពេលអ្នកជាពន្លឺចំពោះពិភពលោក នោះមនុស្សនៅជុំវិញអ្នកនឹងទទួលអាម្មរណ៍ពិសេស ដែលនឹងធ្វើឲ្យពួកគេចង់ទាក់ទងជាមួយអ្នក ហើយធ្វើតាមគំរូរបស់អ្នក ។
ខ្ញុំសូមអង្វរឪពុកម្តាយ និង ថ្នាក់ដឹកនាំយុវវ័យរបស់យើង ឲ្យជួយពួកគេឈរយ៉ាងរឹងមាំសម្រាប់សេចក្តីពិតនិង សេចក្តីសុចរិត ។ សូមជួយពួកគេឲ្យបង្កើននូវទស្សនវិស័យរបស់ខ្លួនអំពីការសិក្សា ការយល់ដឹង និងការបម្រើនៅក្នុងនរគនៃព្រះ ។ សូមបង្កើតកម្លាំងនៅក្នុងខ្លួនពួកគេដើម្បីទប់ទល់នឹងការល្បួងទាំងឡាយនៃពិភពលោក ។ សូមផ្តល់ដល់ពួកគេនូវឆន្ទៈដើម្បីដើរតាមគុណធម៌ និង សេចក្តីជំនឿ ឲ្យពោរពេញដោយការអធិស្ឋាន ហើយមើលឆ្ពោះទៅស្ថានសួគ៌ជាយុថ្កាដ៏មាំរបស់ពួកគេ ។
ខ្ញុំសូមនិយាយចំពោះយុវវ័យរបស់យើងថា ព្រះវរបិតាសួគ៌របស់យើងស្រឡាញ់អ្នក ។ សូមឲ្យអ្នកទទួលបាននូវសេចក្តីស្រឡាញ់ ដែលថ្នាក់ដឹកនាំរបស់សាសនាចក្រមានចំពោះអ្នកផងដែរ ។ សូមឲ្យអ្នកមានបំណងប្រាថ្នាដើម្បីបម្រើព្រះវរបិតាសួគ៌ និង ព្រះរាជបុត្រារបស់ទ្រង់ ។ ហើយសូមឲ្យអ្នកដើរនៅក្នុងសេចក្តីពិត និង ឈរជាពន្លឺក្នុងចំណោមកូនចៅរបស់ព្រះ ។
© ឆ្នាំ ២០១៥ ដោយ Intellectual Reserve, Inc ។ រក្សាសិទ្ធិគ្រប់យ៉ាង ។ បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ ៦/១៤ ។ អនុមតិឲ្យបកប្រែ ៖ ៦/១៤ ។ ការបកប្រែនៃ First Presidency Message, August 2015 ។ Cambodian 12588 258