Ua Kom Kev Thov Vajtswv Zoo Zuj Zus

Thawj Tswj Hwm Eyring qhia hais tias koj tsev neeg yuav tau koob hmoov thaum koj sib raug zoo nrog koj Leej Txiv Saum Ntuj Ceeb Tsheej. Koj haj yam sib raug zoo nrog Nws thaum koj ua kom koj txoj kev thov Vajtswv zoo zuj zus! Nov yog ob peb lub tswv yim ua li ntawd:

Ua ntej koj pib thov Vajtswv, cia li siv sij hawm me ntsis xav txog tej yam uas koj xav hais. Cia li xav txog tej lus nug uas koj muaj los yog tej yam uas koj txhawj txog—koj sau tau tej ntawd koj thiaj yuav nco ntsoov. Cia li siv lub sij hawm no kom koj tsis xav txog tej xwm txheej ntawm ib hnub koj thiaj yuav tsom ntsoov rau tus Vaj Ntsuj Plig Dawb Huv tej kev tshoov siab. Yog koj xav txog qhov ub qhov no thaum koj thov Vajtswv, cia li sim xam pom hauv koj lub siab tias Leej Txiv Saum Ntuj Ceeb Tsheej mloog koj. Hais meej heev. Thiab, cia li tseg ob peb feeb cia thaum koj yuav xaus kev thov Vajtswv kom mloog tus Ntsuj Plig tej kev tshoov siab. Tej zaum koj yuav xav sau tej kev tshoov siab uas koj txais nyob hauv koj phau ceev xwm txheej.

Cia li nco ntsoov tias kev thov Vajtswv yog ib yam hauj lwm, yog li ntawd txhob txhawj yog tias koj yuav tsum xyaum los sis ua rau koj xav tias kev thov Vajtswv yog ib qho nyuaj! Qhov uas koj siv zog thov Vajtswv yuav pab koj sib raug zoo nrog Vajtswv uas yuav foom koob hmoov rau ntau tiam neeg tom ntej.