2015
Tsev Neeg thiab Kev Thov Vajtswv
September 2015

Thawj Pawg Thawj Tswj Hwm tsab Xov, Cuaj Hli Ntuj 2015

Tsev Neeg thiab Kev Thov Vajtswv

Los ntawm Thawj Tswj Hwm Henry B. Eyring

Tus Pab Cuam thib Ib hauv Thawj Pawg Thawj Tswj Hwm

Daim Duab
Thawj Tswj Hwm Henry B. Eyring

Muaj ib hmo, thaum kuv zaum ntawm kuv txiv lub txaj ib sab tas ib hmo, nws hais lus txog thaum nws yog ib tug me nyuam. Nws hais txog qhov uas nws niam nws txiv sib hlub txawm muaj tej kev nyuaj thiab hais txog Nws Leej Txiv Saum Ntuj Ceeb Tsheej thiab tus Cawm Seej txoj kev hlub. Kuv paub tias nws yeej yuav tas sim neej vim nws mob cancer, yog li ntawd kuv thiaj paub tias tej lub sij hawm nws muab nws Leej Txiv Saum Ntuj Ceeb Tsheej txoj kev hlub thiab nws leej txiv hauv lub ntiaj teb no txoj kev hlub thiab kev ua siab zoo sib xyaws. Kuv txiv hais ntau zaus hais tias thaum nws thov Vajtswv, nws xav tias nws pom tau Leej Txiv Saum Ntuj Ceeb Tsheej luag nyav.

Nws niam nws txiv tau qhia los ntawm nkawd tus yam ntxwv kom nws thov Vajtswv yam li nws hais lus rau Vajtswv xwb thiab Vajtswv yuav teb nws nrog txoj kev hlub. Nws yeej xav tau nkawd tus yam ntxwv mus txog thaum kawg. Thaum mob mob heev, peb nrhiav tau nws txhos caug ze rau nws lub txaj. Nws sab dhau lawm nws nce tsis tau saum txaj. Nws qhia peb tias nws tau thov nws Leej Txiv Saum Ntuj Ceeb Tsheej nug seb vim li cas nws yuav tsum raug mob npaum li no thaum nws yeej siv zog ua ib tug neeg zoo. Nws hais tias Vajtswv ua siab zoo teb hais tias: “Vajtswv xav tau cov tub uas ua siab loj.”

Yog li ntawd nws thiaj li nyiaj mus kom txog thaum kawg, ntseeg tias Vajtswv hlub nws, mloog nws, thiab yuav txhawb nqa nws. Nws tau koob hmoov vim nws paub thaum ntxov thiab yeej nco ntsoov tias Vajtswv nyob ze thaum yus thov Vajtswv.

Yog vim li no tus Tswv thiaj qhia cov niam tsev txiv tsev kom lawv qhia lawv tej me nyuam kom thov Vajtswv, thiab kom taug kev ncaj rau tus Tswv (saib Q&K 68:28).

Yexus Khetos txoj moo zoo raug muab txum tim rov qab los—nrog rau Phau Ntawv Maumoos thiab tag nrho cov yuam sij pov thawj hwj uas muab tsev neeg sib khi ua ke—vim Yauxej Xamiv yog ib tug tub hluas uas muaj kev ntseeg thov Vajtswv. Nws tau txoj kev ntseeg ntawd los ntawm ib tsev neeg uas sib hlub thiab rau siab ntseeg.

Nees nkaum xyoo tas los lawm tus Tswv qhia tej tsev neeg txog cov lus no nyob hauv “Tsev Neeg, Ib zaj Lus Tshaj Tawm rau lub Ntiaj Teb” los ntawm Thawj Pawg Thawj Tswj Hwm thiab Pawg Kaum Ob tug Thwj Tim: “Tej kev sib yuav thiab tej tsev neeg uas kav ntev raug tsa thiab nyob mus li ntawm tej kev ntseeg, kev thov Vajtswv, kev hloov siab lees txim, kev zam txim, kev sib hwm, kev hlub, kev khuv leej, kev ua hauj lwm, thiab kev ua si uas tsim nyog ua.”1

Peb ris tus Yaj Saub Yauxej Xamiv tsev neeg txiaj vim lawv tu nws loj hlob zoo heev. Nws tsev neeg coj yam ntxwv zoo txog kev ntseeg thiab kev thov Vajtswv, thiab kev hloov siab lees txim, kev zam txim, kev sib hwm, kev hlub, kev khuv leej, kev ua hauj lwm, thiab kev ua si uas tsim nyog ua.

Tej tiam neeg tom qab nej yuav hais tias nej tau koob hmoov vim nej coj yam ntxwv thov Vajtswv nrog nej tsev neeg. Tej zaum nej yuav tsis tu Vajtswv ib tug tub qhe loj hlob, tiam sis los ntawm nej tej kev thov Vajtswv thiab tus yam ntxwv ntawm kev rau siab ntseeg nej yuav pab tus Tswv Yexus Khetos tu cov thwj tim zoo loj hlob.

Los ntawm txhua yam uas nej yuav xaiv ua kom pab tus Tswv, kev thov Vajtswv yog qhov tseem ceeb tshaj plaws. Muaj tib neeg uas zoo li peb txhua tus, tiam sis thaum lawv thov Vajtswv, lawv ua rau lwm tus xav qhib qhov muag kom lawv thiaj pom leej twg nyob ntawd. Nej ua tau ib tug neeg zoo li no.

Cia li xav seb qhov ntawd yuav muaj nqi npaum li cas rau cov uas txhos caug nrog nej thaum nej tsev neeg thov Vajtswv ua ke. Thaum lawv xav tias nej muaj kev ntseeg thov Vajtswv, lawv txoj kev ntseeg yuav loj hlob tuaj ua rau lawv xav thov Vajtswv thiab. Thaum nej thov Vajtswv ua Nws tsaug rau cov koob hmoov uas lawv paub tias lawv twb tau txais lawm, lawv txoj kev ntseeg yuav loj hlob tuaj kom lawv ntseeg tias Vajtswv hlub lawv thiab Nws teb nej tej lus thov thiab Nws yuav teb lawv tej lus thov thiab. Yuav muaj li no thaum nej tsev neeg thov Vajtswv ua ke tsuas yog nej tau thov Vajtswv nej tus kheej txhua lub sij hawm.

Kuv tseem tau koob hmoov los ntawm ib tug txiv tsev thiab ib tug niam tsev uas tau sib tham nrog Vajtswv. Qhov uas lawv coj yam ntxwv qhia txog lub hwj chim ntawm tsev neeg txoj kev thov Vajtswv ua ke tseem foom koob hmoov rau tej tiam neeg uas ua neej nyob tom qab lawv.

Kuv cov me nyuam thiab cov xeeb leej xeeb ntxwv tau koob hmoov txhua hnub los ntawm kuv niam kuv txiv tus yam ntxwv. Lawv tau kev ntseeg hais tias Vajtswv yeej mloog thiab teb lawv tej lus thov. Nej muaj peev xwm tsim ib qho zoo li no uas nej tsev neeg yuav nco ntsoov. Kuv thov Vajtswv kom nej yuav ua li no.

(c) 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/15. Pub txhais ua lus Hmoob: 6/15. Kev txhais First Presidency Message, September 2015. Hmong. 12589 295

Lus Cim

  1. “Tsev Neeg: Ib zaj Lus Tshaj Tawm rau lub Ntiaj Teb,” Liahona, Kaum Ib Hlis Ntuj 2010, 129.

Ua Koob Tsheej Nco txog Xyoo thib 20 Txij Thaum Muaj Lus Tshaj Tawm txog Tsev Neeg

“Tsev Neeg: Ib zaj Lus Tim Khawv rau lub Ntiaj Teb” qhia txog tej ntsiab cai uas tseem ceeb niaj hnub no ib yam li thaum tshaj tawm thaum lub Cuaj Hli Ntuj hnub tim 23, xyoo 1995. Xav seb puas tsim nyog caw cov neeg los sis tsev neeg uas koj qhia kom lawv ua koob tsheej nco txog xyoo thib 20 txij thaum muaj lus tshaj tawm thaum koj:

  1. Hais tej ntsiab cai nyob hauv zaj lus tshaj tawm no uas muaj nuj nqi heev rau lawv. (Cia li saib Thawj Tswj Hwm Eyring ua li no thaum nws hais txog kev thov Vajtswv nyob hauv zaj lus saum no.)

  2. Sib tham seb txhua lub ntsiab cai yuav foom koob hmoov li cas rau lawv hnub no thiab yav tom ntej.

  3. Cuab hom phiaj kom ua raws li tej lub ntsiab cai ntawd nyob hauv lawv lub neej thiab qhia tej ntawd rau lwm tus.