Agbalin nga Ulidan ken Silaw

Kakabsat, maragsakanak a makaduakayo manen ita. Kas ammoyo, manipud pay idi nagkakaduatayo idi Abril, nagladingittayo iti ipapanaw ti tallo kadagiti ay-ayatentayo nga Apostol. Da Presidente Boyd K. Packer, Elder L. Tom Perry, ken Elder Richard G. Scott. Nagsublidan iti pagtaenganda iti langit. Malaglagiptayo ida. Agyamantayo kadagiti pagwadan ti ayat a kas ken Cristo ken dagiti makaparegta a pannursuro nga imbatida kadatayo amin.

Idanonmi ti naimpusuan nga isasangbay dagiti kabaruan nga Apostoltayo, da Elder Ronald A. Rasband, Elder Gary E. Stevenson, ken Elder Dale G. Renlund. Dagitoy dagiti lallaki a naanep iti aramid ti Apo. Maikarida unay kadagiti napapateg a pagrebbengan a nakaawaganda.

Itay kallabes, binasbasak ken inut-utobko dagiti nasantuan a kasuratan, nagtalinaed iti panunotko ti dua a binatog. Agpada a pamiliar kadatayo. Ti umuna ket naggapu iti Kaskasaba iti Bantay: “Kasta koma ti panaglawag ti silawyo iti sanguanan dagiti tao, tapno makitada dagiti naimbag nga aramidyo, ket dayawenda koma ni Amayo nga adda sadi langit.”¹ Ti maikadua a nasantuan a kasuratan a napanunotko bayat ti panangutobko iti kaipapanan ti umuna. Naggapu daytoy iti Surat ni Apostol Pablo ken ni Timoteo: “Sika koma ti ulidan kadagiti mamati, iti sao, iti pannakisarita, iti ayat, iti espiritu, iti pammati, iti kinadalus”² (Timoteo 4:12).

Mamatiak nga ilawlawag ti maikadua a nasantuan a kasuratan, iti dakkel a paset, no kasano a maipatungpaltayo ti umuna. Agbalintayo nga ulidan kadagiti mamati babaen ti panagbiagtayo iti ebanghelio ni Jesucristo iti sao, iti pannakisarita, iti ayat, iti espiritu, iti pammati, ken iti kinadalus. No aramidentayo daytoy, agraniagto ti silawtayo a makita dagiti sabali.

Immay ti tunggal maysa kadatayo iti daga a naikkanen iti Silaw ni Cristo. No surotentayo ti pagwadan ti Mangisalakan ket agbiag a kas iti insurona, agrayrayto dayta a silaw iti unegtayo ket lawagannanto ti dalan para kadagiti sabali.

Ilista ni Apostol Pablo ti innem a kababalin ti maysa a mamati, kababalin a mangpalugodto kadagiti silawtayo nga agraniag. Saggaysaentayo dagitoy.

Dakamatek nga aggiddan ti umuna a dua a kababalin—panagbalin nga ulidan iti sao ken iti pannakisarita. Dagiti sao wenno balikas nga usarentayo ket mabalin a mangpapigsa wenno mangparegta, wenno mabalinda a mangpasakit wenno manguyaw iti tao. Iti lubong ita adda dagiti dakes a sao a mangmangngegtayo sadino man ti papanantayo. Narigat a maliklikan a denggen a maus-usar dagiti nagan ti Dios a gagangay ken awan panagdayaw. Dagiti bulgar a panagsasao ket kasla gagangayen iti telebision, pelikula, libro, ken musika. Maibassawang dagiti makadadael ken makagura a panagsasao. Makisaotayo kadagiti dadduma nga addaan ayat ken respeto, pagtalinaeden a kanayon a nadalus ti panagsasaotayo ken liklikan dagiti balikas ken masao a mangdangran wenno mangpasakit iti tao. Masurottayo koma ti pagwadan ti Mangisalakan, a nagsao nga addaan iti panagpabus-oy ken kinasingpet iti unos ti panagserbina.

Ti sumaruno a kababalin a dinakamat ni Pablo ket ayat, nga nailawlawag a kas “ti natarnaw nga ayat ni Cristo.”³ Mamatiak nga adda iti sakup ti impluensiatayo dagiti malidlidayan, dagiti masaksakit, ken dagiti makarikna iti pannakapaay wenno maawanan iti namnama. Daytoy ti gundawaytayo a mangtulong kadakuada ken mangpapigsa iti pakinakemda. Nangted ti Mangisalakan iti namnama kadagiti napukawan iti namnama ken pigsa kadagiti nakapuy. Inagasanna dagiti masakit; inaramidna a makapagna ti pilay, makakita ti bulsek, ken makangngeg ti tuleng. Pinagungarna pay ti natay. Iti unos ti panangserbina tinulonganna nga addaan iti ayat ti asino man nga agkasapulan. No tuladentayo ti pagwadanna, mangbendisiontayo kadagiti biag, agraman ti bukodtayo a biag.

Sumaruno, agbalintayo nga ulidan iti espiritu. Para kaniak kayatna a sawen nga ikarigatantayo a maaddaan iti biagtayo ti kinasingpet, panagyaman, pammakawan, ken pagsayaatan. Dagitoy a galad ti mangtedto kadatayo iti espiritu a mangsagid iti biag dagiti tao nga adda iti aglawlawtayo. Naaddaanak iti gundaway iti uneg ti adu a tawen a nakipulapol iti adu a tao nga addaan iti kasta nga espiritu. Mapadasantayo ti naisangsangayan a rikna no makaduatayo ida, rikna a mammagusto kadatayo tapno makapulapol ida ken mangsurot iti pagwadanda. Agsilnag kadakuada ti Silaw ni Cristo ken mangtulong kadatayo a mangrikna iti ayatna para kadatayo.

Tapno mailadawan a dayta a silaw nga aggapu iti nadalus ken managayat nga espiritu ken mabigbig dagiti dadduma, iburayko kadakayo ti maysa a padas adun a tawen ti napalabas.

Iti dayta a panawen, nakipagkita dagiti lider ti Simbaan kadagiti opisial ti Jerusalem tapno mangaramid iti pannakitulag para iti panagupa iti daga a pangpatakderan iti Sentro ti Jerusalem iti Simbaan. Tapno magun-od dagiti kasapulan a pammalubos, nasken nga umanamong ti Simbaan nga awan ti maaramid a panagproselayt dagiti miembro a mangusar iti sentro. Kalpasan ti pannakaaramid dayta a panagtinnulag, maysa kadagiti opisial ti Israel, a makaam-ammo unay iti Siimbaan ken dagiti miembro daytoy, kinunana nga ammona a tungpalento ti Simbaan ti panagtinnulag a saanda nga agproselayt. “Ngem,” kinunana, a mangitudtudo kadagiti estudiante a dumar-ayto idiay, “ania ti aramidentayto iti lawag nga adda kadagiti matada?”⁴ Makapagraniag koma a kanayon dayta naisangsangayan a silaw iti unegtayo, tapno makita ken mabigbig dagiti dadduma ti pateg daytoy.

Tapno agbalintayo nga ulidan kadagiti mamati kayatna a sawen a nasken nga agtalektayo iti Apo ken iti balikasna. Kayatna a sawen nga adda kadatayo ken aywanantayo dagiti pammati a mangtarabayto kadagiti panunot ken tignaytayo. Ti pammatitayo ken ni Apo Jesucristro ken iti Nailangitan nga Amatayo ket makaimpluensia iti amin a nga aramidentayo. Iti baet ti pannakatikaw iti panawentayo, panaggigiddiat dagiti kapanunotantayo, ken ti panagdandanag iti inaldaw a panagbiag, agbalin a maysa nga angkla iti panagbiagtayo ti napigsa a pammati. Saan nga aggiddan a makapagtalinaed ti pammati ken duadua iti maymaysa a panunot, gapu ta iwaksi ti maysa ti sabali. Ulitek manen ti no ania ti naibaga kadatayo a nadagdagullit—a tapno magun-od ken mapagtalinaedtayo ti pammati a kasapulantayo, nasken a basaen ken adalen ken utobentayo dagiti nasantuan a kasuratan. Ti pannakisarita iti Nailangitan nga Amatayo babaen ti kararag ket napateg unay. Ditayo kabaelan a liwayan dagitoy a banag, gapu ta awan sarday ti kabusor ken dagiti kamponna nga agsapul iti lamat iti kalasagtayo, a mangpakapuy iti kinapudnotayo. Kinuna ti Apo, “Agsukisokkayo a sireregta, agkararagkayo a kanayon, ken mamatikayo, ket agkaykaysa ti amin a banag para iti pagimbaganyo.”⁵

Kamaudiananna, nasken nga agbalintayo a natarnaw, a kayatna a sawen a nadalustayo iti bagi, panunot, ken espiritu. Ammotayo a ti bagitayo ket maysa a templo, a matrato iti panagraem ken panangrespeto. Nasken a mapno dagiti panunottayo kadagiti makapapigsa ken makapangayed a kapanunotan ken mapagtalinaed a nadalus manipud kadagiti banag a makaparugit. Tapno maaddaan iti Espiritu Santo a kanayon a kadkaduatayo, nasken nga agbalintayo a maikari. Kakabsat, ti kinatarnaw ti mangisangbayto kadatayo iti talna ti panunot ken mangpaikarinto kadatayo nga umawat kadagiti kari ti Mangisalakan. Kinunana, “Nagasat dagiti nadalus ti pusona; ta makitadanto ti Dios.”⁶

No mapaneknekantayo nga agbalin nga ulidan iti sao, iti pannakisarita, iti ayat, iti espiritu, iti pammati, iti kinadalus, maikaritayto nga agbalin a silaw iti lubong.

Makunak kadakayo amin, ken nangnangruna kadakayo nga agtutubo, a bayat ti panagtignay ti lubong nga umadayo nga umadayo kadagiti pagbatayan ken pangiwanwan nga inted kadatayo ni managayat a Nailangitan nga Ama, maibukodtayto manipud iti kaaduan dagiti tao gapu ta naidumdumatayo. Maibukodtayto gapu ta disente ti panagkawestayo. Agbalintayto a naidumduma gapu ta ditayo agsasao iti dakes ken gapu ta ditayo mangmangan wenno agipapauneg kadagiti makmakan a makadangran iti bagitayo. Agbalintayto a naidumduma gapu ta liklikantayo dagiti saan nga umisu a panagangaw ken makaibaba iti dayaw a panagdillaw. Agbalintayto a naidumduma no ikeddengtayo ti saan a kumita kadagiti media a makaparugit iti dayaw ken makaibaba iti kinatao ken mangyadayo iti Espiritu kadagiti pagtaengantayo ken iti panagbiagtayo. Awan duadua a maibukodtayto no agaramidtayo kadagiti pili maipanggep ti moralidad—dagiti pili a mayannurot kadagiti pagbatayan ken pagrukodan ti ebanghelio. Dagita a banag a mamangbalin kadatayo a naidumduma manipud iti kaaduan ti lubong ket mangipaayda pay iti dayta a silaw ken iti dayta nga espiritu a manglawagto iti sumipsipngeten a lubong.

Masansan a narigat ti agbalin a naidumduma ken agbukod nga agmaymaysa iti kaaduan dagiti tao. Gagangay nga agbutengtayo iti no ania ti panunoten wenno sawen dagiti dadduma. Makapaliwliwa dagiti balikas ti salmo: “Ni Jehova ti silaw ken salakanko; asino ti kabutengkonto? ni Jehova isu ti bileg ti biagko; siasino ti pagbutengakto?”⁷ No aramidentayo a ni Cristo ti sentro ti biagtayo, masukatan dagiti butengtayo iti tured dagiti natibker a pammatitayo.

Awan kadatayo ti perpekto ti biagna, ken no dadduma, mabalin a nadagsen dagiti karit ken problema a pakaipaspasanguantayo, a pakaigapuan tapno kumudrep ti silawtayo. Nupay kasta, iti tulong ti Nailangitan nga Amatayo, a buyogan ti suporta manipud kadagiti dadduma, masindiantayo manen dayta a silaw a manglawag manen iti bukodtayo a dalan ken makaitedtayo iti silaw a mabalin a kasapulan dagiti dadduma.

Tapno mailadawan daytoy, iburayko kadakayo dagiti makaawis a balikas ti maysa a daniw nga immuna a nabasak adun a tawen ti napalabas:

Kakabsatko, dagiti gundawaytayo nga agraniag ket naipalawlaw kadatayo iti tunggal aldaw, iti ania man a kasasaadtayo a pakaipasanguatayo. No surotentayo ti pagwadan ti Mangisalakan, maaddaantayto iti gundaway nga agbalin a silaw iti biag dagiti dadduma, miembroda man iti pamiliatayo ken gagayyemtayo, dagiti katrabahuantayo, kaam-ammotayo, wenno ganggannaetda.

Iti tunggal maysa kadakayo, kunak a dakayo ti anak ti Nailangitan nga Amatayo. Naggapukayo manipud iti sidongna tapno agbiag ken agnaed iti daytoy a daga iti sumagmamano a panawen, tapno agbalin a pagwadan ti ayat ken pannursuro ti Mangisalakan, ken situtured a mangpalawag iti silawyo tapno makita daggiti dadduma. No naggibusen ti biagyo ditoy daga, no naaramidyon ti pasetyo, maitedto kadakayo ti nagloriaan a bendision a makapagsubli ken makipagnaed Kenkuana iti agnanayon.

Makapatalged dagiti balikas ti Mangisalakan: “Siak ti silaw ti lubong: isu a sumurot kaniak saanto a magna iti kasipngetan, ngem maaddaanto iti silaw ti biag.”⁹ Paneknekak maipapan Kenkuana. Isu ti Mangisalakan ken Mannubbottayo; ti Mangibabaettayo iti Ama. Isu ti Pagwadan ken pigsatayo. Isu “ti silaw nga aglawag iti kasipngetan.”¹⁰ Sapay koma ta agkari ti tunggal maysa kadatayo a dumdumngeg kaniak a sumurot Kenkuana, tapno iti kasta agbalin a naraniag a silaw iti sangalubongay, ikararagko iti nasantuan a naganna, kas ken ni Jesucristo ti Apo, amen.