Ti Espiritu Santo a kas Kadkaduayo

Patpatgek a kakabsatko, agyamanak a makaduakayo iti daytoy aldaw ti Sabbath iti sapasap a komperensia ti Simbaan ti Apo. Kas iti nariknayo, nariknak ti Espiritu Santo a mangipampaneknek kadagiti balikas ti kinapudno a nangngegantayo a naisao ken naikanta.

Ti panggepko ita ket mangpadakkel iti tarigagayyo ken determinasionyo a mangtunton iti sagut a naikari iti tunggal maysa kadatayo kalpasan ti panagbuniagtayo. Bayat ti kompirmasiontayo nangngegtayo dagitoy a balikas: “Awatem ti Espiritu Santo.”¹ Manipud iti dayta a kanito, nagbalbaliw nga agnanayon ti biagtayo.

No agbiagtayo a maikari iti daytoy, maaddaantayo iti bendision ti Espiritu a mangkadkadua kadatayo, saan laeng a sagpaminsan, kas iti mapadpadasantayo iti agdama, no di ketdi kanayon. Ammoyo manipud kadagiti balikas ti kararag ti sakramento no kasano a maipatpatungpal dayta a kari: “O Dios, Agnanayon nga Ama, dawatenmi kenka iti nagan ti Anakmo, ni Jesucristo, a bendisionan ken pasantuem daytoy a tinapay kadagiti kararua dagiti amin a mairanud iti daytoy; tapno lak-amenda a silalagip iti bagi ti Anakmo, ken paneknekanda kenka, O Dios, Agnanayon nga Ama, tapno siaayatda a mangawat iti nagan ti Anakmo, ken kanayon a laglagipenda, ken tungpalenda dagiti bilin nga intedna kadakuada, tapno kanayon nga agtaeng kadakuada ti Espirituna.”

Ket kalpasanna umay ti nadayag a kari: “Tapno kanayon nga adda kadakuada ti Espirituna a mangkadkadua kadakuada” (DkK 20:77; naainayon ti panangyunay-unay).

Tapno maaddaan a kanayon ti Espirituna a mangkadkadua kadatayo ket maaddaan iti pannarabay ken panangiturong ti Espiritu Santo iti inaldaw a panagbiagtayo. Kas pagarigan, mabalinnatayo a ballaagan ti Espiritu tapno mapagkedkedan ti sulisog nga agaramid iti dakes.

Iti dayta laeng a gapu, nalaka a makita no apay a pinadas dagiti katulongan ti Apo ti mangnayon iti tarigagaytayo nga agrukbab iti Dios kadagiti mitingtayo iti sakramento. NO makiranudtayo iti sakramento a sipapammati, masaluadannatayto ti Espiritu Santo ken dagiti ipatpategtayo manipud kadagiti pannulisog a dumteng a nakarkaro ken masansan.

Ti panangkadkadua ti Espiritu Santo ket aramidenna nga ad-adda a makaay-ayo ti nasayaat ken saantayo a nalaka a masulisog. Nasken nga umdas koma daytan a gapu a mangaramid kadatayo a determinado nga agbalin a maikari iti Espiritu a mangkadkadua kadatayo a kanayon.

Kas iti panangpapigsa kadatayo ti Espiritu Santo a maibusor iti dakes, ikkannatayo pay iti bileg a mangilasin iti kinapudno manipud iti kinapalso. Ti kinapudno a kapatgan iti amin ket mapaneknekan laeng babaen ti paltiing manipud iti Dios. Ti kinasaririttayo ken ti panangusar kadagiti panagriknatayo ket saan nga umdas. Agbibiagtayo iti maysa a panawen nga uray ti kasiriban ket marigatan a mangkita iti pagdumaan ti kinapudno iti nasikap a panangallilaw.

Insuro ti Apo ni Apostol Tomas, a nagtarigagay iti pisikal a pakakitaan ti Panangungar ti Mangisalakan babaen ti panangsagidna kadagiti sugatna, nataltalged a pakakitaan dayta a paltiing: “Kuna kenkuana ni Jesus, gapu ta nakitanak, Tomas, mamatika: nagasat dagiti saan a makakita ket namatida” (Juan 20:29).

Dagiti kinapudno a mangipakita iti dalan nga agawid iti pagtaengan ti Dios ket paneknekan ti Espiritu Santo. Ditayo mabalin ti mapan iti kakaywan ket makitatayo ti Ama ken ti Anak a makisarsarita iti ubing a ni Joseph Smith. Awan ti pisikal aa pakakitaan wenno ania man a nainrasonan nga argumento a mangipakita nga immay ni Elijah kas naikari tapno itedna dagiti tulbek ti priesthood nga ig-iggaman ken us-usaren itan ti maysa a sibibiag a propeta, ni Thomas S. Monson.

Umay ti pammatalged ti kinapudno iti maysa a lalaki wenno babai nga anak ti Dios a nangtunton iti karbengan nga umawat iti Espiritu Santo. Gapu ta mabalin a maidatag kadatayo dagiti kinapalso ken kinaulbod iti ania man nga oras, kasapulantayo ti kanayon nga impluensia ti Espiritu ti Kinapudno tapno ditayo makapagduadua.

Idi ginuyugoynatayo ti maysa a miembro ti Korum dagiti Sangapulo-ket-dua nga Apostol, ni George Q. Cannon, a nasken a kiddawentayo a kanayon ti Espiritu a mangkadkadua kadatayo. Inkarina, ken kasta met nga ikarik daytoy, a no aramidentayo dayta, datayo ket “ditayto agkurang iti pannakaammo iti kaano man” maipapan ti kinapudno, “saantayo nga agduadua iti kaano man wenno adda iti kasipngetan,” ket “pumigsanto ti pammatitayo, mapno ti … rag-o{tayo}.”²

Kasapulantayo a kanayon dayta a tulong manipud iti panangkadkadua ti Espiritu Santo para iti maysa pay a gapu. Mabalin a dumteng a di namnamaen ti ipapatay ti maysa nga ipatpateg iti biag. Ti pammaneknek manipud iti Espiritu Santo maipapan iti kinapudno ti maysa a managayat a Nailangitan nga Ama ken ti nangungar a Mangisaalakan a mangmangted kadatayo iti namnama ken liwliwa iti ipapanaw ti maysa nga ipatpateg iti biag. Nasken nga addaa kadatayo dayta a pammaneknek no mataytayo.

Isu a, para iti adu a gapu, kasapulantayo ti kanayon a panangkadkadua ti Espiritu Santo. Tarigagayantayo daytoy, ngem ammotayo manipud iti padas a saan a nalaka a pagtalinaeden daytoy. Tunggal maysa kadatayo ket agpanunot, agsao, ken agaramid kadagiti banag iti inaldaw a panagbiagtayo a mabalin a makapasakit iti Espiritu. Insuronatayo ti Apo a ti Espiritu Santo ti agbalin a kanayon a kadkaduatayo no napno ti pusotayo iti kinamanangngaasi ken no taraonan ti saguday ti pampanunottayo nga awan ressatna (kitaen iti DkK 121:45).

Para kadagiti marigatan a mangtungpal iti nangato a pagrukodan a kasapulan tapno maikari iti sagut ti panangkadkadua ti Espiritu, idiayak daytoy a pammaregta. Naaddaankayon kadagiti panawen a pannakariknayo iti impluensia ti Espiritu Santo. Mabalin a napasamak daytoy kenka itan.

Mabalinmo nga ibilang dagita a kanito ti pammaregta a kasla iti bukel ti pammati nga inladawan ni Alma (kitaen iti Alma 32:28). Imulayo ti tunggal maysa. Maaramidyo dayta babaen ti panagtignay segun iti parikna a nariknayo. Ti kapatgan nga inspirasion ket ti pannakaammoyo no ania ti kayat nga ipaaramid ti Dios kadakayo. No daytoy ket panagbayad iti apagkapullo wenno isasarungkar iti agladladingit a maysa a gayyem, nasken nga aramidenyo daytoy. Ania man daytoy, aramidenyo. No ipakitayo ti kinatallugodyo nga agtungpal, ad-adu nga impresion ti itedto ti Espiritu maipapan iti kayat ti Dios nga ipaaramid kadakayo para Kenkuana.

No agtungpalkayo, masansan nga umayto dagiti impresion manipud iti Espiritu, nga umasideg nga umasideg iti kanayon a panangkadkaduana. Dumakkelto ti bilegyo nga agpili iti rumbeng.

Maammuanyo no dagiti impresion nga agtignay para Kenkuana ket aggapu iti Espiritu imbes nga aggapu kadagiti bukodyo a tarigagay. No dagiti impresion ket mayannatup iti kinuna ti Mangisalakan ken dagiti sibibiag a propetana, mabalinyo a pilien ti agtungpal nga addaan panagtalek. Kalpasanna ibaonto ti Apo ti Espirituna a mangtulong kadakayo.

Kas pagarigan, no maawatmo ti naespirituan nga impresion a mangdayaw iti aldaw ti Sabbath, nangnangruna no kasla narigat daytoy, ibaonto ti ti Dios ti Espirituna tapno tumulong.

Dimteng dayta a tulong iti amak adun a tawen ti napalabas idi mapan isuna iti Australia tapno agtrabaho. Agmaymaysa isuna iti maysa a Domingo, ket kayatna ti mankiranud iti sakramento. Awan ti makitana nga impormasion maipapan kadagiti miting dagiti Santo iti Ud-udina nga Aldaw. Isu a rinugianna ti nagna. Nagkararag isuna iti tunggal pagkurusan tapno maammuanna no ania a dalan ti pagsikuanna. Kalpasan ti pannagna ken panagsikkona iti uneg ti maysa nga oras, nagsardeng isuna tapno agkararag manen. Nariknana ti impresion nga agsikko iti maysa a kalsada. Iti saan a nabayag adda nangngegna nga agkankanta a naggapu iti kababaan a kadsaaran ti maysa nga apartment iti asideg. Simmirip isuna iti tawa ket nakitana ti sumagmamano a tattao a nakatugaw iti asideg ti lamisaan a naarpawan iti puraw a lupot ken naiparabaw dagiti bandeha ti sakramento.

Ita, mabalin a kasla saan unay a napateg kadakayo, ngem para kenkuana ket napateg unay daytoy. Ammona a naipatungpal ti kari ti kararag ti sakramento. “Kanayon a laglagipen isuna ken agtungpal kadagiti bilinna nga intedna kadakauada; tapno kanayon nga adda kadakuada ti Espirituna” (DkK 20:77).

Maysa laeng dayta a pagarigan ti panawen idi nagkararag ket kalpasanna inaramidna ti imbaga kenkuana ti Espiritu nga ipaaramid ti Dios kenkuana. Intuloyna nga inaramid daytoy iti uneg ti adu a tawen kas iti aramidentayto. Saan a kaano man nagsarita maipapan iti espiritualidadna. Intuloyna laeng nga aramiden dagiti babassit a banag para iti Apo a nariknana nga aramiden.

No kiddawen ti sumagmamano a grupo dagiti Santo iti Ud-udina nga Aldaw tapno agsao isuna kadakuada, aramidenna daytoy. Saan a napateg no 10 a tattao wenno 50 wenno kasano man ti bannogna. Imburayna ti pammaneknekna maipapan iti Ama, ti Anak, ken ti Espiritu Santo ken dagiti propeta no iparikna ti Espiritu kenkuana nga aramidenna daytoy.

Dagiti kangatuan a pagrebbenganna iti Simbaan ket iti Bonneville Utah Stake high council, a nagparutanna iti ruot iti bangkag ti stake, ken nangisuro isuna iti klase iti Domingo. Iti panaglabas dagiti tawen, no kasapulanna daytoy, adda idiay ti Espiritu Santo a kadkaduana.

Nakatakderak iti abay ni tatangko iti maysa a siled ti ospital. Nakaidda ni nanangko, ti asawana iti uneg ti 41 a tawen. Binantayanmi isuna iti uneg ti adu nga oras. Nakitami nga umaw-awanen ti saem manipud iti rupana. Dagiti ramay ti imana, a sigud a nakagemgem, ket nakaukraden. Nakababa dagiti takiagna iti sikiganna.

Ti sakit a gapuanan ti kanser iti uneg ti adu a tawen ket aggibusen. Nakitak ti talna iti rupana. Immanges iti babassit, kalpasanna immanangsab, ket kalpasanna nagidda a sitatalna. Nakatakderkami idiay nga agur-uray a makita no umanges isuna iti maminsan pay.

Kamaudiananna, kinuna ni Tatang a siuulimek, “Nagawiden ti maysa a bassit nga ubing a babai.”

Saan a nagsangit ni tatang. Dayta ket gapu ta nabayagen idi a nalawag nga impaawat ti Espiritu Santo kenkuana no asino ni nanang, sadino ti naggapuanna, ken no ania ti nagbalinanna, ken sadino ti papananna. Adu a gundaway a nagpaneknek ti Espiritu kenkuana maipapan iti managayat a Nailangitan nga Ama, maipapan iti Mangisalakan a nangparmek iti ipapatay, ken maipapan iti kinapudno ti pannakailantip iti templo nga imburayna iti asawana ken pamiliana.

Nabayagen idi nga impanamnama ti Espiritu kenkuana a ti kinasingpet ken pammatina ti nangpaikari kenkuana iti panagsublina iti nailangitan a pagtaenganna a pakalaglagipanto kenkuana a maysa a nasayaat nga anak ti kari ken mapasangbay iti pagtaengan nga addaan iti pammadayaw.

Para ken ni tatangko, ad-adda pay dayta ngem iti namnama. Inaramid ti Espiritu Santo a pumudno daytoy para kenkuana.

Ita, mabalin nga adda agkuna a dagiti balikas ken pampanunotena maipapan iti nailangitan a pagtaenganna ket maysa laeng nga arapaap, a panagkuna ti maysa nga asawa iti oras ti panagladingitna gapu iti ipapatay ti asawana. Ngem ammona a ti agnanayon a kinapudno laeng ti wagas a pakaammuanyo iti daytoy.

Maysa isuna a sientista nga agsapsapul iti kinapudno maipapan iti langa ti lubong iti manipud pay idi addan isuna iti husto nga edad. Inusarna a naimbag dagiti ramit ti siensia tapno idaydayaw isuna dagiti kapatadana iti amin a paset ti lubong. Kaaduan dagiti inaramidna iti chemistry ket naggapu iti molecule a nailadawanna iti panunotna nga aggargaraw ket kalpasanna pinatalgedanna daytoy babaen kadagiti eksperimento iti maysa a laboratorio.

Ngem sabali a wagas ti inusarna iti panangtakuatna kadagiti kinapudno a napateg unay kenkuana ken iti tunggal maysa kadatayo. Babaen laeng iti Espiritu Santo a makitatayo dagiti tao ken paspasamak a kas iti panangkita ti Dios kadakuada.

Nagtultuloy dayta a sagut iti ospital kalpasan ti ipapatay ti asawana. Inummongmi dagiti gargaret ni nanangko tapno yawid. Nagsardeng ni tatang tapno agyaman iti tunggal nars ken doktor a masabatmi iti iruruarmi a mapan iti kotse. Malagipko a nariknak, nga addaan pannakasuron, a nasken a pumanawkami tapno dakami laeng iti panagladingitmi.

Maamirisko itan a nakitana dagiti banag a ti laeng Espiritu Santo ti makaipakita kenkuana. Nakitana dagita a tao kas anghel nga imbaon ti Dios a mangaywan iti patpatgenna. Mabalin nga imbilangda dagiti bagida kas propesional nga agay-aywan iti salun-at ken mangngagas, ngem agyamyaman ni Tatang kadakuada iti serbisioda iti nagan ti Mangisalakan.

Nagtultuloy ti impluensia ti Espiritu Santo kenkuana agingga iti isasapengpetmi iti pagtaengan dagiti nagannak kaniak. Nagsaritakami iti sumagmamano a minuto iti salas. Nagpakada ni Tatang a mapan iti siledna iti asideg.

Kalpasan ti sumagmamano a minuto, nagsubli isuna iti salas. Naragsak nga umis-isem isuna. Immasideg kadakami ket kinunana a siuulimek, “Madanaganak amangan ta sumangpet ni Mildred nga agmaymaysa iti lubong ti espiritu. Napanunotko amangan ta mapukaw isuna iti kaaduan dagiti tao.”

Kalpasanna siraragsak a kinunana, “Nagkararagak ita laeng. Ammok a nasayaat ti kasasaad ni Mildred. Adda idiay ni nanangko a sumabat kenkuana.”

Malagipko nga umis-isemak idi kinunana dayta, a pampanunotek ni lelangko, dagiti babassit a luppona nga agtartaray, nga agdardaras a magna iti kaaduan dagiti tao tapno masiguradona nga adda isuna sadiay a mangsabat ken mangarakup iti manugangna a babai iti isasangpet daytoy.

Ita, maysa kadagiti rason no apay kiniddaw ken inawat ni tatang dayta a pannakaliwliwa ket gapu ta kanayon a nagkararag isuna a sipapammati manipud pay kinaubingna. Kanayon idi a makaawat isuna kadagiti sungbat iti pusona tapno mangted iti liwliwa ken panangiturong. Mainayon iti nakaugaliannan a panagkararag, ammona dagiti nasantuan a kasuratan ken dagiti balikas dagiti sibibiag a propeta. Isu a mailasinna dagiti pamiliar nga arasaas ti Espiritu, a mabalin a nariknayo met ita.

Ti panangkadkadua ti Espiritu ket saan laeng a nagliwliwa ken nangtarabay kenkuana. Namagbalbaliw daytoy kenkuana babaen ti Pannubbot ni Jesucristo. No awatentayo dayta a kari a makaduanatayo a kanayon ti Espiritu, maikkannatayo ti Mangisalakan iti pangpatarnaw a kasapulan para iti agnanayon a biag, ti kaindaklan iti amin a sagut ti Dios (kitaen iti DkK 14:7

Malagipyo dagiti balikas ti Mangisalakan: “Ita daytoy ti bilin: Agbabawikayo, amin nga adda iti daga, ket umaykayo kaniak ket mabuniagankayo iti naganko, tapno mapasantokayo babaen ti panangawat ti Espiritu Santo, tapno makapagtakderkayo nga awan mulitna iti sangok iti ud-udina nga aldaw” (3 Nephi 27:20).

Karagpin dagita a bilin daytoy a kari manipud iti Apo:

“Ket ita, pudno, pudno, kunak kenka, itdem ti panagtalekmo iti dayta nga Espiritu a mangidalan iti panagaramid iti nasayaat—wen, nga agaramid iti nainkalintegan, a magna a sipapakumbaba, a mangukom a sililinteg; ket daytoy ti Espirituk.

“Pudno, pudno, kunak kenka, itdekto kenka ti Espirituk, a mangpalawag iti panunotmo, a mangpunno iti kararuam iti rag-o” (DkK 11:12–13).

Paneknekak kadakayo a sibibiag ti Dios Ama, nga idadauluan ti nangungar a ni Jesucristo ti Simbaanna, nga ig-iggaman ni Presidente Thomas S. Monson ti amin a tulbek ti priesthood, ken ti paltiing babaen ti Espiritu Santo ti mangtartarabay ken mangtultulong iti Ti Simbaan ni Jesucristro dagiti Santo iti Ud-udina nga Aldaw ken dagiti napakumbaba a miembrro daytoy.

Paneknekak pay kadakayo a dagitoy nasayaat a lallaki a nagsarsarita kadatayo ita nga aldaw kas saksi ni Apo Jesucristo, kas miembro ti Korum dagiti Sangapulo-ket-dua nga Apostol, ket inawagan ti Dios. Ammok nga inturong ti Espiritu ni Presidente Monson tapno mangawag kadakuada. Ken no dumngegkayo kadakuada ken dagiti pammaneknekda, patalgedan ti Espiritu Santo kadakayo no ania ti isaok ita kadakayo. Isuda dagiti inawagan ti Dios. Kanunongak ida ken ay-ayatek ida ken ammok nga ay-ayaten ti Dios ida ken tulongannanto ida iti panagserbida. Ket aramidek daytoy iti nagan ni Apo Jesucristo, amen.