Pīsope Dean M. Davies

Naʻe pehē ʻe Pīsope Tiini M. Teivisi, “Naʻá ku fiefia maʻu pē ʻi he fakaʻofoʻofa taha hono kosi e musie homau ʻapí ʻi homau kaungāʻapí, pea naʻá ku ako ai ha lēsoni mahuʻinga: ʻe lava ke ʻi ai ha faikehekehe lahi ʻi he meimei meʻa kotoa pē ʻoku tau faí ʻi heʻetau feinga lahi angé.” Kuo hoko e feinga lahi angé ko ha tuʻunga moʻui ʻe hokohoko ʻene tokoniʻi lelei ia ʻi heʻene hoko ko e Tokoni ʻUluaki ʻi he Kau Pīsopeliki Pulé.

Naʻe hoko ʻa Pīsope Teivisi ko e Tokoni Ua kia Pīsope Keuli E. Sitīvenisoni, ʻa ia naʻe hikinimaʻi ko e mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he ʻaho 3 ʻo ʻOkatopa 2015.

Naʻe fāʻeleʻi ʻa Tiini Mailoni Teivisi ʻi Sōleki Siti, ʻIutā, USA, ʻi he 1951. Naʻá ne tupu hake ko ha taha ʻo ha fānau ʻe toko valu. ʻOkú ne fakahaaʻi ʻene houngaʻia ki ha ongomātuʻa naʻe ʻikai ngata pē ʻi heʻena ʻofa mo lehilehiʻi ʻena fānaú ka naʻá na toe tokoniʻi foki kinautolu ke nau houngaʻia ʻi he ngaahi tāpuaki ʻo e ngāué. Naʻá ne mali mo Taiala Sēmisi ʻi he Temipale Sōlekí, ʻi he 1973. ʻOku ʻi ai haʻana fānau ʻe toko 5 mo e makapuna ʻe toko 14.

Naʻe ako foki ʻe Pīsope Teivisi ha lēsoni mahuʻinga lolotonga ʻene nofo ʻi Seni Felenisisikou, Kalefōnia, USA, ʻi he 1989. Naʻá ne mamata tonu ki he maumau lahi e ngaahi nofoʻanga naʻe langa taʻe ʻi ai hano fakavaʻe paú lolotonga ha mofuike. “ʻI heʻeku fakakaukauloto ki he meʻa ne hoko he ʻaho ko iá, ʻokú ne toe fakapapauʻi mai ki hoku ʻatamaí mo e lotó kuo pau ke tau langa ʻi ha fakavaʻe pau ke matuʻuaki e ngaahi ʻahiʻahi, mofuiké mo e fakaʻauha ʻo e moʻuí … ʻa e mahuʻinga ʻo hono langa ʻetau moʻuí ʻi ha fakavaʻe pau, mo fakavaʻe ʻia Sīsū Kalaisí” (“Ko ha Fakavaʻe Pau,” Liahona, Mē 2013, 9).

Kuo ngāue ʻa Pīsope Tēvisi ki he Siasí talu mei Siulai ʻo e 1995. Naʻá ne hoko kimuí ni mai ko e talēkita pule ʻo e Potungāue Langa Makehé, mo e fatongia ki he ngaahi kelekele ʻoku ʻi ai hano taumuʻa makehé, palani ʻo e temipalé, mo e langa temipalé.

Kimuʻa pea ngāue ki he Siasí, naʻe ngāue ʻa Pīsope Teivisi ki he High Industries, Inc., ʻi Lenikesitā, Penisilivēnia, mo e Bechtel Investments, Inc., ʻo Seni Felenisisikou, Kalefōnia. Naʻe maʻu ha mataʻitohi BA ʻi he ʻekonomika fakangoué mei he ʻUnivēsiti Pilikihami ʻIongí pea fakakakato ha ngaahi polokalama ako māʻolunga ange ʻi he ʻUnivēsiti Sitenifōtí mo e ʻUnivēsiti Tokelau-Hihifó.

Kuo hoko ʻa Pīsope Teivisi ko e palesiteni ʻo e Misiona Pueto Liko Seni Suaní, tokoni palesiteni fakamisiona, palesiteni fakasiteiki, tokoni palesiteni fakasiteiki, sekelitali pule fakasiteiki, aleaʻanga māʻolunga, kau atu ki ha kau pīsopeliki, pea ko ha faifekau taimi kakato ʻi he Misiona ʻUlukuai/Palakuaí.