Elder Gerrit W. Gong

E manatua e Elder Gerrit W. Gong, faatoa valaauina e auauna atu i le Au Peresitene o Fitugafulu, se musumusuga na oo atu ia te ia a o auauna atu o se faifeautalai i Taiuani.

Na oo mai se tagata sailiili i le sauniga faamanatuga. “Sa ou lagona le musuia e tusi atu ia te ia se tusi puupuu i le faailo Morse lea na tau atu ai se faamatalaga faapenei, ‘Susū maia i le sauniga faamanatuga. Fiafia lava e vaai ia te oe iinei!’”

O le tagata sailiili o se tagata e faigaluega i le leitio, ma sa fiafia lava e maua le savali. “Sa ou maofa i le mafai e se mea sa ou aoaoina i le tausaga na muamua atu ona fesoasoani ia te au … o le aapa atu i se tagata i se auala faapitoa,” o le tala lea a Elder Gong.

O le aoaoina ma le aapa atu i isi o le auala lea o le olaga o Elder Gong talu mai lona laitiiti, ina ua ia aoaoina le faailo Morse faavaomalo i le avea ai ma se Tama Sikauti. I le 1977 sa ia maua ai se faailoga o le tagata malaga o faatufugaga i Suesuega o le Gagana Asia ma Suesuega Faalauaitele mai le Iunivesite o Polika Iaga, i le 1979 na ia mauaina se faailoga o le matua o faiva i le filosofia, ma i le 1981 sa ia maua ai se PhD i sootaga faavaomalo mai le Iunivesite o Oxford.

Sa auauna atu Elder Gong i le tele o valaauga o le Ekalesia, e aofia ai le fautua maualuga, taitai vaega a faitaulaga sili, peresitene o le Aoga Sa o le siteki, faiaoga seminare, epikopo, peresitene o le misiona a le siteki, peresitene o le siteki, ma Fitugafulu Eria. I le taimi o lona valaauga o se Pulega Aoao Fitugafulu i le 2010, sa ia auauna atu o se uso o le Korama Lona Lima o Fitugafulu i le Eria o Iuta i Saute.

I le 1985 sa auauna atu Elder Gong o se fesoasoani faapitoa i le failautusi o le setete o le U.S. State Department, ma i le 1987 sa ia galue o se fesoasoani faapitoa i le amapasa o le I.S. i Beijing, Saina. Mai le 1989 i le 2001, sa ia auauna atu i ni tofiga e tele i le Nofoaga Autu mo Strategic ma Suesuega Faavaomalo i Uosigitone, D.C.

Sa soifua mai Gerrit W. Gong i le Aai o Redwood, Kalefonia, ISA, i le aso 23 o Tesema, 1953. O i laua ma lona faletua, o Susan Lindsay Gong, o ni matua o se fanau e toafa ma fanau a fanau e toatolu. Sa malaga mai matua matutua o Elder Gong i le Iunaite Setete mai Saina. Ua ia talaina lona gafa e oo atu i augatupulaga e 33 i le Uluai Dragon Gong, na soifua i le 837 t.a. i Saina i saute i le taimi o le puleaga a Tang.