Faapaiaina le Nofoaga na Toefuatai ai le Perisitua

I le aso 19 o Setema, 2015, sa pulefaamalumalu ai Peresitene Russell M. Nelson, o le Peresitene o le Korama a Aposetolo e Toasefululua, i le faapaiaga o le nofoaga i Penisilevania, ISA, lea sa maua ai e Iosefa Samita ma Oliva Kaotui le Perisitua Arona mai ia Ioane le Papatiso. I le vaitau o le 1820 sa lauiloa ai le nofoaga ia Heremoni, Penisilevania, ma o le tele o mea na tutupu i le talafaasolopito anamua o le Ekalesia toefuataiina na tutupu ai iina:

• O le feiloaiga a Iosefa Samita ma Emma Hale, o le la faamasaniga, ma lo la uluai olaga faaleulugalii.

• O le taunuu atu o Oliva Kaotui e fesoasoani i le avea ai ma se tusiupu i le faaliliuga o le Tusi a Mamona.

• O le faaliliuga o le tele o le Tusi a Mamona.

• O le toefuataiga o le Perisitua Arona (e ui e lei iloa lava le nofoaga tonu) ma le Perisitua Mekisateko.

• O uluai papatisoga na faatinoina e ala i le pule o le perisitua i ona po nei.

• O faaaliga na maua ua avea ma vaega 15 i le Mataupu Faavae ma Feagaiga ma se vaega o le Penina Tau Tele.

O loo aofia ai i le nofoaga ua uma ona toefaafouina se maota autu mo tagata asiasi mai, faatasi ai ma se faletapuai mo se paranesi i le lotoifale; o fale o Iosefa ma Ema, matua o Ema, o Isaako ma Elisapeta Hale ia na toe fausiaina; ma le auala i le nofoaga i le Vaitafe o Susikuana lea e talitonu na papatiso ai Iosefa ma Oliva.

“Na saunia e Heremoni mo Iosefa se nofoaga filemu ma le saogalemu faaleagaga, na mafai ai ona ia taulai atu i le faaliliuga o le Tusi a Mamona,” o le tala lea a Peresitene Nelson. “E ala mai i lenei vaitau, sa aoaoina ai e le Alii Iosefa i lana matafaioi paia o se perofeta, tagatavaai, ma talifaaaliga.”