Usa ka Gasa sa Kinabuhi ug Gugma

Imahe

Photo of a small gift box cradled in a woman's hands.

Paghulagway sa litrato pinaagi ni John Luke; gilitratohan ni Maridav/iStock/Thinkstock

Ang akong Tiyo Ed sa kanunay adunay makatakod nga paghigugma sa kinabuhi. Subo lang kay, aduna usab siyay depektuso nga parisan sa kidney. Sulod sa daghang katuigan, nalugwayan ang kinabuhi ni Ed gikan sa kidney failure tungod sa kanunayng pagpa-dialysis. Ang mga pagpatambal sakit ug kanunay. Sa matag patambal makaluya niya hangtud moabut ang sunod nga pagpatambal, ug pag-abut sa tinglarag sa 1995, ingon og nawad-an na gyud siya sa kalagsik sa panglawas.

Sa katapusan miingon ang doktor ngadto kang Ed nga kon dili siya makakuha og bag-o nga kidney sa dili madugay, ang iyang lawas dili na makaagwanta. Bisan og usa ra ka kidney ang gikinahanglan aron mapatunhay ang kinabuhi, dili gusto ni Ed nga mohangyo ni bisan kinsa nga modonar sa ilahang kidney tungod sa natural nga risgo sa bisan unsang pag-opera. Apan walay laing kapilian. Pipila sa suod nga mga higala ug mga sakop sa pamilya ang gitestingan aron makita kon ang ilang mga kidney compatible ba. Usa lang ang nakaplagan nga miangay: ang magulang ni Ed nga babaye, si Dottie—ang akong inahan.

Niadtong Disyembre 7, daghang mga higala ug pamilya ni Ed miapil sa pagpuasa ug pag-ampo alang kaniya ug kang Dottie. Ang mga surgeon kinsa mihimo sa operasyon managsoon nga kaluha. Ang makapadasig pa, usa nila midonar og kidney ngadto sa iyang kaluha. Si Ed ug ang akong inahan nakadayeg sa pagkahibalo nga sa matag operasyon, kining duha ka mga doktor mihimo sa tanan nilang mahimo ug dayon miyukbo sa ilang mga ulo ug gisalig ang resulta sa operasyon ngadto sa mga kamot sa Ginoo.

Sa adlaw sa operasyon, ang usa ka doktor mitangtang sa usa ka kidney sa akong inahan. Samtang iyang gitahi og balik, ang kaluha nga magulang mainampingon nga mitaud sa gidonar nga kidney ngadto sa tiyan ni Ed.

Ang operasyon nagmalampuson, apan kinahanglan maghulat kon ang lawas ni Ed modawat ba sa bag-ong kidney. Ang antibodies sa iyang immune system gipugngan aron mapalambo ang iyang mga tsansa, mao nga kinahanglan ilain si Ed diha sa intensive care aron mapanalipdan siya gikan sa mga kagaw. Bisan nakagawas na siya, gikinahanglan pa nga magpabilin siya nga ilain gikan ni bisan kinsa gawas sa iyang pamilya. Sa Bisperas sa Pasko, hinoon, si Ed nakadawat og espesyal nga pagtugot nga makatambong sa kasaulugan sa tinuig nga Bisperas sa Pasko sa akong mga apohan.

Nagsul-ob og face mask, si Ed misulod sa pultahan, padulong diretso ni Dottie, ug migakos kaniya og maayo. Samtang sila naggaksanay sa usag usa, walay usa diha sa balay nga wala makahilak. Nabati gyud sa tanan ang gugma nga naggikan kanila. Usa ka igsoong babaye ang miantus aron mahatag sa iyang igsoong lalaki ang gasa sa kinabuhi. Usa kadto ka gasa sa gugma, usa ka gasa sa pagsakripisyo, usa ka gasa nga dili niya mahatag sa iyang kaugalingon.

Samtang nagtan-aw ko nila, uban sa mga luha nga nagdagayday sa akong nawong, kini akong nahunahunaan: ingon unya niini ang personal nga pagsugat sa Manluluwas. Gibuhat Niya ang usa ka butang alang kanato nga kita dili makahimo sa pagbuhat sa atong mga kaugalingon. Siya lamang, nga balaan, ang makahimo sa paglahutay sa usa ka sakripisyo nga dako kaayo nga ang balaod sa kaangayan matagbaw. Ug Siya lamang, nga usa ka hingpit, ang takus nga moula alang sa mga sala sa tanang katawhan aron ang mga balaod sa kalooy mahimo nga ipadangat ngadto sa tanan kinsa modawat Kaniya isip ilang Manluluwas.

Samtang akong gitagamtam kini nga mga panabut, ako misaad og usab sa akong kaugalingon nga mobuhat sa tanan sa pagpakita sa akong pasalamat alang sa Manluluwas ug sa Iyang sakripisyo. Maningkamot ko sa pagsunod sa akong kinabuhi isip usa ka disipulo aron sa umaabut nga adlaw ako mahimong takus nga mosulod sa Iyang presensya, mogakos Kaniya, ug personal nga magpasalamat Kaniya alang sa paghigugma kanako aron mahimo ang ingon nga sakripisyo.