“Gibati nako nga dili ako angayan nga mahimong presidente sa klase sa Young Women. Unsaon nako nga mahimong mas maayo nga lider?”

Isip presidente sa usa ka klase, ako usab mibati nga dili angay. Apan importante nga maningkamot sa paghimo sa mga batan-ong babaye nga mobati nga gihigugma ug giapil. Pagmahimo nga masuportahon nga higala ug paminaw sa inyong mga magtatambag kon mohimo og mga desisyon. Paghimo og matarung nga ehemplo ug paningkamot sa pagsunod sa mga mithi sa Young Women, apan ayaw paabuta ang inyong kaugalingon nga mahimong hingpit. Ang Langitnong Amahan naglaum lamang nga kamo mosulay. Kon kamo motawag Kaniya, Siya mohatag kaninyo sa kalig-on ug direksyon nga inyong gikinahanglan.

Akong gibati ang sama nga butang, tungod kay sa una ako ang presidente sa klase sa Mia Maid. Nakahinumdom gihapon ko sa pagbati dihang ako misulod sa opisina sa bishop alang sa interbyu. Makabalidad unta ko, apan nasayud ko nga kini dili usa ka buluhaton gikan sa akong bishop—kini usa ka calling gikan sa Dios. Ang Langitnong Amahan motabang kanato sa pagtuman sa atong mga calling kon kita andam nga motugyan sa atong mga kaugalingon ngadto Kaniya ug magmapainubsanon.

Aron mahimong mas maayo nga lider, kinahanglang mohigugma gayud kamo niadtong inyong giserbisyuhan. Busa, ang paghikalimot sa bisan unsang kaligutgot ug pagpasaylo gikinahanglan. Makahimo kamo sa pag-ampo aron makakita sa ilang bili sama sa pagtan-aw sa Dios kanila. Pag-ampo nga mobati sa Iyang gugma alang kaninyo ingon man usab alang sa inyong mga sakop sa klase. Ako nasayud gikan sa kasinatian nga ang Personal nga Kauswagan makatabang kaninyo sa pagpalambo sa mga kinaiya ug mga mithi nga gikinahanglan sa pagtuman sa inyong calling. Ang Dios mohatag kaninyo og gahum nga inyong gikinahanglan kon kamo mangayo niana nga tabang.

Kamo mahimong usa ka mas maayo nga lider pinaagi sa paggamit sa mga kinaiya nga gusto ninyong maangkon. Pag-ampo alang sa Espiritu nga magauban kaninyo kon kamo mohimo og mga desisyon. Pag-ampo aron makahatag og pagtagad sa mga panginahanglan sa batan-ong mga babaye. Daghan pa kamo og mabuhat aron mahimong mas maayo nga lider, apan akong nakita nga ang unang lakang mao kanunay ang pagtuo nga makahimo kamo.

Sa dihang bag-o kong natawag isip presidente sa korum sa mga deacon, dili ko sigurado kon unsaon sa pagpalambo sa akong espiritwalidad. Misugod ko sa paghimo sa family history, kasagaran sa matag Dominggo. Kanunay kong moadto sa templo matag Sabado sa buntag. Ang akong tumong mao ang pagdala og mga ngalan sa lalaki alang sa bunyag ug kumpirmasyon kutob sa akong mahimo. Human ako moadto sa templo matag semana, ako mobati nga mas espirituhanon, ug niana nga paagi ako mas makatabang sa akong korum.

Kon ang Ginoo mihatag og calling kaninyo, kini tungod kay adunay usa ka buhat nga inyong mahimo. Kita kinahanglan nga mangutana sa Dios, sama sa mabasa sa Santiago 1:5. Pinaagi sa gahum sa Espiritu Santo, ipadayag kanato unsay angay natong buhaton (tan-awa sa 2 Nephi 32:5). Uban sa Iyang tabang, kita mahimong “masayud sa kamatuoran sa tanan nga mga butang” (Moroni 10:5). Dayon kinahanglan kita nga mosunod sa inpirasyon nga atong madawat. Ako adunay lawom nga kombiksyon nga tungod kay ang Ginoo maoy naggiya kanato, kitang tanan mahimong makapalambo sa atong mga calling.

Pagpahigayon og regular nga mga miting uban sa inyong kapangulohan ug pagplano og makapalig-on nga mga kalihokan nga makatubag sa mga panginahanglan ug mga interes sa mga babaye. Kon ang usa ka batan-ong babaye diha sa inyong klase dili motambong, ipahibalo kaniya nga kamo gimingaw kaniya. Usa sa mga kasulatan nga nakatabang kanako mao ang Mosiah 18:9.