Irudwir Dwudwoodwo Begyagegya Ber mu

Ɔnnkyɛree nna menye me yer Harriet wɔ wimuhɛn gyinabea a nna yɛrohwɛ wimuhɛn ahorow nwanwa a worudwir daadze. Da no nna mframa robɔ, na mframa dzenden hwee wimuhɛn no a ɔreba no, ma ɔmaa kor biara dandan noho ahopopo mu ber a nna ɔresian no.

Ber a nna yɛrohwɛ ɔdomankoma nye efir aperdzi no, mekaa mankasa me wimuhɛnkã ho ntsetsee na nkyerɛkyerɛ no a musũaa no wɔ hɔ no—na ekyir no medze kyerɛkyerɛɛ wimuhɛnkafo binom a nna wɔwɔ ntsetsee ase no.

Nna dza mekã kyerɛ hɔn nye dɛ, “Begyabegya mber no, mma mmper nnkyerɛ wimuhɛn no dza ɔnyɛ.” “Taa tsin komm, mma woho mper wo. Ma w’enyiwa ntsim wimuhɛn gyinabea sitiitsi no ne finimfin. Sɛ eman fi wo kwan a ipɛ dze esian no a, amonmu ara, tsen no ahwɛyie mu. Nya awerɛhyɛmu wɔ dza wo wimuhɛn no botum ayɛ. Kɔdo kã wimuhɛn no kɛpem ber a begyabegyayɛ no bɔkɔ famu.”

Wimuhɛnkafo a wɔawea no tse ase dɛ nnyɛ daa na dza ɔkɔ do wɔ hɔnho aporow no wobotum ahyɛ do. Wonnkotum ama begyabegyayɛ no egyaa. Wonnkotum ama nsu tɔree anaa esukwankyɛba no ayew. Wonnkotum ayɛ ma mframa no egyaa dɛ ɔrobɔ anaa wɔasesã no kwan.

Mbom wɔtse ase so dɛ ɔyɛ mfomdo dɛ ibosuro begyabegya anaa mframa dzendzen—na tsitsir ara dɛ ibɛma no ho suro akyekyer wo. Kwan a ibotum edwir daadze dwudwoodwo, ber a ndzɛmba nnyɛ mbrɛ ɔsɛ no, nye dɛ ibedzi kwan tsen no do yie ara dɛ mbrɛ ibotum.

Ber a mohwɛɛ wimuhɛn no nkorkor a wɔabɛn hɔn famusi no, mekaa mbra no a musũae me mfe pii mu dɛ wimuhɛnkanyi no, modween ho dɛ sɛ ana adzesuadze bi nnyi iyi mu mma hɛn wɔ daadaa abrabɔ mu a.

Nnyɛ daa na yebotum yɛahyɛ ehum a yenya no wɔ hɛn abrabɔ mu do. Ɔtɔfabi a ndzɛmba ronnkɔ ara dɛ mbrɛ yɛpɛ no. Abawgura, ekyingye, suro, awerɛhow anaa atsetsee ho begyabegyayɛ botum ahaw hɛn.

Dɛm mber mu no, ɔyɛ mberɛw dɛ ndzɛmba horow a ɔronnkɔ yie no bɔbor hɛn do ma wɔama hɛn adwendwen etsim hɛn haw horow no do. Nsɔhwɛ no nye dɛ yebetsim ɔhaw no a ɔda hɛn do akyɛn dɛ yebetsim wɔ Agyenkwa no na hɛn nokwar ho dasegye no do.

Naaso nnyɛ ɔno nye kwan pa no a yɛdze boduadua hɛn abrabɔ ne taferbanyinmbɔ mu no.

Tse dɛ mbrɛ wimuhɛnkanyi a ɔawea n’enyi nntsim ehum do no na mbom ɔdze tsim wimuhɛn gyinabea sitiitsi ne finimfin na bea pɔtsee a obesi famu no, dɛmara so na ɔwɔ dɛ yɛdze hɛn enyi tsim hɛn gyedzi ne fapem—hɛn Agyenkwa, N’asɛmpa, na hɛn Ɔsor Egya Ne nhyehyɛɛ—na hɛn botae ne tsirmpɔw do—dɛ yɛbɛsan dwudwoodwo akɔ hɛn ɔsor tsenabea. Ɔwɔ dɛ yɛtwer Nyankopɔn na yɛma hɛn mbɔdzembɔ tsim wɔ osũanyiyɛ ananmɔn kwan no do. Hɛn enyiwa, akoma na hɛn adwen wɔdɛ otsim abrabɔ kwan a yenyim no do.

Yɛrekyerɛ hɛn gyedzi na awerɛhyɛmu wɔ Ɔsor Egya mu ber a enyigye mu ara yerisie Ne mbrasɛm no, dze enyigye na enyimnyam bɛbrɛ hɛn. Na sɛ yɛfa anamɔn kwan no do a, yebodua begyabegyayɛ biara mu a—mbrɛ ne dzendzen si tse biara no—na yɛasan akɔ hɛn ɔsor fie dwudwoodwo.

Sɛ wimu a etwa hɛnho ehyia no yɛ kann anaa efua ahyɛ tumm a, dɛ yɛyɛ Jesus Christ esũafo no, yedzi kan hwehwɛ Ɔsor ahenman na ne tseneneeyɛ, a yenyim dɛ sɛ yɛyɛ a ewiei no wɔdze dza yehia biara no bɛma hɛn (hwɛ Matthew 6:33).

Abrabɔ mu adzesuadze tsitsir bɛn nyi!

Mber dodow a yɛhaw wɔ hɛn nkõdzen, hɛn aperdzi, hɛn ekyingye, na hɛn suro ho no, mber dodow a ndzɛmba botum ayɛ dzen mbordo a. Naaso mber dodow a yetsim wɔ hɛn ɔsor tsenabea a odzi ewiei na yɛdze enyigye dzi osũanyi n’anamɔn kwan no do no—yɛrodɔ Nyankopɔn, yɛrosom hɛn nyɛnko no—mber dodow a yeboduadua ɔhaw na begyabegya mber no konyimdzi mu.

Anyɛnkofo adɔfo, mbrɛ hɛn abrabɔ mu ehum ne dzen si huw bɔ hɛnho aporow biara no, Jesus Christ N’asɛmpa no bɛma hɛn kwan tsen daa a ɔnye hɛn bodwir Ɔsor Egya N’ahenman mu no dwudwoodwo.