Naan in Katak an Kōrā, M̧aaj 2016
Kar kōm̧anm̧an ilo Nememein wōt Anij
Kanooj jar ilo am̧ ekkatak kōn katak in im pukōt n̄an jeļā ta eo kwonaaj kwaļo̧k. Ekōjkan am̧ meļeļe “Baam̧le Eo: Juon Naan in Kean̄ n̄an Laļ in” kōļapļo̧k tōmak ilo Anij im kōjeraam̧m̧an ro kwoj mije jān jerbal in loļo̧k an kōrā ro? N̄an meļeļe ko reļļapļo̧k, etal n̄an reliefsociety.lds.org.
Tōmak, Baam̧le, Deeor
“Im Anij ear ba, Jen kōm̧anm̧an armej ilo wāweed im āinwōt kōj. …
“Im Anij ear kōm̧anm̧an armej ilo wāween wōt E; m̧aan im kōrā Ear kōm̧anm̧an” (Jenesis 1:26–27).
Anij ej Jemedwōj Ilan̄, im E eaar kōm̧anm̧an kōj ilo nememein wōt E. Jān m̧ool in, Būreejtōn Thomas S. Monson ekar ba: “Anij ej Jemād ewōr lo̧jiln̄in eo ej ron̄jake jar ko ad. Ewōr mejān eo ej loe jerbal ko ad. E ewōr lo̧n̄iin eo ej kōnono n̄an kōj. E ewōr būruwōn eo ej en̄jake tūriam̧o̧ im iakwe. E em̧ool. E ej mour. Kōj jej ajri ro nejin Ekar kōm̧anm̧ani. Jej āinwōt E im E ej āinwōt kōj.”1
“Armej ro Rekwojarjar ilo Raan-ko Āliktata rej kalimjek aolep armej āinwōt ajri ro nejin Anij ilo likio; rej kile aolep armej ro rej jebar jene, piktokin, im ewōr jibadbad ippāer.”2 kajjojo ej “juon ļaddik im leddik in jetōb ro nejin jemedwōj ilan̄ im jinedwōj ilan̄.”3
“[Rikanaan Eo] Josep Smith ekar barāinwōt katak bwe Anij ekōņaan bwe ajri ro Nejin ren bok ejja kain waween in Ej bōke.”4 Āinwōt an Anij ba, “Bwe lo, en̄in ej jerbal eo Aō im aiboojoj eo Aō—n̄an kakūrm̧ool jab wabanban im mour indeeo an armej” (Moses 1:39).
Bar Jet Eoon Ko
Jān Jeje ko Rekwojarjar
Ļeo jein Jared ilo bok in Momon ekar pukōt wāween an kōmeram baaj ko ralitōk ko kar kōm̧anm̧ani n̄an bōkļo̧k Rijared ro kijoone ioon dān n̄an ānen kallim̧ur eo. E “eaar kaūnļo̧k jān juon ejm̧aan jon̄ouljiljino dekā” im jar bwe Anij enaaj “unūr dekā kein” kōn jānit in Pein “bwe ren maron̄ romakļo̧k ilo maroklep.” Im Anij “eaar erļo̧ke pein im un̄ir dekā ko juon ilo̧k juon.” Im rōn̄ōl nuknuk eo kar bōkļo̧k jān mejān ļeo jein Jared, im “eaar lo akkin pein Irooj; im ekar āinwōt akkin pein juon armej. …
“Im Irooj eaar ba n̄an e: Kwoj tōmak ke naan ko Inaaj kōnono?
“Im eaar uwaak: Aaet, Irooj.”
Im “Irooj ekar kwaļo̧k e make n̄an [ļeo jein Jared]” im ba, “kwōj lo ke bwe kwe kar kōm̧anm̧an eok iļo̧kan nememeō? Aaet, em̧ool aolep armej kar kōm̧anm̧an ilo jinoin ilo̧kan nemāmeō make.” Lale Ether 3:1–17
© 2016 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an Visiting Teaching Message, March 2016. Marshallese. 12863 874
Ļōmņak kōn Menin
Ewi waween ad jeļā ke aolep armej rej āinwōt nememein Anij im ej jipan̄ kōj ilo ad iaio ippān doon?