“Katak kōn Iō”

Jisōs eaar kwaļo̧k kōn m̧ool eo etinwadik im kajoor āinwōt an rekoot ilo bok in Matu. Alkin E im Rikaļoor ro an kar walaltak jān Toļ Transfiguration, raar bōjrak ilo Galilee innām etal n̄an Capernaum. Ke rej pād ijene raar kajitikin Jisōs, im ba:

“Wōn eo eļaptata ilo aelōn̄ in lan̄?

“Im Jisōs ej kūrtok juon ajri e dik n̄an Ippān, im kajutak e eoļōpeir,

“Im ba, Em̧ool Ij ba n̄an kom̧, Eļan̄n̄e kom̧ jab oktak, im erom āinwōt ajri re dik, kom̧ jāmin deļo̧n̄ ilo aelōn̄ in lan̄.”⁵

Ilo Kabun̄ in, kōttōpar eo ej n̄an katakin gospel eo, ejjab n̄an leļo̧k meļeļe ko n̄an ļōmņak ko an ajri ro nejin Anij, men̄e ilo m̧weo, ilo ruum̧ in katak ko, ak ilo ijo jej mijenede ie. Ejjab n̄an kwaļo̧k ewi jon̄an an jinen im jemān, rūkaki, ak mijenede ro jeļā. Ak ej n̄an kōļapļo̧k jeļāļo̧kjeņ kōn Rilo̧mo̧o̧r eo im Kabun̄ in An.

Kōttōpar eo ilo katakin ej n̄an jipan̄ m̧aan im kōrā ro nejin Jemedwōj Ilan̄ jepļaakļo̧k n̄an im̧aan Mejān im m̧ōņōņō ilo mour indeeo Ippān. N̄an kōm̧m̧ane menin, katakin gospel eo ej aikuj rojan̄ er ilo iaļ in an rikaļoor iien otemjej im bujen ko rekwojarjar. Kōttōpar eo ej n̄an im̧we kajjojo n̄an ļōmņak kake, en̄jake, innām kōm̧m̧ani men ko n̄an mour kōn pedped ko ilo gospel eo. Jibadbad eo ej n̄an ejaake tōmak ilo Irooj Jisōs Kraist im erom oktak n̄an gospel eo An.

Katakin ej kōjeraam̧m̧an im ukōt im lo̧mo̧o̧r ej katakin eo ej make wōt waanjon̄ak eo an Rilo̧mo̧o̧r eo. Rūkaki ro rej katakin jān waanjon̄ak eo an Rilo̧mo̧o̧r eo ilo iakwe im jerbal ippān ro rej katakin. Rej im̧we ro rej ron̄jake kōn katak ko ejjeļo̧k jem̧ļo̧kier rem̧ool im ekwojarjar. Rej mour kōn waanjon̄ak.

Aolepān iien kwaļo̧k eo an Rilo̧mo̧o̧r eo ekar kwaļo̧k iakwe n̄an ro riturin. Ijoke, An iakwe im jipan̄ rekar ekkā waļo̧k jān katak ko An. Ilo wāween mour in, rūkaki ro imaron̄ keememej er rej rūkaki ro rekar jeļā, iakwe, im kar kea kōn rijikuuļ ro aer. Emōj aer loe jiip eo ejōbwābwe. Raar katakin katak ko an mour ko inaaj aolep iien keememeji.

Juon rūkaki āinwōt Lucy Gertsh. Ekar jeļā kajjeen rijikuuļ ro an. Ej jab meļo̧kļo̧k in kūr ro rej jako ilo juon Jabōt ak ro rejjab kobatok. Kōm̧ jeļā bwe ekar kea kōn kōm̧. Ejjeļo̧k juon iaam ekar meļo̧kļo̧k e ak katak ko ekar katakin kōm̧ kaki.

Elōn̄ iiō tokālik, iien eo ekar epaak an Lucy mej, ikar loļo̧k e. Kōm̧ kar antooneļo̧k raan ko rem̧m̧an im̧aan m̧oktaļo̧k ke ekar juon am rūkaki. Kōm̧ kar kōnono ippān doon ilo kūlaaj eo am kōn ta ko kajjojo rej kōm̧m̧ani. An iakwe im kea ekar juon iien eaitok ilo mour eo an.

Em̧m̧an ippa kallim̧ur kein an Irooj loi ilo Katak im Bujen ko.

“Ij lewōj n̄an kom̧ juon kien bwe kom̧in katakin doon pedped in katak ko an aelōn̄ in kiin̄ eo.

“Kom̧in niknik katakin im Aō jouj enaaj pād ippemi.”⁶

Lucy Gertsch eaar tiljek ilo katakin kōnke ej iakwe.

Rijilōk Piter ekar kapilōk “Kom̧win pojak iien otemjej bwe kom̧win uwaak n̄an jabdewōt armej ej kajjitōk ippemi kōn unin kōjatdikdik eo ej ilowami.”⁷

Bōlen kōjatdikdik eo eļaptata juon rūkaki emaron̄ leļo̧k ej kōjatdikdik eo loe ilo m̧ool ko an gospel eo an Jisōs Kraist.

“Im ta eo kom̧ naaj kōjatdikdik kake?” Mormon ekar kajjitōk. “Lo ij ba n̄an kom̧ bwe kom̧ naaj kōjatdikdik kōn pinmuur eo an Kraist im kajoor in An jerkakpeje, n̄an naaj jerkak n̄an mour indeeo, im men in kōnke ami tōmak ilo E.”⁸

Rūkaki ro, kotak ainikiemi im kam̧ool n̄an laļ in kōn Doulul in Anij. Kwaļo̧k ami kam̧ool kōn Bok in Mormon eo. Leļo̧k m̧ool ko raiboojoj im erreo ilo karōk in lo̧mo̧o̧r eo. Kōjerbal kein katak ko emōj kōmālimi, eļaptata jeje ko rekwojarjar n̄an kwaļo̧k m̧ool ko an gospel eo emōj an jepļaaktok an Jisōs Kraist ilo erreo im meļeļe. Keememej kallim̧ur eo an Rilo̧mo̧o̧r eo: “Kom̧ij pukot ilo Jeje ko, bwe ilo er kom̧ij ļōmņak ami mour indeeo; im kein rej kōnnaan kōn Eō.”⁹

Jipan̄ ajri ro nejin Anij meļeļe ta meļeļein men eo em̧ool im aorōk ilo mour in. Jipan̄ er ejaake kajoor n̄an kālet iaļ ko me renaaj kōjparok er n̄an mour indeeo.

Katakin m̧ool eo, im Jetōb Kwojarjar enaaj im̧we kijejeto ko am̧.

Kōnke Jisōs Kraist ekar pokake im leļo̧k An n̄an Jemān, E “ļapļo̧k ilo An mālōtlōt im rūtto, im ilo jouj ippān armej im Anij.”¹⁰ Jej aikuj ke bwe jej kōm̧m̧an einwot in? Āinwōt Jisōs “Eaar bōk jouj kōn jouj¹¹ jej iakuj kijenmej im pukōt meram im jeļāļo̧kjeņ jān Anij ilo kijejeto ko ad n̄an katak gospel eo.

Ron̄jake ej juon iaan ekkatak ko raorōk. N̄e jej m̧aanjabpopo n̄an ekkatak, jej jar im pukōt im̧we im kapen eo jān Jetōb Kwojarjar eo. Kōmij ļōmņak, kōmij jar, kōmij mour kōn katak ko an gospel, im kōmij pukōt ankilaan Jemād n̄an kōj.¹²

Jisōs ekar “katakin … men ko relōn̄ ilo būrabōļ ko,”¹³ ko raikuj bwe lojiln̄ii en ron̄, mej en lo, im bōro ko ren meļeļe. Ilo ad mour jim̧we, jemaron̄ in ron̄ unoojdikdik ko jān Jetōb Kwojarjar, eo emaron̄ in “katakin [kōj] men otemjej, im kakememej men otemjej n̄an kom̧.”¹⁴

N̄e jej uwaake kajjitōk in an Irooj, “Katak kōn Iō,” jej erom ro rej bōk m̧ōttan kajoor eo An ekwojarjar. Jen wōnm̧aanļo̧k, etal wōt ilo jetōb in pokake, ļoor ad Riwaanjon̄ak jān katakin āinwōt Enaaj kar katakin kōj im ekkatak āinwōt Enaaj kar kōņaan bwe jen ekkatak.