Parau poro’i na te mau tuahine hahaere, Mati 2016
Hamanihia i te hoho’a o te Atua
A tuatapapa na roto i te pure i teie materia ma te imi ia ite e aha te faaite atu. Nahea te taa-maitai-raa i « Te Utuafare : E poro’i i to te Ao nei », e haamaraa i to tatou faaroo i te Atua e e haamaitai i te feia ta outou e haapa’o ra na roto i te hahaereraa a te mau tuahine ? No te mau haamaramaramaraa hau atu, a haere i ni’a i te reliefsociety.lds.org.
Te Faaroo, Te Utuafare, Te Totauturu
« E ua parau ihora te Atua, e hamani tatou i te taata ma to tatou iho huru, ia au i to tatou iho hoho’a …
« Hamani ihora ho’i te Atua i te taata ma to’na iho ra huru, i hamani oia ia’na ma te hoho’a o te Atua ra ; i hamani oia ia raua, o te tane e te vahine ».(Genese 1:26–27).
O te Atua to tatou Metua i te Ao ra, e ua hamani Oia ia tatou i To’na ra hoho’a. No teie parau mau, ua parau te peresideni Thomas S. Monson e : « E tari’a to te Atua to tatou Metua no te faaroo i ta tatou pure. E mata To’na no te hi’o i ta tatou mau ohipa. E vaha To’na no te paraparau mai ia tatou. E mafatu To’na no te ite i te aroha e te here. E mea mau Oia Te ora nei Oia. E mau tamarii tatou na’na hamanihia i to’na hoho’a. Ua hoho’a tatou ia’na e ua hoho’a oia ia tatou ».1
« Te hi’o nei te feia mo’a i te mau mahana hopea nei i te mau taata atoa ei mau tamarii na te Atua, aita e auraa ê atu ; te faariro nei ratou i te taata tata’itahi ei huru atua ia au i to ratou hiro’a, to ratou natura e to ratou faito puai ».2 E ua riro ratou tata’itahi « ei tamaiti e ei tamahine varua herehia e na metua i te ra’i ».3
« Ua haapii atoa mai [te peropheta] Iosepha Semita e, ua hinaaro te Atua ia farii Ta’na mau tamarii i te hoê â oraraa hanahana o Ta’na e ora ra ».4 Mai ta te Atua i parau, « Inaha, o teie ho’i ta’u ohipa e to’u hanahana hoi, ia faatupu i te tahuti ore e te ora mure ore o te taata nei ».(Mose 1:39).
Te tahi atu mau irava papa’iraa mo’a
Genese 1:26–27 ; 1 Korinetia 3:17 ; Te Parau Haapiiraa e te Mau Parau Fafau 130:1
No roto mai i te mau papa’iraa mo’a
Ua imi te taea’e o Iareda, i roto i te Buka a Moromona, i te hoê rave’a no te tu’ama i na pahi e va’u i hamanihia no te afa’i i te mau ati Iareda na roto i te mau pape i te fenua i parauhia ra. « Ua hamani ihora oia i na ofa’i rii e hoê ahuru ma ono » e ua pure atu ra ia nehenehe te Atua ia « faati’a’ia i teie mau ofa’i » i to’na rima « e e faariro ei mea anaana ». E « ua faatoro maira te Atua i ta’na rima, faati’a’ia tata’ihoê ihora i te mau ofa’i ». Ua iriti-ê-hia’tu te paruru i te mata o te taea’e o Iareda, e « ite atura i te rima o te Atua ; e mai te rima taata nei to’na huru …
« E na ô maira te Fatu ia’na : E faaroo anei oe i ta’u e parau atu ?
« Na ô atura oia : E, e te Fatu ».
E « ua faaite maira te Fatu ia’na iho i [te taea’e o Iareda] » e ua na ô maira, « te hi’o na anei oe e ua hamanihia oe i to’u iho huru ? Oia mau, i te matamua ra i hamanihia’i te mau taata atoa ra i to’u iho huru » (Hi’o Etera 3:1–17).
© 2016 na Intellectual Reserve, Inc. Faturaa paruruhia. Nene’ihia i te Mau Hau Amui no Marite. Parau faati’a no te reo peretane : 6/15. Parau faati’a no te iritiraa : 6/15. Iritiraa no Visiting Teaching Message, March 2016. Tahitian. 12863 895
A feruri i teie
Nahea te iteraa e, ua hamanihia te taata tata’itahi i te hoho’a o te Atua e tauturu ia tatou i roto i ta tatou huru ohiparaa e o vetahi ê ?