Ataata
O Fetaui ia Faatonuga?
O le tusitala, o le sa nofo i Colorado, ISA, sa maliu i le tausaga ua te’a.
O se malaga tietie uila na faatalitonuina ai au i le manaomia ona siaki e le aunoa o le faafanua a le Alii o le auala i le olaga.
O ni nai tausaga ua mavae, sa ou alu ai i se malaga tietie uila i Farani faatasi ma lou uso, uso-faaletulafono, ma lana tama teine. I taeao taitasi sa tuuina mai ai ia i matou ni itulau se tolu o faatonuga auiliili lea, afai e mulimuli tonu lava i ai, o le a taitai atu ai i matou i lo matou taunuuga o le aso. Ao vili atu a matou [uila] i lalo o togalaau, e faatonu i matou e faatonuga ia matou “o i le 165 futu (50 m) i matu, ona liliu lea i le agavale ma o mo le 330 futu (100 m).” E matele lava ina tuuina mai e faatonuga ni faailoga ma igoa o auala.
I se tasi taeao sa matou vilivili atu ai i lalo o se auala manaia ae na vave ona iloaina ai ua le fetaui a matou faatonuga ma le teritori. O le vave ai ona leiloloa, sa tonu ai matou te toe foi i le mea mulimuli sa matou iloa sa sao le mea na matou i ai, e vaai pe mafai ona matou faavasegaina le mea [matou te] o i ai.
E sao lava, ina ua matou taunuu iina, sa matou tau ai i se faailoga laitiiti o le auala, sa taua i a matou faatonuga, ae matou te lei iloa atu. E lei umi ae matou toe o loa, ma faafetaui lo matou agai i luma ma faatonuga, lea sa faapea ona fetaui lelei lava.
Sa avea le aafiaga ma se faatusa lea na taliina ai sau fesili le malamalama sa i ai: Aisea, o le a toe pau ese ai se tagata ua i ai se molimau o le talalelei? Sa manino mai ia te au, a tatou ui i se afega sese (agasala) pe ua le mulimuli i poloaiga a le Atua, ona le toe fetaui [foliga sao] loa lea o faatonuga (o le afioga a le Atua). O le faafanua, e pei ona sa i ai, ua le toe fetaui i le teritori o loo tatou i ai. Afai tatou te leo se mamao ese, e mafai ona tatou iloa o tatou lava ua sasi ma e tatau ona tatou toe foi (salamo) pe toe tautino e ola e pei ona poloaiina ai e le Atua, i le mea na tatou iloa sa tatou mulimuli sao ai i le ala.
E masani lava a le fetaui ia faatonuga ma le mea o loo tatou i ai, ona tatou fesiligia lea o faatonuga. Nai lo o le toe foi i tua, tatou te tuuaia faatonuga ona teena uma ai lea. Mulimuli ane, i le lafoaia ai o le vaaiga mamao o lo tatou taunuuga, tatou te leiloloa ai, ma feseseai solo i auala e foliga mai, i se le tumau, e matuai manaia lava ae o le a tatou le oo ai i le mea e manaomia ona tatou o i ai.
O aso uma lava tatou te maua ai le avanoa e suesue ai i tusitusiga paia. Ma o le tai ono masina, tatou te maua ai le avanoa e faalogologo i se konafesi aoao a le Ekalesia. Pe le o taimi ea nei e mafai ona siaki ai a tatou faafanua o le auala ma ia mautinoa o loo tatou i ai i le mea e tatau ona tatou i ai? I se tasi taimi, ao ou faalogologo i le konafesi, sa ou lagonaina ai e faapea, e ui i lo tatou le atoatoa e pei ona i ai, ae e mafai ona tatou iloa o loo tatou i ai i le ala sao pe afai o loo fetaui lelei nei faatonuga ia i tatou.
E pei ona o le a ave atu i tatou i taunuuga o lenei olaga e ala i le mulimuli i taitaiga sao, o le suesueina o tusitusiga paia ma le faalogo i fautuaga a perofeta soifua, e mafai ai ona tatou siakia lo tatou auala ma fetuunai pe afai e tatau ai, ma iu ai ina tatou taunuu atu i lo tatou aiga selesitila.