President a Odzi Kan na n’Apamfo Amandzɛɛbɔ, Ebɔbira 2016
Nkɔnhyɛ na Ankorankor Nyikyerɛ
President Henry B. Eyring ne kasaa
Ɔpamfo a Odzi Kan wɔ President a Odzi Kan na n’Apamfo mu
Jesus Christ No nokwar Asɔr no wɔdze asan ananmu aba asaase do ndɛ. Nkɔnhyɛfo na asomafo atseasefo a wonya akwankyerɛ aber nyina fi sor na daa wodzi Jesus Christ n’Asɔr a ɔwɔ hɔ ma Nda a Odzi Ekyir Ahotseweefo ne kan.
Dɛm nhwɛdo yi a ofi sor no nna dɛmara na ɔtse so wɔ tsetseber no. Yesũa fi Bible mu dɛ: “Ampaara dɛ Ewuradze Nyankopɔn rennyɛ biribi; gyedɛ oeyi akyerɛ no nkowaa nkɔnhyɛfo ansaana.” (Amos 3:7).
Nyankopɔn akasa bio hɛn mber yi, edua Nkɔnhyɛnyi Joseph Smith do. Oedua Nkɔnhyɛnyi Joseph Smith doada Jesus Christ asɛmpa no ne mãhyɛ no edzi. Ɔdze N’asɔfodzi krɔnkrɔn no asan ananmu aba a ne nsaafee nye ne ndzinoa, tum, na asɔfodzi krɔnkrɔn ho tum dwumadzi nyina kã ho.
Hɛn nda yi mu no, nkɔnhyɛfo na asomafo atseasefo wɔ tumdzi dɛ wɔkasa, wɔkyerɛkyerɛ, na wɔdze tumdzi a ofi Nyame Egya no na Ewuradze Jesus Christ hɔ dze kyerɛ dza wɔnyɛ. Agyenkwa no see Nkɔnhyɛnyi no dɛ, “Dza emi Ewuradze makã no, nna makã, na mennsan m’ekyir; na sor na asaase twa mu kɔ mpo a, m’asɛm dze nnkotwa mu akɔ da, na ne nyina bɛhyɛ mã, dɛ ɔnam mankasa me ndze do anaa mo nkowaa ndze do, ne nyina yɛ kor.” (N&A 1:38).
Wiadze mfɛdzanan ehyiadzi ber mpen ebien afrenhyia mu no, ɔyɛ hɛn adom dɛ yenya kwan tse asɛm a Ewuradze wɔ ma hɛn fi N’asomfo hɔ. Iyi yɛ ndzinoa a wonntwa ho bo. Mbom dɛm akwanya no bo a ɔsom no gyina dɛ yɛbɛgye nsɛm no wɔ Sunsum nhyɛdo kor noara a dɛm asomafo no dze nyae no do (hwɛ N&A 50:19–22). Dɛ mbrɛ wonya kwankyerɛ fi sor no, otwar dɛ yenya no dɛmara. Na ne nyina hia sunsum mu mbɔdzembɔ kor noara.
“Yɛ W’afamudze Wɔ Fie”
Mfe pii a abɛsen kɔ no, Asomafo Duebien no hɔn Quorum kuwba bi serɛɛ me dɛ menkenkan ehyiadzi kasa a ɔreyɛ ho ahoboa ama wiadze mfɛndzanan ehyiadzi. Nna meyɛ kuwba no mu ɔketseaba. N’enyidado dɛ mubotum aboa no ma oehu nsɛm a Ewuradze bɛpɛ dɛ ɔkã no hyɛɛ me enyimnyam. Ɔyerɛw n’ano kãa kyerɛ me dɛ. “O, iyi nye kasa nkyerɛwee no mu nsesã a ɔtɔ do 22.”
Mekaa afotu a dɔfo yamuyiefo President Harold B. Lee (1899–1973) tsĩi mu yie kãa kyerɛɛ me dada no: “Hal, sɛ epɛ dɛ inya nyikyerɛ a, yɛ w’afamudze.”
Mekenkanee, dwendwen ho, na mobɔɔ mpaa wɔ nkyerɛwee nsesã no a ɔtɔdo 22 no ho. Medze Sunsum Krɔnkrɔn ne nhyɛdo sũae ara yie dɛ mbrɛ mubotum. Ber a quorum kuwba no maa ne kasaa no, nna mayɛ m’afamudze. Minngye nndzi dɛ moboae, mbom minyim dɛ mesakyeree ber a metsee kasa no a ɔrema no. Menyaa nkenyan nsɛm a ɔbor nsɛm a ɔkenkanee nye ma ɔkãe no do. Nsɛm no nyaa nkyerɛasee soronko kyɛn dza mekenkanee wɔ nkyerɛwee nsesã mu no. Nna ɔyɛ dɛ emi hɔ na asɛm no reba a, ɔnye m’ehiadze sɛ.
Ewuradze asomfo kyen kɔm na wɔbɔ mpaa ama woeenya asɛm no a Ɔno wɔ ma hɔn a wohia nyikyerɛ nye nkenyan no. Dza musũae fi dɛm sũahu no mu no, nye dodowara a ɔtse dɛ ɔno no, nye dɛ ama yeenya mfaso kɛse a ofi yɛretsie nkɔnhyɛfo na asomafo atseasefo no, otwar dɛ hɛnankasa yɛyɛ dza yebotum ayɛ ama yeenya nyikyerɛ.
Ewuradze dɔ obiara a obetsie N’asɛm no, na Onyim kor biara n’akoma na gyinabew. Onyim nkaenyim, nkuranhyɛ, nye asɛmpa no nokwar a oye a ɔbɔboa nyimpa kor biara ma ɔasan mu eyi n’anamɔn kwan a obegya no akɔ onnyiewiei nkwa mu.
Hɛn a yetsie na yɛhwɛ wiadze mfɛndzanan ehyiadzi mu nsɛm no, ɔtɔfabi a ekyir no, yɛdwen ho dɛ, “Ebɛnadze na mekaa no yie?” Ewuradze N’enyidado nye dɛ hɛn mu kor biara ne nyiano bɛyɛ: “Mowerɛ nnkefir mber kumaa no a metsee Sunsum no ne ndze wɔ m’adwen nye m’akoma mu a ɔrekã dza mubotum ayɛ a ɔbɔsɔ Ɔsor Egya na Agyenkwa no Hɔn enyi akyerɛ me.”
Yebotum enya dɛm ankorankor nyikyerɛ no ber a yetsie nkɔnhyɛfo na asomafo, na yɛdze gyedzi dzi dwuma dze nya, tse dɛ mbrɛ President Lee kãa dɛ yebotum ayɛ no. Ɔnam mo sũahu do na Sunsum no ne dasegye do ntsi minyim dɛ ɔyɛ nokwar.
© 2016 Intellectual Reserve, Inc. Wɔakora do tumdzi nyina. USA na wotsintsimii. English approval 6/15. Translation approval 6/15. First Presidency Message, April 2016 ne Nkyerɛasee Fante 12864 502
Erekyerɛkyerɛ efi Amandzɛɛbɔ Yi Mu
Susu dɛ ebɔbɔ mu akenkan President Erying n’asɛm a ɔfa orusũa no quorum kuwba n’ehyiadzi kasa ne nkyerɛwee nsesã no. Ibotum ebisa dɛ, “Ebɛnadze na ohia dɛ yɛyɛ dze nya nyikyerɛ?” Wɔapɛnsampɛnsamu ekyir no, ibotum ama hɔn a esera hɔn no adwendwen na wɔayɛ nhyehyɛɛ a wɔdze bɛgye wiadze mfɛndzanan ehyiadzi yi a ɔreba yi mu nsɛm no wɔ “Sunsum nhyɛdo kor noara a [Nyame] N’asomafo no dze nyae no do.”