Fa’ariro i te ’āmuira’a ’ei tuha’a nō tō tātou orara’a

’Api 86 : ’Ua fa’ahiti te peresideni Thomas S. Monson i te hō’ē taime i roto i te ’ā’amu Les Aventures d’Alice au pays des merveilles nō te fa’a’ite i te faufa’a rahi o te mau fa’aotira’a. ’Ua fa’aitoito ’oia ia tātou ’ia mā’iti i te maita’i noa atu ā ’o te ’e’ā fifi a’e. ’Ei ’utuāfare ’a ’āparau nō ni’a i te mau fa’aotira’a fifi tā ’outou e fa’aruru nei. E aha tā ’outou e nehenehe e rave nō te tauturu te tahi i te tahi ’ia mā’iti i te maita’i ? Teie te tahi ’ohipara’a, e pāpa’i i te hōho’a o te hō’ē pāruru MTM i ni’a i te tahi ’api rahi ’ei reira e pāpa’ipa’i i tō ’outou mau mana’o i ni’a i te reira. ’A fa’atautau atu ai i te reira i te hō’ē vāhi e ’ite pinepine te ’utuāfare.

’Api 101 : ’Ua hōro’a mai te peresideni Dieter F. Uchtdorf, tauturu piti i roto i te Peresidenira’a Mātāmua, i te fa’a’itera’a nō te hō’ē ’oire i Heremani tei vāvahihia i te tama’i, ’ua patu-fa’ahou-hia rā i muri iho ’e ’ua nehenehe fa’ahou mai. ’Ua ha’api’i te peresideni Uchtdorf ē, ’ia tupu tō tātou mana’o hepohepo, e ti’a i te Fa’aora ’e i te Metua i te Ao ra ’ia patu fa’ahou ia tātou. E aha te tahi ’ohipa tā te ’utuāfare i ’ite tei vāvahihia ’e ’ua riro fa’ahou mai rā ’ei mea nehenehe ’e te pāutuutu ? ’A ’ōpua ’ia fa’a’ite i tō ’outou ’itera’a pāpū nō ni’a i te tāra’ehara a Iesu Mesia i tā ’outou mau tamari’i.

’Api 53 : ’Ua fa’aitoito Elder Mervyn B. Arnold nō te Hitu ’Ahuru ’ia « haere e fa’aora » nā roto i te torora’a i te rima i tō tātou mau hoa melo paruparu ’e te melo ’ore. ’Ei ’utuāfare, ’a feruri nāhea ’outou e nehenehe ai e toro atu i te rima i te feiā tei ma’iri i te purera’a ’ua maoro i teie nei, ’e ’aore rā i te mau melo ’ore. E aha tā ’outou e nehenehe e rave nō te fa’a’ite i te ’evanelia ia vetahi ’ē ? ’A feruri i te tahi rāve’a ’ana’anatae nō te fa’atupu i te tahi ’ōpuara’a misiōnare ma te fā ’ōhie ’e te tano.

’Apī 13 : ’Ua ani te tuahine Linda K. Burton, peresideni rahi nō te Sōtaiete Tauturu, ia tātou ’ia feruri nā roto i te pure nāhea i te tauturu i te mau tītīhoria e vai ra i roto i tō tātou huira’atira. ’Ei ’utuāfare, ’a haere i ni’a i te tahua Itenati IWasAStranger.lds.org ’e ’a māta’ita’i i te video « I Was a Stranger: Love One Another ». E aha te tahi mea ’o tā ’outou te ’utuāfare e nehenehe e rave nō te tāvini i te ta’ata tupu i roto i te ’ati ?

’Api 86 : ’Ua parau te peresideni Thomas S. Monson, « e mana rahi tō te mau mea ha’iha’i i ni’a i te ’ā’ai o te ao nei ’e mai te reira ato’a te orara’a o te mau ta’ata ». ’Ua parau ato’a ’oia, « te ’ē’a tā tātou e pe’e i roto i teie orara’a e arata’i ïa i tō tātou tāpaera’a hope’a i roto i te orara’a a muri atu ». ’A feruri i te mau mā’itira’a rahi i mua ia ’outou. ’A hi’o mana’o i hea te reira mau mā’itira’a e arata’i atu ia ’outou ’āraua’e ’e ’a pāpa’i i te mau mana’o e tae mai i roto i tō ’outou ferurira’a ’e tō ’outou ’ā’au.

’Api 46 : ’Ua parau Elder Ronald A. Rasband nō te pupu nō te Tino ’Ahuru Ma Piti ’āpōsetolo, « ’Ua ha’amata te Fa’aho’i-fa’ahou-ra’a nā roto i te hō’ē taure’are’a, ’o Iosepha Semita, tei ani i te hō’ē uira’a ». ’Ua parau Elder Rasband ē, tē fa’a’ite nei te mau uira’a i te hia’ai nō te ha’api’i, e tu’u i te parau mau i tō tātou ’itera’a pāpū nō te « haere ti’a atu… i mua i te ti’a-mā’ite-ra’a i te Mesia » (2 Nephi 31:20). ’A tu’u i tā ’outou mau uira’a i mua i te Atua nā roto i te pure, ’a ’imi i te mau pāpa’ira’a mo’a ’e te mau a’ora’a o te ’āmuira’a rahi ’e ’a hi’o ’e ’a fa’aro’o maita’i roa i te mau pāhonora’a.

’Api 10 : ’Ua ri’ari’a a’enei ’outou ’e aore rā ’ua vai mo’emo’e a’enei ? Tē fa’a’ite ra te tuahine Neill F. Marriott, tauturu piti i roto i te peresidenira’a rahi o te Feiā ’Āpī tamāhine, i te mea i tupu nā mua noa a’e i tōna fa’aipoipora’a. ’Ua ātea roa ’oia i tōna fare ’e e riro ’oia i te fa’aea i piha’i iho i te tahi fēti’i o te tāne tāna e fa’aipoipo atu, ’o tāna i ’ore i mātau. ’I te taera’a atu ’oia i terā fare, tē parau ra te tuahine Marriott ē, « mātara mai nei te ’ūputa… tauahi mai nei tati Carol iā’u, ’aita hō’ē a’e parau. » I terā iho taime ’ua ma’ue ’ē atu tō’u ri’ari’a. « Nā te here e fa’aāteatea i te vāhi nō vetahi ’ē i roto i tō ’outou orara’a », tē parau ra ’oia. E ta’ata ānei tā ’outou e nehenehe e fa’aāteatea i te tahi vāhi ?

’Api 70 : ’Ua ha’api’i te taea’e Stephen W. Owen, peresideni rahi nō te Feiā ’Āpī tamāroa, ē e ta’ata fa’atere tātou ’e e ta’ata pe’e ato’a ho’i. ’Ua fa’ati’a ’oia i te ’ohipa i tupu i te fārereira’a ’oia i te tahi pupu feiā ’āpī tamāroa tei turu ’e tei fa’aitoito te tahi i te tahi i roto i te pupu autahu’ara’a. ’Ua parau ’oia, « ’Ua riro te fa’aterera’a ’ei tāpa’o fa’a’ite nō te ti’ara’a pipi—e tauturura’a noa ia vetahi ’ē ’ia haere mai i te Mesia ra ». ’A feruri i te tahi ta’ata tā ’outou e nehenehe e tauturu ’ia haere mai i te Mesia i teie hepetoma.

’Api 101 : Hina’aro ānei ’outou ’eiaha tō ’outou fa’aro’o ’ia mōrohi ? ’Ua ha’api’i te peresideni Dieter F. Uchtdorf, tauturu piti i roto i te Peresidenira’a Mātāmua, ’o te ha’apa’o te pāhonora’a ! « ’O te ha’apa’o te toto ora o te fa’aro’o », tāna ïa i parau mai. « Nā roto i te ha’apa’o tātou e ha’aputu ai i te māramarama i roto i tō tātou vārua ». ’A feruri i te hō’ē taime ’ua ha’apa’o ’outou i te parau a te Fatu noa atu ā te fifi. Nāhea tō ’outou ha’apa’o i ha’apūai ai i tō ’outou fa’aro’o ’e i tauturu ai ia ’outou ’ia ’ite mai i te mea i hāmanihia ai ’outou ?

’Api 23, 59 ’e 105 : ’Ua fa’ahiti te tuahine Mary R. Durham, tauturu piti i roto i te peresidenira’a rahi o te Paraimere tei ha’amāuruuruhia, i te parau nō te Vārua Maita’i ’ei « tumu hanahana nō te pūai ». ’A tai’o i tāna a’ora’a ’e te mau a’ora’a a Elder David A. Bednar ’e Elder Robert D. Hales nō te pupu nō te Tino ’Ahuru Ma Piti ’āpōsetolo. ’A pāpa’ipa’i i i te mau ti’ara’a e rave rahi a te Vārua Maita’i ’e te mau rāve’a Tāna e ha’amaita’i ia ’outou. ’A tu’u i te ’ōpuara’a ’ia taui i te hō’ē mea i roto i tō ’outou orara’a ’ia rahi atu ā tō ’outou ti’amā nō te putapū i Tāna fa’aurura’a.

’Api 26 ’e 124 : ’A fa’ata’a i te tahi taime nō te ui ia ’outou iho i te mau uira’a a Elder Donald L. Hallstrom nō te peresidenira’a o te Hitu ’Ahuru, ’oia ho’i : « ’Ia tupu ana’e te mau fifi i roto i tō tātou orara’a, e aha tā tātou pāhonora’a ’oi’oi ? E ’āhuehue ānei ’e ’aore rā, e fē’a’a, ’e ’aore rā, e ’ōtohera’a pae vārua ? E ’āueue ānei tō tātou fa’aro’o ? E fa’ahapa ānei tātou i te Atua ’e ’aore rā, ia vetahi ’ē nō tō tātou huru orara’a ? ’E ’aore rā, tā tātou pāhonora’a mātāmua, ’o te ha’amana’ora’a ānei… e mau tamari’i tātou nā te Atua here ? ’Ua parau Elder Jeffrey R. Holland nō te pupu nō te Tino ’Ahuru Ma Piti ’āpōsetolo, « Te parau mau rahi mātāmua rā o te mure ’ore, ’o te herera’a ïa te Atua ia tātou ma Tōna ’ā’au ato’a ’e te pūai ’e te mana’o ’e te itoito ». Nāhea te ha’apūaira’a i tō ’outou ’itera’a pāpū nō te here o te Atua ia ’outou e nehenehe ai e tauturu ia ’outou ’ia fa’a’oroma’i i te mau tāfifira’a ?

’Api 86 : ’Ua parau te peresideni Thomas S. Monson ē, ’ia hi’o ana’e tātou i tā tātou mau fa’aotira’a i terā mahana ’e tera mahana, « mai te mea e mā’iti tātou i te Mesia, ’ua rave ïa tātou i te mā’itira’a maita’i ». E aha te ’ohipa pae fa’aro’o tā ’outou e nehenehe e fa’atupu ’e ’aore rā e ha’apūai i te mau mahana ato’a o tō ’outou orara’a, i roto i tō ’outou ’utuāfare, nō te tāpe’a i te Mesia i te pū o tā ’outou mau fa’aotira’a ?

’Api 81 ’e 93 : ’Ua fa’aitoito te peresideni Henry B. Eyring, tauturu mātāmua i rotoi te Peresidenira’a Mātāmua, ’e ’o Elder D. Todd Christofferson nō te pupu nō te Tino ’Ahuru Ma Piti ’āpōsetolo, i te mau metua tāne ’ia rave i te mau tauira’a tei tītauhia nō te arata’i i tō rātou ’utuāfare i te bāsileia tiretiera. ’Ei metua tāne, e aha tā ’outou e nehenehe e rave, mai te au i te mau parau a Elder Christofferson, nō te « fa’a’ite [maita’i a’e]… i te hōho’a nō te ha’apa’o maita’i i te Atua i roto i te orara’a tāmahana » ?

’Api 77 : Nā roto i te tauahira’a i te aroha e nehenehe ato’a te mau ’utuāfare i roto i te mau tāmatara’a rahi e manuia, tē parau nei te peresideni Dieter F. Uchtdorf, tauturu piti i roto i te Peresidenira’a Mātāmua. ’Ua parau ’oia ē, « Noa atu e aha te mau fifi tā tō ’outou ’utuāfare e fa’aruru ra, noa atu e aha tā ’outou e ti’a ’ia rave nō te fa’atītī’aifaro i te reira, te rave’a nō te ’ōmuara’a ’e te hope’ara’a o te aroha ïa ». I roto i tō ’outou ’utuāfare, ’a feruri i te a’ora’a o te pāpa’ira’a mo’a ’ia « pure atu i te Metua… ’ia ’ī ’outou i teie nei aroha » (Moroni 7:48).

’Api 63 : ’Ua parau Elder M. Russell Ballard nō te pupu ō te mau ’āpōsetolo ē, e riro te mau ’āpo’ora’a ’utuāfare tāmau i te « tinai i te mani’ira’a mai o te ’ihimata’i ’ino o te nehenehe e fa’anevaneva ia tātou i te hōro’ara’a i te taime maita’i nō te pārahi i piha’i iho i te tahi e te tahi ». ’A ’ōpua i te fa’a’ohipa i roto i tō ’outou ’utuāfare i nā huru ’āpo’ora’a ’utuāfare e maha tā Elder Ballard e hōro’a nei nō te « tauturu… ia tātou ’ia hau atu te manuia ’e te ’oa’oa i roto i tō tātou mau aura’a ».