Elder Gary B. Sabin

E toru tumu rā’au noela ta’a ’ē i roto i te ha’amana’ora’a a Elder Gary B. Sabin.

Te mātāmua, e tumu rā’au noela nehenehe ïa nō tōna taure’are’ara’a. I te pa’i’umara’a Gary i ni’a i terā tumu rā’au ’a tāmata ai i te haru mai i te tahi monamona hōho’a rā’au to’oto’o, tē marua mai ra te reira i raro.

Te piti, e ’āma’a rau’ere aupaina (conifère) tāna i ’ite ’ei misiōnare i Belegika ’e i Holane mai te matahiti 1973 ’e 1975. ’Ua fa’aho’i Elder Sabin ’e tōna hoa misiōnare i teie ’āma’a i tō rāua fa’aeara’a ’e ’ua fa’anehenehe nā pīha’i iho i te mau tareta noela tā rāua i fāri’i nō te fare mai.

Te toru, ’o te tumu rā’au ïa tei hāmanihia e te mau mori noela tei fa’atautauhia i ni’a i te ’auri fa’atautau mohina rā’au i pīha’i iho i te ro’i o tāna tamāhine i te fare ma’i. ’O ’oia te tamari’i i roto i nā tamari’i e toru tei ro’ohia te ma’i mucoviscidose, tei tāpūhia tōna nā māhāhā e piti nō te mono, hō’ē matahiti i muri iho i te pohera’a tōna taea’e nō terā ato’a ma’i.

« ’Ua rahi atu ā tā māua i ha’api’i mai roto mai i tā māua mau tamari’i, ia rātou tei ha’api’i mai roto mai ia māua », tē parau nei Elder Sabin.

’Ei melo i roto i te mau hui mana fa’atere rahi, e ha’amana’o noa ’oia i te mau tumu rā’au noela ’e te mau ha’api’ira’a tāna i ha’api’i na roto mai i te reira. Te tumu rā’au tāta’itahi tei tūrama i te tahi tuha’a o tōna tere—mai terā tamaiti tei hina’aro i te monamona i terā misiōnare tei ha’api’i i te fa’anahora’a nō te fa’aorara’a, i te metua tāne tei turu’i i ni’a i teie fa’anahora’a ’e te here o te Fa’aora nō te turu i tōna ’utuāfare i roto i te mau tāmatara’a o te tāhuti nei.

’Ua fānauhia o Gary Byron Sabin i Provo, i Utah i te 7 nō ’ēperēra 1954 e Marvin E. ’e e Sylvia W. Sabin. ’Ua fa’aipoipo ’oia ia Valerie Purdy i te ’āva’e atete 1976. E pae tamari’i tā rāua; ’ua fānau-pohe-hia te ono.

I muri iho i te roa’ara’a tāna parau tū’ite i Brigham Young University i Provo, ’ua tītau ’e ’ua noa’a mai ia Elder Sabin te tahi parau tū’ite i roto i te ’ohipa fa’aterera’a i te fare ha’api’ira’a teitei nō Stanford University.

’Ua rau te mau pi’ira’a a Elder Sabin i roto i te ’Ēkālesia, ’ei ’episekōpo, ’ei peresideni titi ’e ’ei Hitu ’Ahuru Ārea. ’Ua ’ohipa ’oia ’ei fatu taiete, ’ei ti’a upo’o fa’atere ’e ’ei fa’atere rahi nō te mau taiete e rave rau, mai ia Excel Realty Trust, Price Legacy, Excel Realty Holdings ’e Excel Trust.

I te matahiti 1993, ’ua fa’ati’a Elder ’e te tuahine Sabin i te Pū Tamari’i Sabin, pū tei ha’apa’o i te mau hina’aro o te tamari’i i te pae nō te ea.