Thawj Pawg Thawj Tswj Hwm tsab Xov, Rau Hli Ntuj 2016
Peb Leej Txiv, Peb tus Kws Coj
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Koj puas tau qhib ib lub thawv uas muaj tej yam khoom nyob haud, rho daim qhia kom muab sib dhos ua ke, thiab xav tias, “Zoo nkaus daim ntawv no qhia tsis yog poj”?
Tej lub sij hawm, txawm peb xav ua zoo npaum li cas los sis peb tso siab rau peb tus kheej npaum li cas los, peb rho ib qho thiab nug seb, “Ua li cas ho muaj qhov no?” los sis “Qhov no yuav muab sib dhos li cas?”
Peb chim siab zuj zus tuaj ces peb cia li saib lub thawv thiab pom ib daim ntawv uas hais tias, “Yuav tsum muab sib dhos—8 xyoo rov saud.” Vim peb tseem tsis paub dab tsi, qhov no tsis ua rau peb ntseeg peb tus kheej los sis saib peb tus kheej rau nqi.
Tej lub sij hawm peb xav zoo ib yam li ntawd txog txoj moo zoo. Thaum peb saib ib qho ntawm txoj moo zoo, tej zaum peb xav mus xav los xyov tsis paub vim li cas ho muaj qhov ntawd. Los sis thaum peb saib lwm qhov los ntawm txoj moo zoo, tej zaum peb kawm hais tias tom qab peb siv zog ua kom to taub, peb yeej tsis paub xyov yog vim li cas ho muaj qhov ntawd.
Peb Leej Txiv Saum Ntuj Ceeb Tsheej Yog Peb tus Kws Coj
Tiam sis, peb Leej Txiv Saum Ntuj Ceeb Tsheej tau muab tej lus qhia zoo rau peb kom peb paub ua neej thiab rais los ua neeg zoo tshaj plaws. Tej lus qhia no yuav pab peb txawm peb muaj hnub nyoog npaum li cas los sis peb raug xwm txheej li cas. Nws tau pub txoj moo zoo thiab Yexus Khetos lub Koom Txoos rau peb. Nws tau pub txoj kev txhiv dim, txoj kev cawm seej, thiab txoj kev zoo siab rau peb. Nws tsis tau tso peb tseg nyob peb tus kheej nrog rau tej yam nyuaj los sis tej yam uas tsis paub txog lub neej no thiab hais tias, “Cia li mus. Mus zoo koj. Cia li tawm tswv yim rau koj tus kheej xwb.”
Yog peb ua siab ntev thiab txo hwj chim thiab qhib peb lub siab lub ntsws, ces peb yuav kawm hais tias Vajtswv tau muab ntau yam rau peb kom pab peb to taub Nws tej lus qhia rau peb txoj kev zoo siab hauv lub neej no:
-
Nws tau pub lub txiaj ntsim tus Vaj Ntsuj Plig Dawb Huv uas muaj nqi heev rau peb, tus uas muaj peev xwm qhia peb thaum peb kawm txog Vajtswv txoj lus thiab pab ua rau peb tej kev xav thiab tej yam peb ua kom muaj raws li Nws txoj lus.
-
Nws tau pub sij hawm rau peb sib tham nrog Nws 24/7 thaum peb muaj kev ntseeg thov Nws thiab thov Nws tiag tiag.
-
Nws tau pub cov thwj tim thiab cov yaj saub niaj hnub no rau peb, cov uas qhia txog Vajtswv txoj lus nyob hauv peb lub caij nyoog thiab muaj cai khi tej yam hauv lub ntiaj teb thiab lub ntuj ceeb tsheej.
-
Nws tau muab Nws lub Koom Txoos txum tim rov qab los—yog ib lub koom haum rau cov ntseeg uas ua hauj lwm ua ke kom ib leeg pab ib leeg thaum lawv ua hauj lwm rau lawv txoj kev cawm seej nrog txoj kev hwm Vajtswv, kev tshee hnyo, thiab kev xyiv fab.
-
Nws tau pub cov vaj lug kub dawb huv rau peb—Nws txoj lus uas sau tseg rau peb.
-
Nws tau pub ntau yam khoom txuj ci technology kom pab peb ua cov pab coj. Tej yam zoo no feem ntau los yus nrhiav tau nyob hauv LDS.org.
Vim li cas peb Leej Txiv Saum Ntuj Ceeb Tsheej tau pub kev pab rau peb? Vim Nws hlub peb. Thiab vim, raws li Nws hais txog Nws tus kheej hais tias, nov yog Nws txoj hauj lwm thiab Nws lub yeeb koob ua kom tib neeg tsis txawj tuag thiab tau txoj sia nyob mus ib txhis.2
Ua lwm yam lus hais, Leej Txiv Saum Ntuj Ceeb Tsheej yog peb tus Vajtswv, thiab Vajtswv yog tus kws coj peb kev.
Peb Leej Txiv Saum Ntuj Ceeb Tsheej paub tias Nws cov me nyuam xav tau dab tsi zoo dua li lwm tus. Nws txoj hauj lwm thiab lub yeeb koob yog kev pab peb txhua lub sij hawm, pub tej yam ntawm sab cev nqaij daim tawv thiab sab ntsuj plig kom pab peb rov qab los cuag Nws.
Txhua Leej Txiv Yog Ib tug Kws Coj
Nyob hauv tej qhov chaw ntawm lub ntiaj teb no, tsev neeg thiab lub sawm fem hwm cov txiv thaum lub Rau Hli Ntuj. Yeej yog ib qho zoo thaum peb hwm thiab saib peb niam peb txiv rau nqi. Cov txiv ua tej yam zoo ntau rau lawv tsev neeg thiab muaj tej cwj pwm zoo. Ob lub luag hauj lwm tseem ceeb tshaj plaws uas cov txiv muaj nyob hauv lawv cov me nyuam lub neej yog kev ua yam ntxwv zoo thiab ua ib tug kws coj. Cov txiv yeej ua ntau dua li qhia lawv cov me nyuam txog qhov yog thiab qhov tsis yog; lawv yeej ua ntau dua li muab ib phau ntawv rau lawv cov me nyuam thiab xav tias lawv cov me nyuam yuav xav tawm tswv yim rau lawv lub neej rau lawv tus kheej xwb.
Cov txiv coj lawv cov me nyuam uas muaj nqi heev thiab qhia tias ib tug neeg ua neej ncaj ncees li cas los ntawm lawv tus yam ntxwv. Cov txiv tsis tso lawv cov me nyuam tseg tiam sis khiav mus pab lawv, pab lawv rov qab sawv thaum lawv ntog. Thiab tej zaum thaum muaj tswv yim, cov txiv cia lawv cov me nyuam siv zog ua ib yam dab tsi, vim lawv paub tias txoj kev ntawd yog txoj kev zoo tshaj kom pab lawv kawm.
Peb Txhua tus Yog cov Kws Coj
Txawm cov txiv hauv lub ntiaj teb ua li no rau lawv cov me nyuam, peb yuav tsum pab ua ib tug kws coj rau tag nrho Vajtswv cov me nyuam, txawm lawv muaj hnub nyoog li cas, nyob qhov twg, los sis raug xwm txheej dab tsi los yog. Cia li nco ntsoov tias, Vajtswv cov me nyuam yog peb cov kwv tij thiab cov muam; peb txhua tus yeej yog ib tse neeg uas nyob mus ib txhis.
Yog li ntawd, xav kom peb txhua tus ua cov kws coj—cov uas xav ncav tes pab lwm tus kom rais los ua neeg zoo tshaj. Vim peb yog Vajtswv cov me nyuam, peb muaj peev xwm rais los ua neeg zoo li Nws. Peb yuav tsum hlub Vajtswv thiab neeg zej zog, ua raws li Vajtswv cov lus txib, thiab ua raws li Khetos tus yam ntxwv kom taug txoj kev ncaj, nqaim, thiab txoj kev zoo siab uas coj peb rov qab los cuag peb niam peb txiv nyob saum ntuj ceeb tsheej.
Yog Vajtswv uas tsim ntuj tsim teb hlub peb npaum li no Nws thiaj li yog tus kws coj peb kev, tej zaum peb kuj yuav muaj peev xwm ncav tes pab cov neeg zej zog, txawm lawv daim tawv yog xim dab tsi, lawv yog haiv neeg twg, muaj nyiaj tsis muaj nyiaj, lawv raug xwm txheej dab tsi, hais yam lus dab tsi, los sis ntseeg dab tsi los yog. Xav kom peb txais kev tshoov siab ua cov kws coj thiab foom koob hmoov rau lwm tus lub neej—tsis yog rau peb cov me nyuam xwb tiam sis rau tag nrho Vajtswv cov me nyuam nyob thoob plaws lub ntiaj teb no.
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/15. Pub txhais ua lus Hmoob: 6/15. Kev txhais First Presidency Message, June 2016. Hmong. 12866 295
Qhia los ntawm tsab Xov No
Tej zaum thaum pib koj yuav xav nug cov uas koj qhia kom lawv xav txog ib lub sij hawm thaum Leej Txiv Saum Ntuj Ceeb Tsheej tau qhia lawv. Ces tom qab ntawd koj nug lawv xav seb lub sij hawm ntawd zoo sib thooj li cas rau ib lub sij hawm thaum lawv txiv nyob hauv lub ntiaj teb no tau qhia lawv. Cia li caw lawv sau ntawv hais tias ob lub sij hawm thaum lawv txais kev qhia no zoo sib thooj li cas. Tej zaum koj yuav xav hais kom lawv sim coj yam ntxwv txog qhov uas lawv sau kom ua ib tug yam ntxwv zoo dua rau lwm tus.