Cov Mus Saib Xyuas Tom Tsev tsab Xov, Rau Hli Ntuj 2016
Lub Tuam Tsev Cov Kab Ke thiab Kev Khi Lus
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub “Tsev Neeg: Ib zaj Lus Tshaj Tawm rau lub Ntiaj Teb” yuav ua li cas kom koj txoj kev ntseeg Vajtswv loj zuj zus thiab foom koob hmoov rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Tag nrho cov kab ke uas yuav tsum txais kom tau kev cawm seej thiab kev tsa nto los kuj muaj tej kev khi lus nrog Vajtswv. Linda K. Burton, Koom Haum Niam Tsev tus tuam thawj tswj hwm hais tias, “Qhov uas peb ua raws li tej kev khi lus txhais hais tias peb xaiv kom khi peb tus kheej rau peb Leej Txiv Saum Ntuj Ceeb Tsheej thiab Yexus Khetos.”1
Txwj Laug Neil L. Andersen los ntawm Pawg Kaum Ob tug Thwj Tim hais tias, “Tus Tswv hais tias, “‘Nyob hauv cov kab ke … thiaj pom tau Vajtswv lub hwj chim.’
“Txhua tus neeg tsim nyog uas ua kev cai raus dej, txais tus Vaj Ntsuj Plig Dawb Huv, thiab txais lub cim nco txog, txais tau Vajtswv cov koob hmoov tshwj xeeb.”2
Txwj Laug M. Russell Ballard ntawm Pawg Kaum Ob tug Thwj Tim hais tias, “Thaum cov txiv neej thiab cov poj niam mus rau lub tuam tsev, lawv puav leej txais tib lub hwj chim, uas yog lub hwj chim pov thawj hwj …
“… Tag nrho cov txiv neej thiab poj niam yeej siv tau lub hwj chim no los pab hauv peb lub neej. Txhua tus uas tau khi tej lus dawb ceeb nrog tus Tswv, thiab cov uas hawm tej kev khi lus ntawd, yeej tsim nyog los txais tau kev tshwm sim rau nws tus kheej, tau koob hmoov uas yog kev pab ntawm cov tim tswv, nrog Vajtswv sib tham tau, txais qhov txhij txhua ntawm txoj moo zoo, thiab, thaum kawg, los txais txhua yam uas Leej Txiv muaj ua lawv tug nrog Yexus Khetos.”3
Vaj Lug Kub Ntxiv
1 Nifais 14:14; Lus Qhuab Qhia thiab Kev Khi Lus 25:13; 97:8; 109:22
Zaj Dab Neeg uas Muaj Sia
Thaum xyoo 2007, plaub hnub tom qab av qeeg nyob hauv Peru, Txwj Laug Marcus B. Nash los ntawm Pawg Xya Caum tau sib ntsib Wenceslao Conde thiab nws tus poj niam, Pamela. “Txwj Laug Nash nug Muam Conde seb nws cov me nyuam nyob li cas. Nws luag, thiab teb hais tias vim Vajtswv ua siab zoo rau lawv, lawv sawv daws nyob zoo thiab nyab xeeb. Nws nug txog lawv lub tsev.
“Nws cia li hais tias, ‘Tsis muaj lawm.’
“Txwj Laug Nash hais tias, ‘… Tiam sis, koj tseem luag nyav tam sim no thaum wb sib tham.’
“Nws hais tias, ‘Yog mas, kuv twb thov Vajtswv lawm thiab kuv nyog kaj siab lug. Peb muaj txhua yam uas peb xav tau. Kuv thiab kuv tus txiv wb ib leeg muaj ib leeg, wb muaj wb cov me nyuam, wb tau ua kev cai sib khi hauv lub tuam tsev, peb muaj lub Koom Txoos zoo kawg no, thiab peb muaj tus Tswv. Peb yuav rov qab ua ib lub tsev nrog tus Tswv txoj kev pab.’ …
“Vim li cas qhov uas peb ua raws li peb tej kev khi lus nrog Vajtswv muab hwj chim rau peb kom peb txawj luag thaum raug tej yam nyuaj, thiab kov yeej tej kev txom nyem … ?”
“Yog vim Vajtswv pub hwj chim rau peb. Peb txais lub hwj cim ntawd thaum peb khi lus nrog Nws.”4
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/15. Pub txhais ua lus Hmoob: 6/15. Kev txhais Visiting Teaching Message, June 2016. Hmong. 12866 295
Xav Txog Qhov No
Lub tuam tsev cov kab ke thiab kev khi lus ua li cas txhawb peb lub dag zog thiab ua rau peb muaj hwj chim?