Iren Mahsen en Presidensi Keieu, Suhn 2016
Samatail, Atail Soun Kaweid
Sang President Dieter F. Uchtdorf
Sounsawas Keriau nan Presidensi Keieu
Mie pak komw kadingada ehu kakon en dipwisou, komw eri ale kisin likou en kaweid kakonkonpenehn dipwisouko oh kahpw medewe, “Met sohte wehwe mwahu”?
Ekei ansou, mendahte atail nseno oh koapworopwor, kitail kin ale ehu dipwisou oh idek, “Dahme met pahn wia?” de “Ia mwoamwen eh kak kakonokonpene?”
Atail pwunod laudkihla atail kilangada ni kilin kakono kisin kair ehu me kosoia, “Anahne— me sounpar 8 kohda en kakonepene.” Pwehki atail saikinte diarada ia mwomwen atail pahn kakonpene, atail koapworopwor de koahiek tikitikla.
Ekei ansou kitail kin kehn soangen irairo nan rongamwahuo. Ni atail kin ale kisehn padahk en rongamwahuo, kitail kin karipwide moangatail oh medewe ia wehwehn padahko. De ni atail kin kasawih pilehu padahk, kitail kin kak diarada me mendahte mwurin atail nantiong en wehwehkihla, kitail sohte kak esehla dahme kahrehda padahko wia kisehn rohngamwahuo.
Samatail Nanleng Iei Atail Soun Kaweid
Kalahnganki, pwe Samatail Nanleng ketkihong kitailehr mehn kaweid mwahukan pwehn koasone atail mour kan oh kamwahuiala pein atail wiewiah kan. Mehn kaweid pwukat kin doadoahk sohte katepe sounpar de irair en atail mour E ketkihong kitailehr rongamwahuo oh Mwomwohdiso en Sises Krais. E ketkihong kitailehr pilahn en kapit kitail sang nan dihp, plahn en komour, iei pilahn en popohlo. E sohte ketin mweidehng kitail en kelkelehpwki atail sawehweh de kahpwal akan nan mour wet, oh mahsani, “Kumwail wiwia pein kumwail. Paiamwahu. Pein diarada.”
Ma kitail pahn kanengamah oh rapahki ni mohngiong aktikitik oh lelepek, kitail pahn diar me Koht ketkihong kitailehr dipwisoun kaweid tohto pwehn wehwehki mwahu Sapwellime kehkehlik kan en ahneki popohl nan atail mour:
-
E ketkiheng kitailehr kisakis lap en Ngehn Sarawio, me kin wia atail soun sawas sang nanleng ni atail kin kaskuhlki duwen mahsen en Koht oh soang en kakainene atail madmadau oh wiewia en pahrekiong Sapwellime mahseno.
-
E ketin koasonedier kitail en kin lella Reh ansou koaros nan kapakap ni pwoson oh pekipek ni ineng mehlel.
-
E ketkihong kitailehr wahnparon oh soukohp en rahn pwukat, me kak ale kupwuren Koht nan rahn pwukat oh ahneki manaman en koasonehdi de katehngehdi pohn sampa oh nanleng.
-
E ketin kapwuredohr Sapwellime Mwomwohdisou—me audaudkihda souleng pwoson kei me kin doadoahk pene oh sawas pene ni arail kin raprapahki arail mour soutuk ni wahu, lemw oh popohl mwuledek.1
-
E ketkihong kitailehr pwuhk sarawi kan—Sapwellime mahsen kan me ntingdi ong kitail.
-
E ketkihong kitailehr dipwsoun doadoahk kapw tohto me pahn sewesei kitail ni atail weweid nan elen mour en tohnpadahk kan. Tohto dipwisou en doadoahk mwahu pwukat kak dierek nan LDS.org.
Dahme kahrehda Samatail Nanleng ketkihong kitailkiehr sawas laud pwukat? Pwehki E ketin pakohng kitail. Oh pwehki pein Ih ketin mahsani, Iet Sapwellimei doadoahk oh lingan—en ketkihong aramas mour kohkohlahte oh mour soutuk.2
Me wehwehki, Sahm Nanleng iei atail Koht, oh Koht iei atail soun kaweid.
Samatail Nanleng ketin mwahngi anahn en Sapwellime serihkan mwahu sang mehteikan. Iei Sapwellime doadoahk oh lingan en ketin sewese kitail ansou koaros, ketkihong kitail kaweid pwehn sewese paliwaratail oh palingenatail ni atail pahn pwurala Reh.
Pahpa Koaros Wia Soun Kaweid kei
Nan ekei wasa nan sampa, peneinei oh wasahn kouson kan kin kawauwih pahpa kan nan sounpwong en Suhn. E mwahu ansou koaros kitail en kin wauneki oh kawauwih atail pahpa/nohno kan. Pahpa kan kin wia mehkot mwahu tohto ong arail peneinei kan oh ahneki wiewia mwahu tohto. Soahng riau me keieu kesempwal me pahpa kan kin wiaiong neirail serihkan iei wia mehn karasaras mwahu oh wia soun kaweid. Pahpa kan sohte kin ndaiongte neirail serihkan dahme pwung oh sapwung; re pil sohte kin kesehiongte irail pwuken kaweid kan oh kasik me re pahn pein diarada dahme mwahu ong arail mour.
Pahpa kan kin kawied neirail seri kesempwal kan oh kasalehiong irail kahlmengi mwahu pwe ren kak alasang oh momourki mour mehlel. Pahpa kan sohte kin mweidohng neirail serihkan en kelepwla ahpw re kin mwadangete sewese irail pwek irailda ansou me re kin dipekelekel. Oh ekei ansou sang ni kaweid eripit kan, pahpa kan kin mweidong neirail serihkan en pein apwalih arail kahpwal pwe ren kak ale kaskuhl sang ie.
Kitail Koaros Wia Soun Kaweid kei
Ni en pahpahn sampa kan arail kaukaweid neirail serihkan, kitail anahne ehukiong sapwellimen Koht serihkan koaros ngehn en kaweid sohte lipilipil arail dih, wasahn kouson, de ihs irail. Tamataman, riatail sapwellimen Koht serihkan; kitail koaros wia peneinei soutuk tehieu.
Pwehki met, kitail koaros wia soun kaweid kei—me anahne pengla oh sewese mehteikan en wia atail kak en mwahu koaros. Pwehki kitail wia sapwellimen Koht, kitail kak en duwehla Ih. Pakoahng Koht oh aramas akan, peikiong sapwellimen Koht kosonned akan, oh ideidawehn karasaras en Krais iei me wia ahl inen, tehtikitik, oh kaperen me kin kahlwai kitail lahng pahn mwetehn samatail nanleng.
Ma Koht lapalahpieo kin ketin nsenohkin kitail pwehki E kin ketin wia atail soun kaweid men, ele kitail pil kak ehuohng riatail aramas akan, sohte lipilipil re poh da, irail mehn ia wasa, ma re kepwehpwe de soah, arail lokaia, mehnia palien lamalam irail iang. Kitail wiahla soun kaweid marain kei oh kapaiahda mour en mehteikan—kaidehnte neitail serihkante ahpw pil sapwellimen Koht seri koaros nan sampa.
© 2016 sang Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/15. Kamanaman ong kawehwe: 6/15. Kawehwehpen First Presidency Message, June 2016. Pohnpeian. 12866 885
Padahk sang ni Mahsen Wet
Komw kak tepkihda peidek rehn irail kan me komw kin kaskuhli ren medewe ansou ehu me Sahm Nanleng ketin kaweid irail. Komw kak peki rehrail en medewe duwen ansouo ma a duwehte ansou me re kin ale kaweid sang arail pahpahn sampao. Luke irail en ntingiedi mehkan me duwepenehte nan kaweid ko. Komw kak kangoange irail en soang alasang dahngehkan me irail ntingiedi ni arail pahn wia mehnkahlmengi mwahu men ong mehteikan.