Mensahe sa Visiting Teaching
Ang mga Ordinansa ug mga Pakigsaad sa Templo
Tun-i sa mainampuong paagi kini nga materyal ug tinguhaa nga masayud unsay angay nga ipakigbahin. Sa unsang paagi “Ang Pamilya: Usa ka Pamahayag ngadto sa Kalibutan” mopalambo sa inyong hugot nga pagtuo sa Dios ug mopanalangin niadtong inyong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang mga ordinansa nga gikinahanglan alang sa kaluwasan ug kahimayaan giubanan og mga pakigsaad uban sa Dios. “Ang paghimo ug pagtuman sa mga pakigsaad nagpasabut sa pagpili nga mahigut kita ngadto sa atong Amahan sa Langit ug ni Jesukristo,” miingon si Linda K. Burton, kinatibuk-ang presidente sa Relief Society.1
Si Elder Neil L. Andersen sa Korum sa Napulog Duha ka mga Apostoles miingon, “Ang Ginoo nag-ingon, ‘Diha sa mga ordinansa … ang gahum sa pagkadiosnon gipakita.’
“Adunay espesyal nga mga panalangin gikan sa Dios sa tanang takus nga tawo kinsa gibunyagan, midawat sa Espiritu Santo, ug miambit kanunay sa sakrament.”2
“Kon ang mga lalaki ug mga babaye mangadto sa templo,” miingon si Elder M. Russell Ballard sa Korum sa Napulog Duha ka mga Apostoles, “mahatagan sila sa pareho nga gahum, nga mao ang gahum sa priesthood …
“… Ang tanang lalaki ug babaye makagamit niini nga gahum alang sa tabang diha sa kaugalingon nilang kinabuhi. Ang tanan nga mihimo og sagradong mga pakigsaad sa Ginoo ug kadtong mitahud sa mga pakigsaad mahimong makadawat og personal nga pagpadayag, nga mapanalanginan pinaagi sa pagpangalagad sa mga anghel, nga makigsulti sa Dios, nga makadawat sa kahingpitan sa ebanghelyo, ug, sa katapusan, mahimong mga manununod kauban ni Jesukristo sa tanan nga anaa sa atong Amahan.”3
Dugang nga mga Kasulatan
1 Nephi 14:14; Doktrina ug mga Pakigsaad 25:13; 97:8; 109:22
Buhi nga mga Sugilanon
Niadtong 2007, upat ka adlaw human sa grabing linog sa Peru, si Elder Marcus B. Nash sa Seventy nakighimamat sa branch president nga si Wenceslao Conde ug sa iyang asawa, si Pamela. “Si Elder Nash nangutana ni Sister Conde kon kumusta na ang iyang gagmayng mga bata. Uban sa pahiyum, mitubag siya nga tungod sa kaayo sa Dios luwas ug maayo ra silang tanan. Nangutana siya sa balay sa mga Condes.
“‘Wala na,’ yano siyang miingon.
“… ’Ug bisan pa niana,’ miingon si Elder Nash, ‘ikaw nagpahiyom samtang kita nag-istorya.’
“’Oo,’ siya miingon, ‘ako nag-ampo ug ako malinawon. Aduna kami sa tanan nga among gikinahanglan. Ania namo ang usag usa, ania namo ang mga anak, nabugkos kami sa templo, ania namo kining talagsaon nga Simbahan, ug ania namo ang Ginoo. Matukod namo pag-usab ang balay uban sa tabang sa Ginoo.’ …
“Unsa man ang mahitungod sa paghimo ug pagtuman sa mga pakigsaad uban sa Dios nga naghatag nato og gahum sa pagpahiyom sa mga kalisud, sa pag-usab sa mga kalisdanan ngadto sa kadaugan … ?”
“Ang tinubdan mao ang Dios. Ang atong access niana nga gahum ipaagi sa atong mga pakigsaad uban Kaniya.”4