Hop Blong Gat Lav ia Blong Famli we i Nosave Finis

Aot long evri presen we Papa blong yumi long Heven we i lavem yumi tumas i bin givim long ol pikinini blong Hem, hemia we i bigwan bitim evri narawan hem i laef we i nosave finis (luk long D&C 14:7). Presen ia hem i blong laef wetem God we I Papa mo Pikinini blong Hem we yumi lavem tumas olsem ol famli. Insaed nomo long ol kingdom blong God we i hae bitim ol narafala, we hem i selestial, bambae lav blong famli i save gohed.

Evriwan long yumi i stap hop from glad ia blong laef wetem ol famli long lav. Long samfala long yumi, hemia hem i wan filing we yumi no eksperiensem yet—wan filing we yumi save se yumi save gat be yumi no kasem yet. Maet yumi luk long laef blong ol narafala. Long ol narafala long yumi, lav blong famli i kamaot moa klia mo gud tumas taem ded i seraotem yumi long wan pikinini, wan mama, wan papa, wan brata, wan sista, o wan bubu we i lavem yumi mo yumi lavem tumas.

Yumi evriwan i bin filim hop ia se bae wan dei bae yumi save filim bakegen lav blong famli memba ia we yumi lavem tumas mo gat filing ia we i soa tumas blong wantem blong haggem hem bakegen.

Papa blong yumi long Heven i save hat blong yumi. Stamba tingting blong Hem i blong givim hapines long yumi (luk long 2 Nifae 2:25). Mo Hem i givim presen ia we i Pikinini Blong Hem blong mekem se glad ia blong save stap olsem ol famli i gohed blong oltaem. From we Sevya i brekem ol rop blong ded, bambae yumi save laef bakegen afta long ded. From we Sevya i pem praes blong ol sin blong yumi, yumi save, wetem fet blong yumi mo fasin blong sakem sin, kam klin inaf blong stap long selestial kingdom, ples we ol famli oli save stap tugeta wetem lav foreva.

Sevya i bin sendem Profet Elijah i go long Josef Smit blong putum bak ol ki blong prishud (luk long D&C 110) Wetem ol ki ia, paoa blong sil i bin kam, i stap givim bigfala presen ia long ol pikinini blong Hem—laef we i nosave finis insaed long ol famli we bae stap tugeta foreva.

Hem i wan samting we evri pikinini blong God we i kam long wol ia i gat raet long hem. Wan aot long tri pat blong ol pikinini blong Hem i no wantem hemia long spirit wol. From fet we i no naf afta oli go agensem, olget i jus blong no wantem save glad ia blong presen blong Papa long Heven blong ol famli we i nosave finis.

Blong yumi we yumi bin pasem impoten tes ia long spirit laef bifo wol ia mo yumi kwalifae blong kasem presen blong bodi blong mit mo bun, joes blong yumi blong jusum laef we i nosave finis, i stap yet blong yumi mas mekem. Sapos yumi bin kasem blesing blong save faenem gospel we i bin kambak, yumi save jus blong mekem mo holem taet ol kavenan wetem God we i kwalifaem yumi from laef we i nosave finis. Taem yumi stanap strong wetem fet, bambae Tabu Spirit i konfemem hop mo biliv we yumi gat long yumiwan se yumi stap long stret rod blong laef we i nosave finis, blong stap laef wetem ol famli foreva insaed long selestial kingdom.

Blong samfala, glad ia we i nosave finis i stap lus o iven hop i stap lus. Ol papa mo mama, ol brata, mo ol sista maet oli bin mekem ol joes we i nomo kwalifae olgeta blong kasem laef we i nosave finis. Maet bae yu stap tingting se yu bin kwalifae tru long Atonmen blong Jisas Kraes o no.

Wan profet blong God i givim wan kaonsel we i bin givim pis long mi. Mi bin stap wari se ol joes blong ol narafala man bae i mekem i had blong famli blong mi bae save stap tugeta foreva. Hem i bin talem, “Yu stap wari from rong problem. Yu nid blong stap laef klin inaf nomo blong selestial kingdom, mo ol famli bae kam moa gud bitim we yu save tingbaot.”

Long yumi we ol pesenol ekperiens o mared mo pikinini—o i nogat hemia—i blokem ol hop blong yumi, mi givim witnes blong mi: Papa long Heven i save yu mo lavem yu olsem spirit pikinini blong Hem. Taem yu bin stap wetem Hem mo Pikinini blong Hem we yumi lavem tumas bifo laef long wol ia, Tufala i bin putum long hat blong yu, hop blong gat laef we i nosave finis. Wetem paoa blong Atonmen blong Jisas Kraes i stap wok mo wetem Tabu Spirit i stap lid, bambae yu save filim naoia mo bae yu filim long wol we bae kam; lav blong famli we Papa blong yu mo Pikinini blong Hem we yumi lavem tumas, i wantem tumas blong yu kasem.

Mi testifae se taem yu stap laef klin inaf from selestial kingdom, promis blong profet se bae “famli i kam moa gud bitim we yu save tingbaot” bambae hem i blong yu.