Kopworopwor en Limpoak Soutuk en Peneinei

Nan kisakis koaros me Samatail Nanleng ketikiongehr Sapwelime seri kan, me keieu laud iei mour soutuk (tehk D&C 14:7). Kisakiso iei en kousonla pahnkupwur en Samatail Koht oh Sapwellime Iehroso kokolahte ni duwen peneinei kei Ihte nan wasa me keieu ileileo nan wehin Koht kan, celestial, me limpoakpene en nan mour en peneinei kin pepeusla.

Kitail koaruhsie kin men patapatpene ni popohl nan peneinei kan me limpoak, Ong ekei kitail, e wia pepehm ieu me kitail saik alehdi—ehu pepehm me kitail ese me kak alahldi ahpw kitail saikinte diarada. Kitail mwein kilangehr nan mour en aramas teikan. Ong ekei kitail, limpok en peneinei mwomwen mehlel douluhl oh kesemwpwal ni ansou me mehla kin katohreikitail sang emen seri, emen nohno, emen pahpa, emen riatail pwutak, emen riatail serepein, de emen nohno de pahpa kahlap me kitail poakohng.

Kitail koaruhsie pehm ehr koapworopwor me ehu rahn kitail kak pwurehng pehm soangen limpoak mwahu en tohn peneinei meno me kitail poakohng douluhl oh ansouet kin mehntehn pwurehng pwoalehdi.

Samatail Nanleng me limpoako mwahngih mohngiongitail kan. Sapwellime pwukoah iei en ketikiheng kitail popohl (tehk 2 Nephi 2:25). Oh E ketikidahr kisakis en Sapwellime Iehroso pwe en kamangaiala popohl en katengtengpenekan me kin mihmie kohkohlahte. Pwehki Sounkomouro ketin powehdier mehla, kitail pahn iasada. Pwehki E ketin tomwikihlahr dipatail kan, kitail kak, sang ni atail pwoson oh koluhla, warohngala nan wehin celestial, wasa me peneinei kan kin katengtengpene ni limpok kokolahte.

Sounkomouro ketikidohr Soukohp Elaisa rehn Joseph Smith pwe en kapwuredo kih kan en prihsduhd (tehkD&C 110). Me patehng kih ko iei manaman en katengtengpene, me kin kiheng Sapwellimen Koht kisakis keieu laudo ong Sapwellime seri kan—mour soutuk nan peneinei kan pwe ren katengtengpene kokolahte.

E wia kisakis ehu me seri en Koht koaros me kin kohdo sampah kak alehda. Silikis ehu en Sapwellime seri ngehn kan soikala Sapwellime kisakiso nan sahpwen ngehno. Ni soh-pwoson me konehng oh mwuri aklapalapada, irail eri pilada ren sohte douluhl wehwehki kaperenpen Sapwellimen Sahm Nanleng kisakis en peneinei soutuko.

Ong kitail kan me pweidahr nan sikeng en pilipil kesemwpwal nan ansou me kitail wia ngehn kei oh eri mweimweieng alehdi kisakis en wiahla paliwar, pilipil kesemwpwal en mour soutuko mihmihte rehtail. Ma kitail kapaida pwehn diarada rongamwahu kopwurpwurdohro, kitail kak pilada kitail en wiahda oh kolokol inou kan rehn Koht me kin kamangaiong kitail ong mour soutuk. Ni atail kin dadaurete pwosono, Ngehn Sarawio pahn kamanahieng kitail kopworopwor oh likilik me kitail mihmiher nan ahl ong mour soutuk, en momour nan peneinei kan kokolahte nan wehin celestialo.

Ong ekei, popohl soutuko kak mwomwen sohte katepe de pil ehu kopworopwor me sosohrala. Nohno oh pahpa kan, seri kan, riatail pwutak kan oh serepein kan kak wiadahr arail pilipil me mwein kak karehda arail sohte alehdi mour soutuk. Kumwail pil kak medewe ma kumwail warohngehr alehdi sang ni Tomw en Sises Kraiso.

Emen Soukohp en Koht kihengiehier kaweid ehu pako me kin kihongie meleilei. I pwunodkihda ma ahn mehtei kan pilipil kan pahn kakete kahrehda aht peneineio eh sohla kak mihmipene kohkohlahte. E masanih, “Ke pwunpwunodiki duwen mehkot me sapwung. Ke momourki ahmw warohng weihn celestial, oh kaunop kan en peneinei pahn wia mehkot kopwuriamwei mehlel sang dahme ke kak medewe.”

Ong koaros me pein arail wehehki de arail pwopwoud oh seri kan—de sohte mehkot—katikalahr arail koapworopwor, I kiheng kumwail ahi kadede: Sahmo Nanleng mwahngi oh poakohng kumwail ni duwen amwail wia Sapwellime seri ngehn kei. Ni ansouo me kumwail mihmi Reh oh Sapwellime Iehroso mwohn mour wet, Ira ketikidiong nan amwail mohngiong kan kopworopwor me kumwail ahniki ong mour soutuk. Sang ni manaman en Tomw en Sises Kraiso eh wie doadoahk oh patehng kaweid en Ngehn Sarawio, kumwail kak pehm ansouwet oh pahn pehm nan mour me pahn kohdohu limpoak en peneinei me Samamwailo oh Sapwellime Iehroso ketin kupwurki kumwail en ale.

I wia ahi kadede me ma kumwail momourki amwail warohng weihn celestial, inoun kokohpo me “koasoandien peneinei pahn inenen wia mehkot me kopwuriamwei mehlel sang dahme kumwail kak medewe” pahn wia amwail.