Mahsen en Padahk en Pas, Oakos 2016
Kakairada Ehupenehn Peneinei kan
Onop ni kapakap dipwisou wet oh rapahki ken esehla dahme ken ehukihong mehteikan. Ia duwen wehwehkihla “Peneinei: Kalohk Ehu ong Sampah” eh kin kalaudehla ahmw pwoson Koht oh kapaiada irail akan me ke kin pwukoahki ansoun padahk en pas? Pwehn alehdi pil ekei iren kapehse, tehk reliefsociety.lds.org.
Pwoson, Peneinei, Sawas
Ehu pwopwoud ahneki ehu pwukoah kesempwal en poakohng oh apwalih emen emen oh neira seri kan.1 “Ni imwatail en wia Sapwellimen Koht wasahn limpoak oh papah,” Piresiden Russell M. Nelson, piresiden en Pwihn en Wahnparon Ehk-riemeno me mahsanih.
“Samatail Nanleng kupwurki ohl oh lih pwopwoud kan en mwahuong emen emen oh wauniki oh apwalih neirail seri kan ni duwen arail wia sohso ieu sang rehn Kauno.”2
Nan Pwuhken Mormon, Jacob koasoia me limpoak me ohl akan ahnikiheng arail pwoud kan, limpoak me lih akan ahnekiheng arail pwoud kan, oh limpoak me irail koaros ahnikiheng neirail seri kan pil wia kahrepe kei me irail Lamanite ko inenen mehlelki sang irail Nephites ko. (tehkJacob 3:7)
Ehu wiepe me keieu mwahu kan en lukehdo limpoak oh peren nan imwatail kan iei koasoai mwahu ong irail kan me towe atail peneinei. Kosoi mwahu kin wahdo Ngehn Sarawio. Sister Linda K. Burton, piresiden lap en Pwihn en Sawas en Lih, peki kitail en medewe mwahu: “Ia uwen totohn atail kin ‘koasoai mwahu ong emen emen kitail’?”3
Pwuhk Sarawi Kapatapat kan
Soai kan me Momour
Elder D. Todd Christofferson en Pwihn en Wahnparon Ehk-riemeno koasoiahda mehkot me e alehdi ni ansou e tikitiko me kahrehieng eh esehla kesempwalpen peneinei ehu me limpoakpene. Ni ansou me ih oh rie pwutak ko tikitik, arail nohnohu ale koadoahkepen kanser me karehda peh pali koahieko eh kin medek oh ih eri sohte kin kak doadoahngki. Pwehki arail peneineio pwutak tohr, ain kalap wiawi, ahpw ni ansou me ah nohnohu kin ain, e kin kalap uhdi oh kohla nan arail perehn meiro pwe en sengiseng lao medeko sarasang.
Ni ansou me ahn Elder Christofferson pahpao medewehla dahme wiewiawio, e sohla mwengehn souwas kerenieng sounpar ehu ni rir pwe en nakidala mwohni me itar mehn pwainda ehu mesihn me kin kamangaiala ain. Sang ni ah limpok ong ah pwoudo, e wia mehn karasaras en kakairada nan peneinei kan ong nah pwutak ko. Me pid patpen mwahu wet, Elder Christofferson koasoia, “I sohte tehk ahn ahi pahpao tohnmetei oh mwekid en limpoak ong ahi nohnohu ni ansouo, ahpw met I esehier, I kin ndahng pein ngehi, ‘Mie ohl emen.’”4
© 2016 by Intellectual Reserve, Inc. All rights reserved. Ntingda nan USA. Kamanaman ong lokaiahn wai: 6/16. Kamanaman ong kawehwe: 6/16. Kawehwehpen Visiting Teaching Message, August 2016. Pohnpeian. 10870 885
Medewe Met
Ia duwen limpoak oh apwalih emen emen eh kin lukehdohng Ngehno nan imwatail kan?