Kōjparok Kien ko im Iakwe ro Jet

N̄e jej ļōmņak kōn iakwe, ekkā an men ko m̧oktata itok n̄an kōļmenļo̧kjeņ eo ad āinwōt pija ko, tōn̄al, im wūt ko. Ak iakwe—em̧ool ej juon iakwe—em̧wilaļ im eļapļo̧k jān juon make. Jisōs Kraist eaar mour im mej kōn kōj kōnke Eaar iakwe kōj. Ilo m̧ool, kien ko ruo reļļap rej iakwe Anij im iakwe aolep (lale Matu 22:36–40). Ak ewi wāween ad kwaļo̧k iakwe n̄an ro jet?

Būreejtōn Uchtdorf eaar kwaļo̧k būrabōļ eo an Kraist kōn ļaddik ro ruo, juon eaar jerbal n̄an jemen im juon eaar jab. Rilo̧mo̧o̧r eaar kalikar bwe ļaddik eo eaar pokake jemān ej lukkuun iakwe e. Ejja āinwōt in, n̄e jej pokake kien ko an Anij, jej kwaļo̧k bwe jej iakwe E im kōnaan jepļaak ļo̧k n̄an Ippān.

Ak ewi wāween ad kwaļo̧k ad iakwe n̄an aolep? Būreejtōn Uchtdorf eaar kōmeļeļe menin barāinwōt: “Eļan̄n̄e jej lukkuun iakwe armej ro ad, jej leļo̧k jipan̄ eo ad ‘n̄an rijeram̧ōl im riaikuj ro, rinan̄inmej im ro rej liājļoļ.’ Bwe ro rej kōm̧m̧an kain in ilo tūriam̧o im jipan̄, ejja rein wōt rej rikaļooran Jisōs Kraist.”

Kōn menin tok ālik n̄e kwoj ioon jinōm̧ im jem̧ōm̧, juon jeim̧ ak jatūm̧, ak m̧ōttam̧, ļōmņak in jerbal n̄an er im kwaļo̧k am̧ kea kake er. Eban kōm̧m̧an wōt bwe kom̧in m̧ōņōņō, ak enaaj kōm̧m̧an bwe Jemedwōj Ilan̄ en bar m̧ōņōņō.