President a Odzi Kan na n’Apamfo Amandzɛɛbɔ, Fankwa 2016
Ɔdɔ n’Ekyir no, Nna Ebɛn?
President Dieter F. Uchtdorf ne kasae
Ɔpamfo a Otsĩa Ebien wɔ President a Odzi Kan na n’Apamfo mu
Hɛn nkɔnhyɛnyi dɔfo, President Thomas S. Monson, akyerɛkyerɛ dɛ “asɛmpa no ne ngyinado ankasa no nye ɔdɔ.”1
Ɔdɔ no ho hia tsitsir ara ma Jesus frɛɛ no “mbra no mu asɛm a odzi kan na ɔsõ” na Ɔsee dɛ mbra nye nkɔnhyɛfo nsɛm nyina sɛn do.2
Ɔdɔ nye dza yɛyɛ no wɔ Asɔr mu nyina no ne fapem botae. Nhyehyɛɛ biara, nhyiamu biara a yɛkã ho dɛ Jesus Christ esuafo no ne farbaa no ɔsɛ dɛ ofi su yi mu—osiandɛ sɛ yennyi ayamuyie a, “Christ no dɔ mapã no a, yɛnnsɛ hwee.3
Sɛ yɛdze hɛn adwen na hɛn akoma tse iyi ase a, sɛ yɛpaamu kã hɛn dɔ ma Nyankopɔn na hɛn mfɛfo a—nna ebɛn?
Ana yeenya ayamuhyehye na ɔdɔ ama binom no, ɔnoara dɔɔsõ a? Ana yɛrepaamu akã hɛn dɔ ama Nyankopɔn na hɛn fipamfo hyɛ hɛn asodzii a yɛwɔ ma Nyame no mã a?
Mba Mbanyin Beenu no ho Abɛbusɛm
Jerusalem temple ho no, Jewfo asɔfompanyin nye ɔman mpanyimfo baa Jesus nkyɛn dɛ wɔdze N’anomu nsɛm rubosua No efir. Mbom, Agyenkwa no kãa hɔn asɛm bi dze daanee asɛm no kɔr hɔnara hɔn do.
Ɔhyɛɛ ase dɛ “Nyimpa bi wɔ mba beenu,” Egya no kɔr nyia odzi kan no hɔ kɛsee no dɛ ɔnkɔ nkɛyɛ edwuma wɔ no wenyin ture no mu. Naaso babanyin no powee. N’ekyir no babanyin no “nuu noho na ɔkɔree.”
Na nkyii egya no kɔr ne babanyin a otsĩa ebien no hɔ kɛsee no dɛ ɔnkɔ nkɛyɛ edwuma wɔ wenyin ture no mu. Babanyin a otsĩa ebien no maa no awerɛhyɛmu dɛ ɔbɔkɔ, naaso ɔannkɔ ara da.
Afei Agyenkwa no danee baa asɔfo na mpanyimfo no hɔ na Obisaa dɛ, “Hɔn beenu yi mu woana na ɔyɛɛ n’egya ne pɛ?”
Nna ɔwɔ dɛ wɔgye to mu dɛ ɔyɛ ba no a odzi kan no—nyia ɔkãa dɛ ɔronnkɔ na ekyir no onuu noho na ɔkɛyɛɛ edwuma wɔ wenyin ture mu no.4
Agyenkwa no faa dɛm asɛm dze tsĩi mu kyerɛɛ nkyerɛkyerɛ tsitsir bi—ɔyɛ hɔn a wɔyɛ setsie ma mbrasɛm no na wɔdɔ Nyame ampaara no.
Bia na iyi nye siantsir a Jesus see nkorɔfo no dɛ wontsie Phariseefo na akyerɛwfo no hɔn nsɛm no na mbom mma wonndzi hɔn fasusu do no.5 Nyamesom ho akyerɛkyerɛfo yinom no wɔse ara na wɔnnyɛ. Wɔdɔ dɛ wɔkasa fa nyamesom ho, mbom awerɛhow mu ara woennhu ne tsirmpɔw no.
Ndzeyɛɛ na Hɛn Nkwagye
Adzesuadze a odzi ewiei mu kor a Agyenkwa no dze maa N’esuafo no mu no, Ɔkasaa kyerɛɛ hɔn faa Atsɛmbu a odzi ewie no ho. Wɔbɛpaapaa emumuyɛfo no efi atseneneefo no mu. Apapafo no benya onnyiewiei nkwa edzi; na wɔdze emumuyɛfo no bɔkɔ onnyiewiei ntsẽa mu.
Nna ebɛn nsonsonee na ɔda ekuw ebien no ntamu?
Hɔn a wɔdze hɔn ndzeyɛɛ kyerɛɛ hɔn dɔ no, wɔgyee hɔn nkwa. Hɔn a wɔannyɛ no wobuu hɔn fɔ.6 Hɛn ndzeyɛɛ wɔ hɛn daa daa abrabɔ mu na ɔbɛgye dase wɔ hɛn nokwar nsakyeree dɛ yɛafa Jesus Christ asɛmpa no su pa na nkyerɛkyerɛ no.
Ewiei no, yɛpaamu kã hɛn dɔ ma Nyankopɔn na hɛn fipamfo ara no remma yɛmmfata nkwagye ntowdo. Osiandɛ, dɛ mbrɛ Jesus kyerɛkyerɛɛ no, “nyɛ obiara a ɔse me dɛ, Ewuradze, Ewuradze, na ɔbɔkɔ sor ahenman no mu; na nyia ɔbɛyɛ m’Egya a ɔwɔ sor no ne pɛ a.”7
Ebɛnadze na Odzi Ɔdɔ ekyir?
Asɛmbisa “Ɔdɔ n’ekyir no, nna ebɛn? no mbuae no botum ayɛ sin na tɔɔtsen ara. Sɛ yɛdɔ Agyenkwa no ampaara a, yɛkyɛn hɛn akoma ma No na yɛnantsew wɔ osũanyiyɛ ananmɔn kwan no do. Sɛ yɛdɔ Nyankopɔn a, yɛbɛper dɛ yebedzi Ne mbrasɛm do.8
Sɛ yɛdɔ hɛn mfɛfo ampaara a, yɛtsen hɛnho dze boa “ehiafo na abɔbɔfo, ayarfo nye hɔn a wɔretseetsee hɔn.”9 Hɔn a wɔdze etuhoakyɛ yɛ ayamuhyehye ndzeyɛɛ yinom dze som no,10 hɔnara nye Jesus Christ esuafo no.
Iyi nye dza odzi ɔdɔ ekyir no.
Iyi nye Jesus Christ asɛmpa no ne ngyinado ankasa no.
© 2016 Intellectual Reserve, Inc. Wɔakora ho tumdzi nyina. USA na wotsintsimii. English approval 6/16. Translation approval 6/16. First Presidency Message, September 2016. ne nkyerɛasee. Fante. 12869 502
Erekyerɛkyerɛ efi Amandzɛɛbɔ Yi Mu
President Uchtdorf kyerɛ mu dɛ Jesus Christ esuafo anokwafo no nye hɔn a wodua hɔn ndzeyɛɛ do dze kyerɛ hɔn dɔ ma No na binom no. Ɔkyerɛ hɛn dɛ “sɛ yɛdɔ Agyenkwa no ampaara a, yɛkyɛn hɛn akoma ma No na nkyii yɛnantsew osũanyiyɛ ananmɔn kwan no do.” Susu dɛ ibebisa hɔn a ekyerɛ hɔn adze no akwan horow a ɔdɔ ahyɛ hɔn nkuran ma wɔanantsew afa osuanyiyɛ anamɔn kwan no do. Ibotum enye hɔn akyɛ wo sũahu horow no akã ho. Ibotum esusu dɛ ibɔto nsa afrɛ hɔn ma wɔabɔ mpaa ebisa ayamuyie na ahoɔdzen bi akã ho ama wɔdze ɔdɔ eedzi dwuma.