Visiting Teaching Amandzɛɛbɔ, Fankwa 2016
Baatanyɛ yɛ Asodzi Krɔnkrɔn
Mpaabɔ mu ara sũa adzesũadze yi na hwehwɛ dɛ ibohu dza ibɛkyɛ. Eretse “Ebusua No: Dawurbɔ a wɔdze ma Wiadze” ase no besi dɛn bɛma wo gyedzi wɔ Nyankopɔn mu enyin na woehyira hɔn a idua visiting teaching do ehwɛ hɔn do no? Ho nsɛm mbordo no, kɔ reliefsociety.lds.org.
Hɛn Ɔsor Egya dze ebusua ebusua bɔbɔɔ adze ama wɔaakyerɛkyerɛ hɛn nokwar fapem wɔ ɔdɔ ehuu mu. President Thomas S. Monson see dɛ: “Bɔ wo ba n’abaw do na fua no, taa se dɛ, ‘Modɔ wo,’ daa kã dɛ meda wo ase. Mma mma nsɛnhia a ohia anoyi no nnsom bo nnkyɛn nyimpa no a ɔsɛ dɛ wɔdɔ no no.”1
Susan W. Tanner a, nkyɛ ɔyɛ wiadze mfɛndzanan Young Women president no, kyerɛkyerɛɛ dɛ: “Hɛn Egya a Ɔwɔ Sor yɛ fasusu ma nhwɛdo a ɔsɛ dɛ yedzi do. Ɔdɔ hɛn, Ɔkyerɛkyerɛ hɛn, Ɔwɔ hɛnho abotar, na Ɔdze hɛn pɛ ahyɛ hɛn nsa. … Ɔtɔfabi a ntsetsee, a ɔkyerɛ ‘erekyerɛkyerɛ no,’ wɔdan no yɛ no nkasa enyim. Mbofra—nye nkorɔfo a wogu mfe ahorow nyina mu no—dua ɔdɔ na nkuranhyɛ do tu hɔn suban mpon kyɛn ofi mfom no nhwehwɛɛ do.”2
Elder Quentin L. Cook a ɔkã Asomafo Duebien no hɔn Quorum ho no kãa dɛ, “Sɛ nokwar mu ara yɛbɔ ebusua mpaabɔ, yɛyɛ kyerɛwsɛm adzesũa, ebusua ewimbir fie nhyiamu, asɔfodzi nhyira na yesie Ahomgyeda no a, hɛn mba bɛyɛ … ahoboa ama onnyiewiei fie asetsena wɔ sor a, biribiara a ɔbɔto hɔn wɔ wiadze a no mu yɛ dzen no, remmfa ho.”3
Kyerɛwsɛm a Ɔkã ho
1 Nephi 8:37; 3 Nephi 22:13; Nkyerɛkyerɛ na Ahyɛmudzi 93:40; 121:41
Atseasefo ho Nsɛm
Elder Robert D. Hales a ɔkã Asomafo Duebien no hɔn Quorum ho no kãa dɛ, “Nna merekenkan dawurbɔ krataa no na me nanaba banyin no kor fowee bɛdaa mo do. “Ber a mokɔr do kenkanee no metsee ne ndze dɛɛdɛw no dɛ ɔrekãsakasa wɔ ekyir. Hom nhwɛ m’ahobow ber a, mber tsiabaa ekyir no, ɔhom noho bɛhyɛɛ emi na krataa no ntamu. Osuoo m’enyim wɔ ne nsamu na ɔdze no hwen faam medze ho, na obisaa dɛ, ‘Grandpa! Ana ehyɛ mu wɔ hɔ a?’
“… Yɛhyɛ mu wɔ hɔ no kyerɛ dɛ yɛtse mbabun hɔn akoma ase na yɛnye hɔn nya nkitahodzi. Na yerenya nkitahodzi no nnkyerɛ dɛ yɛnye hɔn ridzi nkɔmbɔ ara, mbom dɛ yɛnye hɔn so reyɛ adze abɔ mu. …
“Otwar dɛ yɛyɛ nhyehyɛɛ ma mber pa a wɔdze kyerɛkyerɛ no yɛmma ɔmmpa hɛnho. …
“… Morokɔ do bɔ bra no, nna muhu me mbabun ber mu mber pa a wɔdze kyerɛkyerɛ no yie, nkanka dza m’awofo dze maa me no a, wɔakã m’abrabɔ ma mayɛ me nyimpa ban yi.”4
© 2016 Intellectual Reserve, Inc. Wɔakora ho tumdzi nyina. USA na wotsintsimii. English approval 6/16. Translation approval 6/16. Visiting Teaching Message, September 2016 ne nkyerɛasee. Fante. 12869 502
Susu Iyi Ho
Dɛn ntsi na ɔdɔ na fasusu ndzeyɛɛ na wɔdze kyerɛkyerɛ asɛmpa no yie no?