Mga Sugo = Gugma

Hinumdumi sa dihang gamay pa mo ug ang inyong mga ginikanan dili motugot ninyo nga magdula sa karsada nga daghan og sakyanan? o sa dihang gipakaon mo nila og daghang utanon o pakatulgon og mas sayo kay sa ganahan ninyo?

Tingali wala mo makasabut nganong dunay daghan kaayong mga lagda. Ug tingali dili mo kanunayng malipayon bahin niini. Apan karon nga nagkaedaran na mo, inyo bang nakita nganong gihatagan mo sa inyong mga ginikanan sa tanan niadtong mga lagda?

Tungod kadto kay gihigugma mo nila ug ganahan sa unsay labing maayo para ninyo.

Isip ang labing hingpit nga ginikanan, gihatagan kita sa Langitnong Amahan og mga lagda o mga sugo tungod sa samang rason: Iya kitang gihigugma ug ganahan sa unsay labing maayo para nato. Labaw pa gani niana, gusto Niya nga mahisama kita Kaniya ug makadawat sa tanan nga anaa Kaniya.

Si Elder Dallin H. Oaks sa Korum sa Napulog Duha ka mga Apostoles mipasabut niini pinaagi sa usa ka sambingay:

“Usa ka adunahan nga amahan nasayud nga kon itugyan niya ang iyang katigayunan ngadto sa usa ka anak nga wala pa mapalambo ang gikinahanglan nga kaalam ug kahamtong, ang kabilin tingali masayang lang. Miingon ang amahan ngadto sa iyang anak:“

‘Ang tanang anaa nako akong gitinguha nga ihatag nimo—dili lang ang akong katigayunan, apan ang ako usab nga posisyon ug kahimtang taliwala sa katawhan. Kanang unsay anaa nako dali ra nakong mahatag nimo, apan kanang unsa ako maoy kinahanglan nimong mabatunan sa imong kaugalingon. Makwalipikado ka alang sa imong kabilin pinaagi sa pagkat-on kon unsay akong nakat-unan ug pinaagi sa pagpakabuhi sama sa akong pagpakabuhi. Ihatag nako nimo ang mga balaod ug mga baruganan diin akong naangkon ang akong kaalam ug kahimtang. Sunda ang akong ehemplo, mobuntog sa unsay akong nabuntog, ug mahimo ka kon unsa ko, ug ang tanan nga anaa nako maimo.’”¹

Sama sa amahan diha sa istorya ni Elder Oaks, gusto sa Langitnong Amahan nga atong maangkon ang tanan nga anaa Kaniya ug mahimo kon unsa Siya. Ang Iyang mga sugo sama sa mga paagi sa pagpauswag aron makatabang nato nga makakat-on ug molambo ug mahisama Kaniya.

“Ako mohatag nganha kaninyo og bag-o nga sugo, … o, sa lain nga pagkasulti, Ako mohatag nganha kaninyo og mga panudlo unsaon ninyo paglihok diha sa akong atubangan, nga kini unta mobalik nganha kaninyo alang sa inyong kaluwasan” (D&P 82:8–9).

Sama sa usa ka gamayng bata nga wala makasabut nganong dili siya tugutan nga magdula sa tunga-tunga sa samok, peligro nga karsada, mahimong dili nato kanunayng masabtan ang rason sa piho nga mga sugo o mga sumbanan. Apan kon masabtan nato nga gihatagan kita sa Dios og mga sugo tungod kay Iya kitang gihigugma ug gusto nga mogiya kanato aron mahisama kita Kaniya, mas sayon ang pagsunod Kaniya.

Mahimo ninyong hunahunaon ang matag sugo isip usa ka dakong karatula nga “Gihigugma ko ikaw!” gikan sa Dios. Ug kon mopili kita nga motuman sa Iyang mga sugo, sama ra nga kita nag-ingon nga “Gihigugma ko ikaw!” balik ngadto Kaniya.

Si Presidente Dieter F. Uchtdorf, Ikaduhang Magtatambag sa Unang Kapangulohan, yanong mipahayag niini sa dihang iyang gitubag ang pangutana nga “Nganong magpakabana man sa mga sugo sa Dios?”

“Nagsunod kita sa mga sugo sa Dios—gumikan sa atong gugma Kaniya! …

“… Ang atong pagkamasulundon sa mga sugo sa Dios nahimo isip usa ka natural nga resulta sa atong walay katapusang gugma ug pasalamat alang sa kaayo sa Dios.”²

Gihatagan kita sa Langitnong Amahan sa tanan nga anaa kanato—lakip na sa abilidad sa paglihok ug gani sa hangin nga atong gihanggap—ug ang Iya lamang gipangayo mao nga atong tumanon ang Iyang mga sugo (tan-awa sa Mosiah 2:21–22). Kini ang labing maayo nga paagi nga mapakita nato ang atong gugma ug pasalamat ngadto Kaniya.

Si Jesukristo Mismo ang misulti sa ingon (tan-awa sa Juan 14:15).

Nganong ang Langitnong Amahan mihatag man kanato og mga sugo? Tungod kay Iya kitang gihigugma.

Nganong motuman man kita sa Iyang mga sugo? Tungod kay ato Siyang gihigugma.

Ang mga sugo katumbas sa gugma.

Ingon ana ra kini ka yano.