Mweengara, Ara utu
Te Aki Mamatam ao te Tataro ibukin Emma
E maeka te tia koro rongorongo n te Capital Region i Denmark.
Imwiin bwakan natiu te aine man te winto, I iangoa makura ae korakora e a roko ni koaua.
Image © iStock/Thinkstock
A tibwa oki au utu man te motirawa ae tamaroa. Imwiin te katairiki I katikuia uoman natira, Markus aua ana ririki ao Emma teniua ana riiriki, n takakaro n te ruu ieta n te ka aua ni burooa. I Denmark, ao winto a uki nako n aron bwain kainan winto. Aki toki n rokanaki winto, ma ti a tia ni katikui n uki teutana n tain ara motirawa bwa e aonga te auti n uki angina n tain ara tai ni mwananga.
Ngke I karaoi bwainamwarake, I waekoa n namakina ae iai te bwai ae riki ae kakaiaki. I biri nakon te ruu ngke biri rikaaki Markus man te kai n tamarake. E takarua ma te maaku, ni kangai e a tia Emma ni bwaka man te winto—te winto ae tao 40 te buuti (12 miita) iaon timantin te tabo n nakonako. I biri rikaaki n te kai n tamwarake, n tatakarua aran Emma. I noora natiu te aine ni wene iaon te timanti n ae kanga ai bon akea ikeikena. E bon nimaonnon ngke I tabekia, ao I taku n au iango bwa e a bon kamatoaaki makuu aika korakora. Kaainabau, are e irai nako tinaniku, e anaia ni baina ao ni waekoa n anganna te kakabwaia n te nakoanibonga.
E waekoa n roko te amburanti, ao ngai ma Markus ti karaoa te tataro ngke a mwakuri kaain te o n aoraki iaon Emma. N te tai ae waekoa ti a mena iaon te amburanti ni kawaira nakon te o n aoraki.
N te tabo n tararua ti waekoa n raonaki irouia kaain ara utu ake a roko ni buokiira. E oki Markus nakon mweengara ma ai tarina, ngke Ngai ma kainabau ti tiku, n tuai n ata aron ana kaangaanga Emma.
Imwiin te tai ae taraa n ae te tataninga ae abwabwaki, temanna mai ibuakoia taokita e roko, ni kakaea rongorongon te kabuanibwai. A taekinna bwa te bwaka n aron aei n te rietaata aei e na kona ni karika te ikuaki inanon te aomata ao ti teutana ana tai ni maiu. E ikoaki riin beebeen ao kaburoron Emma, ma nanangana bon ti iaon kunna. E taku te taokita bwa e bae n tia n raweaki iroun te anera.
E ngae ngke kamaiuakin Emma bon te kakai, e teimatoa n aki konamaki ibukin ikuakin atuuna. Kainabau ao uoman raraora aika ti rangin ni kinaia a kakabwaia Emma. N te kakabwaia anne e kakabwaiakaki bwa e na kamarurungaki n akea te kaangaanga ao e na riki aei bwa te atatai ni koaua inanon maiuna. I namakina te kakaitau ae korakora ibukin mwaakan te nakoanibonga. Tangiu ni bubuti (n te tataro) ni kabanea te tairiki anne e a tia n ongoraeaki.
E mamarung Emma man te komwa imwiin aua te bong. Inanon boong akana aua aikanne, raoraoia, kaain te Ekaretia, ao tabeman a aki mamatam ao n tataro ibukina. I namakina aia onimaki n tataro aomata Aika Itiaki ni katobibiai, ni kakorakoraia au utu ao ngai. I namakinna ngkana e a tia te Tama are i Karawa ni mwanokai ni baina ao ni kaonai n te rau.
E a tia ara titeiki n aki mamatam n te bong are imwain ae e uti. Ti kakoaua ae te Tama are i Karawa e a tia n ongo ara tataro ao utin Emma bon man mwiin te aki mamatam. Mai ikanne ao e waekoa ni marurung Emma. Nimaua te bong imwiina e taekina ana moan taeka mai imwiin te kabuanibwai, ao ruaiwa te bong imwiina e kaotinakoaki man te o n aoraki. E kabanea nimaua te wiiki n te kaintekateka te wiira ao imwiina e waakina te ririing ni kamarurung.
Tao teuana te namwakaina imwiin te kabuanibwai, e moanna ni maraki nukau imwiin tabekan Emma. Te namakin tiaki n ti te rabwata ma n te kerikaaki ni korakora naba n te tamnei ae e roko irou. N na kanga ni kateimatoa tararuakina?
Te tairiki teuana namakinan te raraoma n akean korakorau e moanna ni kaangaanga totokoana. I kitana te auti ao ni kunea te kaintekateka n tataninga, ike I a tataro iai nakon te Tama are i Karawa inanon teuana te aoa. N te moan tai inanon maiu, I namakina ana mwakuri ni kamaiu te Tia Kamaiu ae moan te kamiimi ae roko irou. Te maraki ao te nanokawaki ae I a tia ni uouotia e anaaki mai irou; a bane n nako mai iaon angau rawawatau ni kabane imwiin te tataro anne. E boni tiku naba Emma n ana kaintekateka te wiira, ao I aki toki ni karekea te bwai n aoraki ibukin nukau, ma I kakorakoraaki bwa n na waaki nako.
Teuana te ririki imwiina, ao e a kona Emma ni biribiri, ngarengare, karaki, ao n iango n te kawai are e riai ni karaoia te teei ae aua ana ririki.
Ti ataia ae iai te Tama are i Karawa ae tangira, ae tabe ibukira ao e kinaira n tatabemaniira nako. E ataia bwa tera kakaewenako aika ti rinanoi. N na bon aki raraoma n taian kakai ake E anganiira rinanon te tataro, aki mamatam, ao kakabwaia n te nakoanibonga.