Ataei aika Uarereke ao teToa
E maeka te tia korokaraki i Utah, USA.
Ara ataei aika uarereke a na namakinna bwa te toa e rang kakawaki iroura. Ti kona ni karaoa ae mwaiti riki ni buokiia n ataia bwa e rang kakawaki nakoia.
Ko a tia n iangoia bwa e aera ti kariaia ataei ake a tuai ni bwabetitoaki bwa a na kana te toa? Ti karaoia bwa a aonga n aki un ao ni karongoa ngkana a tangira te kariki man tureen te toa? E na tii nakon kabebetea karaoan te otenanti, tii nakon kawakinan rauiia ataei?
I taku tiaki ngaia anne. I kakoaua bwa iai nanoia aika korakora. I kakoaua aio ibukina bwa ngke Iesu Kristo e kaotaaraoi bwa aomata ni kabane a riai n kanna, E (koaua) nanoniia aomata ni kabane. Ao ngke E taetae nakoia aika mwaiti, E aki katikuiia tabeman.
Ngke te Tia Kamaiu are uti e kabwarabwara te toa nakoia Ana aomata iaon Amerika, E kaota kakawakina bwa te otenanti ae iai nanona ae onoti ibukiia koraki ake a tia ni bwabetitoaki.1 N te tai naba anne, E tuangiia Ana reirei n “anga [te toa] nakoia aomata aika a mwaiti.”2 Aomata aika mwaiti akanne n ikotaki “ma ake a uarereke.”3
Ngke kaain te nakoanibonga ni boong aikai a taekina tataron te toa, a butiia te Tama are i Karawa ni kakabwaia te kariki ao te ran nako“nanon tamneia ake ana bane ni” kanna.4 Ni Kabane. Aomata n tatabemaniia nako ake a kanna—ni ikotaki ma ataei aika uarereke n tatabemaniia nako.
Ngkana rinanon anaakin te kariki ma te ran, ataei a butimwaia bwa a tei ibukin kanikinaean kakabwaia nakon itiakin tamneiia, a na bon iai te kawai ni buokiia ni ukora nanona inanon te otenanti.
Ma te oota aio, I iangoi taai ngke a uarereke natiu. Ngai ao kainabau ti karaoa te tabe ae tamaroa ni kawakiniia bwa a na rau inanon tain kabutan te toa. I taku a iangoia bwa te otenanti e rang kakawaki nakoira. Ma ti konaa ni karaoia riki ni buokiia n taraia bwa e na kakawaki nakoia.
Tera ae ti kona ni karaoia? Ti kona ni uringa bwa ataei aika uarereke a konabwai ni kawakina te berita inanon te tataro n toa. A kona n oota, inanon otaia ae karako ma kawai aika a nakoraoi, tera ae nanonaki n “ururinga n taainako” Iesu. A kona ni waaki ni “kawakina ana tua” A kona ni kaotia riki bwa a “kukurei ni katoka iaoia te ara” ae Kristo, n ataia bwa a na waekoa ni karekea te tibwanga anne ngkana a bwabetitoaki ao ni kamatoaaki.5
Ma tera taekan manga kaboouan berita aika tabu? Taan kairiiri n te Ekaretia a tia n reireia bwa ngkana ti kana te toa, ti a manga kabooui ni kabane berita aika tabu ake ti karaoi ma te Uea.6 Ataei aika uarereke akea manga kaboouan te berita aika tabu irouia.
I a manga iangoi riki taai ngke a uarereke ara ataei. Ti aki kona ni buokiia n iangoa taekan berita aika tabu ni karaoi, ma ti kona ni buokiia ni waaki nako ni karaoi berita aika tabu n taai aika a na roko. I iangoai ma natiu te mwaane ke natiu te aine inanon moaningabongin te Tabati:
“Ngkana e koro waniua ana ririki te nati te mwaane ke te aine,” I taku, “ko na bwabetitoaki ao n anganaki te Tamnei ae Raoiroi. Ko na karaoa te berita ae tabu. Berita aika tabu ake ko karaoi n te tai anne a na titebo ma berita ake ko karaoi ngkai ngkana ko kana te toa.
“Ngkana I kana te toa n te bong aei, N na manga kabooua au berita ae tabu n te bwabetito, n aron karaoan riki berita akanne. Ko na mena ikekei ma ngai, ma ko na aki manga kabooua te berita ae tabu. Ko tuai ni karaoa teuana. N onea mwiina, ko kona ni kataneiaiko ni karaoa te berita ae tabu. Ni katoa tai are ko kana iai te toa, ko konaa ni katauraoiko bwa ko na bwabetitoaki ao ni kamatoaki. Te kawai anne, ko na tauraoi ngkana e koro waniua am ririki.”
Ngkana e taraa ni kaokoro kabonganaakin te taeka kataneiaiko n te kawai aei, karaoa aei: N barongaana ae rau, te karo e riai ni buokiia natina ni katauraoiia ibukin te otenanti ni bwabetito ni kaotia nakoia bwa e kanga aroia n tei inanon te ran ao n tuangiia taekan te tataro ni bwabetito. E aki karaoa te otenanti ni barongaana anne. N aron taekana, e buokiia natina ni kaota karaoana. N te kawai aei, a na aki raraomaeakina te bwai ae e na riki ngkana a roko n te ran ibukin te bwabetito. I kakoaua bwa tiina ma kaaro a kona naba ni buokiia natiia n kataneiaia ni karaoa ao ni kawakina te berita n te bwabetito. Ni katoa bootaki n toa a kona ni karaoi mwakuri aika a tabu ni kataneiaiia ataei aika uarereke ngkana a taua kanikinaean ana mwakuri ni Kamaiu te Tia Kamaiu.
Ao ngkanne I a manga kaoka au moan titiraki. E aera ngke ti kariaia ataei ake a tuai bwabetitoaki bwa a na kana te toa? Ibukina a na tii “kawakina te rau? Tiaki ngaia anne. Ti buokiia ara ataei aika uarereke ni kana te toa ngkana a kona n uringa aia Tia Kamaiu ao n reitinako n kawakina te rau are e roko mai Irouna—te rau are e e aki kona n anga te aonaaba.7 Ti buokiia ni katauraoiia ni karekea te rau anne ni kamwaitiia ni kakorakora n taai aika a na roko.