Ha’apae i te mā’a ’e e pure nō Emma

Hōho’a

windows in Denmark

Hōho’a © iStock/Thinkstock

Nō ho’i noa mai ra mātou tō’u ’utuāfare mai te tahi tere nehenehe mau. I muri noa mai i te tāmā’ara’a o te ahiahi, ’ua vaiiho vau i tā māua nā tamari’i e piti, ’o Markus e maha matahiti ’e ’o Emma e toru matahiti, e ha’uti i roto i te piha i ni’a o tō mātou nohora’a, i te maha o te tahua. I Danemaka, e tūraihia te mau ha’amāramarama i rāpae. E pōnao iho ā mātou i te mau ha’amāramarama, ’ua ’īriti ri’i rā mātou i te reira i te haerera’a mātou i tō mātou tere, ’ia pūvaivai te nohora’a ’a haere ai mātou.

Tē hōroi ra vau i te mau merēti ’e ’ua puta mai teie mana’o ē, e fifi te vai ra. ’Ua horo vau i roto i te vāhi fa’afaeara’a ’e tē horo ato’a mai ra ’o Markus i raro. ’Ua ’auē ’oia ’e te ri’ari’a ato’a ’e ’ua nā ’ō mai, ’ua topa Emma nā roto i te ha’amāramarama—e ha’amāramarama e 40 ’āvae i te teitei (12 m) i ni’a i te tahi vāhi tīmā haerera’a ta’ata. ’Ua horo vau i raro ma te tuō noa i te i’oa o Emma. ’Ua ’ite au i ta’u tamāhine i ni’a i terā tīmā mai te huru ra ē, ’aita tōna e ora. ’Ua maemae roa tōna tino i te ravera’a vau iāna, ’e ’ua mana’o atu ra vau teie taua mata’u rahi ra nō’u. ’Ua ’āpe’e ato’a mai ta’u tāne i rāpae ’e ’ua rave ihora iāna i roto i tōna rima ’e ’ua hōro’a ’oi’oi ’oia i te hō’ē ha’amaita’ira’a autahu’ara’a.

’Ua tae ’oi’oi mai te pere’o’o ma’i, ’ua parau a’era māua Markus i te tahi pure nō Emma ’a ravehia ai ’oia e te mau tuati. ’Aita ato’a i maoro, teie mātou i roto i te pere’o’o ma’i tē haere ra i te fare ma’i.

I te tuha’a rapa’aura’a rū, ’ua tae ato’a mai te tahi mau melo o te ’utuāfare nō te turu ia mātou. ’Ua ho’i Markus i te fare ’e tōna nau taea’e fēti’i, ’a fa’aea noa ai māua ta’u tāne ma te ’ite ’ore e aha rā te huru o Emma.

Mai te huru e tau roa nō te tīa’ira’a, haere mai nei te hō’ē taote e ani ia māua nō ni’a i te ’ohipa i tupu. ’Ua parau mai rātou ē, teie huru teitei te topara’a, e pēpē ïa te tupu i roto mai ’e penei a’e e’ita e ora mai. ’Ua fati te tahi ivi i te vāhi nō te ’ohure ’e ’ua pēpē te upo’o, te mau pahure rā, ’o ni’a noa ïa. ’Ua parau te taote ē, pāpū ē e melahi tei haru mai iāna.

Noa atu te semeio nō te orara’a mai Emma, ’aita ā ’oia i ara mai nō te pēpē i tōna upo’o. ’Ua ha’amaita’i fa’ahou ā ta’u tāne ’e e piti hoa rahi ia Emma. I roto i terā ha’amaita’ira’a, ’ua parau-fafau-hia ’oia ē, e ora roa mai ’oia ’e ’aita fa’ahou e fifi ’e e riro mai teie ’ohipa ’ei ’itera’a maita’i i roto i tōna orara’a. E māuruuru iti rahi tei tupu i roto iā’u nō te mana o te autahu’ara’a. ’Ua fa’aro’o-pauroa-hia ta’u mau tāparura’a i te maorora’a pō.

’Ua ara mai Emma e maha mahana i muri mai. I roto i terā nā mahana e maha, ’ua ha’apae ’e ’ua pure te mau hoa ’e te mau melo nō te ’Ēkālesia nōna. ’Ua ’ite au i te mau pure o te feiā mo’a fa’aro’o rahi i te ha’unera’a ’ati a’e iā’u, ma te ha’apūai i tō’u ’utuāfare ’e ’iā’u ato’a nei. Mai te huru ra ē, ’ua tauahi te Metua i te Ao ra iā’u i tōna rima nō te tāmāhanahana roa iā’u i tōna ’īra’a.

E ha’apaera’a mā’a tā tō mātou titi i rave i te mahana nā mua a’e i tōna arara’a. Tē ti’aturi nei mātou ē, ’ua fa’aro’o te Metua i te Ao ra i tā mātou mau pure ’e ’ua riro te arara’a mai ’o Emma ’ei fa’ahope’ara’a nō te ha’apaera’a mā’a. Ē mai reira mai ’ua ora vitiviti mai Emma. Pae mahana i muri mai, ’a tahi ra ’oia i paraparau mai mai te mahana o te ’ati, ’e iva mahana i muri mai ’ua matara mai ’oia mai te fare ma’i. E pae hepetoma ’oia i roto i te hō’ē pārahira’a tūra’i ’e ha’amata atu ra te ha’api’ipi’ira’a o te tino.

Fātata hō’ē ’āva’e i muri mai i te ’ati, ’ua fifi tā’ue tō’u tua nō te ’amora’a vau ia Emma. E mana’o paruparu tei ma’iri i ni’a iā’u i te pae tino ’e i te pae vārua. E nāhea vau i te ha’apa’o fa’ahou iāna ?

I te hō’ē pō, ’ua rahi roa mai tō’u mana’o paruparu ’e ’ua oti roa vau. ’Ua haere au i rāpae i te fare ’e pārahirahi atu ra i roto i te hō’ē ’āua, i reira vau i te purera’a i te Metua i te Ao ra hō’ē hora. Nō te taime mātāmua o tō’u orara’a, ’ua putapū vau i te mana o te tāra’ehara a te Fa’aora i te tāpo’ira’a mai iā’u. ’Ua ’īriti-’ē-hia te māuiui ’e te ’oto tā’u i ta’ita’i noa na; ’ua māmā ta’u mau hōpoi’a ato’a mai ni’a mai i tō’u tapono i muri mai i te pure. Tei roto noa ā Emma i te pārahira’a tūra’i, ’e tē rapa’auhia rā tō’u tua, ’ua ha’apūaihia rā vau nō te haere ā i mua.

Hō’ē matahiti i muri mai, ’ua nehenehe tā Emma e horo, e ’ata, e fa’ati’a i te ’ā’amu ’e e mana’o mai te hō’ē tamari’i maha matahiti.

’Ua ’ite mātou ē, te vai ra te Metua here i te ra’i, ’o te māna’ona’o nei ia tātou ’e ’o te ’ite ia tātou tāta’itahi. ’Ua ’ite ’oia i te mau tāmatara’a tā tātou e fa’aruru nei. E’ita roa atu vau e fē’a’a i te mau semeio tāna i hōro’a mai nā roto i te pure, te ha’apaera’a mā’a ’e te mau ha’amaita’ira’a autahu’ara’a.