Te tāmā’ara’a hope’a a Melva

Hōho’a

sacrament with elderly woman

Fa’ahōho’ara’a nā Christopher Thornock

’Ua ora tō’u metua vahine ē tae roa i te 92ra’a o tōna matahiti ē ’ua fa’aru’e noa mai nei. I te fare ma’i ’oia ’a fa’aoti ai te mau taote ē, ’aita fa’ahou e mea e nehenehe e rave maori rā e fa’aau noa i tōna terera’a ē tae roa ’ia fa’aru’e mai ’oia.

Tē ravehia ra te mau fa’aineinera’a nō te fa’aho’i iāna i te fare, tomo mai nei e piti taea’e nō te pāroisa i reira ’e ’ua ani mai ra ’ua hina’aro ānei tō’u metua vahine ’ia rave i te ’ōro’a. ’Ua parau nā mua vau ’ia rāua, « ’Aita, māuruuru ». Tē fifi nei ho’i tō’u metua vahine ’ia horomi’i. Parau fa’ahou a’era vau, « Penei a’e, e ani vau iāna ». ’Ua pi’o vau i pīha’i iho i tōna tari’a ma te parau, « e piti taea’e nō te autahu’ara’a i’ō nei. Hina’aro ānei ’oe e tāmata i te rave i te ’ōro’a ? » Ma te reo paruparu, e reo pāpū rā, ’ua pāhono mai ’oia ē, « ’Ē ».

I muri mai i te pure, ’ua rave au i te tahi tāpū faraoa i roto i te fāri’i, ’ōfati a’era i te tahi tufa’a na’ina’i ’e tu’u ihora i ni’a i tōna vaha. ’Ua fa’aitoito ’oia i te ’amura’a i te reira, ’ua tātarahapa vau i teie nau taea’e nō te maorora’a. ’Ua parau mai rāua ’aita e fifi. I muri mai i te piti o te pure, ’ua rave a’era vau i te tahi hāpaina pape iti ’e tu’u ihora i ni’a i tōna ’utu. Ma’a vāhi iti noa tāna i inu, ’e ’ua māere roa vau i te noara’a iāna ’ia horomi’i i te reira.

’Ua ha’amāuruuru vau i te mau taea’e, ’e ’ua reva atu ra. Hō’ē hora i muri iho tē fa’aru’e mai ra tō’u māmā.

I te mau mahana nō muri mai, ’ua tae mai te mana’o ē, ’āue ïa taime mo’a tei fa’ati’ahia iā’u ’ia fāri’i e tō’u metua vahine. Te ’ohipa hope’a tāna i rave i roto i teie nei orara’a, ’o te ravera’a ïa i te ’ōro’a mo’a. Te parau hope’a tāna i parau, e « ’E » ïa—e ’ē nō te fāri’i i te ’ōro’a mo’a, e ’ē nō te pūpūra’a i te tusia o te « ’ā’au tātarahapa ’e te vārua marū » (3 Nephi 9:20), e ’ē nō te rave i ni’a iāna i te i’oa o Iesu Mesia ma te parau fafau i te ha’amana’o-noa-ra’a iāna, e ’ē nō te fāri’i i tōna Vārua. Te ’ohipa hope’a tei topa i ni’a i tōna ’utu, ’o nā tāpa’o ïa nō te ’ōro’a mo’a.

’Auē paha ïa te au o te reira tāmā’ara’a hope’a nāna ! Noa atu ā tōna paruparu ’ia haere ’e ’ia paraparau, ’ua puta roa mai paha tōna mana’o ora i roto i te Mesia ’Auē paha ïa māuruurura’a tāna i putapū nō tōna mana fa’aora ’e te fa’ati’a, tei ta’ita’i iāna i roto i teie mau taime hope’a o tōna tere tāhuti nei ma te tu’u i mua iāna te tīa’ira’a nō te ora mure ’ore.

I te mau hepetoma ’ā rave ai tātou i te ’ōro’a, ’ia māuruuru tātou nō teie rāve’a tā tātou ’ia fa’a’āpī i tā tātou mau fafaura’a ’e ’ia putapū i te fa’a’orera’a hapa ’e te aroha ’a tūtava noa ai tātou ’ia riro mai tō tātou Metua i te Ao ra ’e mai tāna tamaiti ia Iesu Mesia. ’Ei reira te pāne ’e te pape e riro mai ai nō tātou, mai tei tupu nō tō’u metua vahine vahine, ’ei mea « hau tōna monamona i tō te mau mea monamona ato’a ra, ’e ’ua rahi tōna teatea i tō te mau mea teatea ato’a ra » (Alama 32:42).