Te Beku i Mainikun Ioretan
Ke n tabo nako ake e kainnanoiko iai te Uea.
Korotamnei © iStock/Thinkstock
Te kainnano e rang korakora.
Ni moan 2013, nimaua keiti are e a butinako iai te mitira n te tabo ni katantan i Za’atari n aban Ioretan n te Middle East. E raka iaon 100,000 taan kataniia mai Syria, ake a maeka n ibetutu, ngaiia aika a na waekoa n rootaki n te aoraki ae e rang ewewe, te waerati ae kakamaku. Te tautaeka n Ioretan e baire ibukin kawaekoan katokan te aoraki man butinakona. Te baire bwa a na anganaki te iti n totoko te mwaiti ae 90,000 kaain Syria ake taan birinako man te roro ae 6 namwakaina ao 30 te ririki inanon uoua te wiiki.
Ma iai te kaangaanga. The United Nations Children’s Emergency Fund (UNICEF) (Aia Bootaki Ataei n te Aonaaba) iai irouia bwain katokana. Te Bootaki ni Kuakua iaon Ioretan iai aia kiriniki. Te bwai ae akea irouia bon bwain tibwatibwakina ae karinanaki—kai n iti, nnen bwai ni mwakuri aika kakang, bwaai ni kamwaitoro ibukin bwaaniti—ao e a uarereke te tai.1
A rin Ron ao Sandi Hammond, taanga ni mitinare ake a beku bwa tarekita n te aba i Ioretan ibukin ana Buoka te LDS. Ngkai Ron ao Sandi a tia ni mwakuri ma te UNICEF ao te Bootaki ni Kuakua, a waekoa n rin ni karaoan te reitaki imarenaia bootaki aikai ni katauroan ana Buoka te LDS.
E taku Ron, “Ti titiraki ibukin mwaitin boon bwaai aika a kainnanoaki ibukin bwainaoraki. Ngke a tuangiira, ti taku, ‘Ngaira man ana Buoka te LDS ti kona n ibuobuoki.’ A taku, ‘E na kona ni waekoa? Ti riai ni waekoa ni waaki iaon aei!’”
Inanon 20 te aoa ana Buoka te LDS e kariaia kaboan bwaai ake a kainnanoaki. “Ngke ti kaongoa te Bootaki ni Kuakua ao te UNICEF,” Ron e taku, “a rang baitii. E kanga te NGO [bootaki ae aki tauaki taekan man te tautaeka] ni kona n rang waekoa? Tiaki tii te mwakuri n ibuobuoki ae waakinaki iaon taina, ma bon te aonaaba ae bwanin are e a kona ni bwainaorakiia bubua ni ngaa kaain Ioretan ao Syria ake a kataniia.”
Maing: tamnei n anganano man ana Buoka te Samir Badran, UNIcef-Jordan; banna ibukin te baekuraaun ao tamnein Amman, Ioretan © iStock/Thinkstock
A totokoaki kaangaanga.
Riki, te ikarekebai ae uaana imarenan UNICEF, Bootaki ni Kuakua i Ioretan, ao ana Buoka te LDS a karekea te kona n reitaki inanon taai aika a na roko.
Aroia Ron ao Sandi Hammond n roko n te tai ae rang kakaawaki n te Middle East bon te kakoaua n aia onimaki te utu ae Hammonds’ ao te kaunganano n ana burokuraem te Ekaretia ibukiia taanga aika mitinare.
Kainnanoaki: Taanga aika Mitinare
Inanon 2012 te Hammonds a beku bwa taan mwakuri n te otenanti n te tembora i Rexburg Idaho. Ron e kinaaki n ana mwakuri n te tabo ni karao wii ao e angareirei n Taekan te aro n te Brigham Young Uniwetirii-Idaho. Ma te rau inanon maiuia e waekoa ni bitaki n te namakin n tamnei ae okoro are a waekoa iai ni karini beebwa bwa a na beku n te mition. Butiraoin te tai ni kakubanakoakia. Natiia ake a tia n iein a mena n aia tabo aika a kakaokoro ni mwaingiin n nakoaia, ao Ron e tuai tangiria ni kan motirawa. Ma te Tamnei e kamatoa nakoia bwa a kainnanoaki ao bwaai ni kabane a na nakoraoi.
Ngke a otinako mwiina, mataniwi n te nakoanibonga ni kautuun te Ekaretia a tia n aki mamatam ao n tataro ni kakaiia taanga aika kainnanoaki ni beku bwa tarekita n te aba ibukin ana Buoka te LDS i Amman, Ioretan.
“E bebete ataakina,” e taku Sandi, “bwa te Uea e rimoara, ni katauraoi kabwarabwaraan katabeara ake E katauraoi ibukira. Ti ataia bwa e karaoa aei nakoia mitinare ake a beku. E kamweengaraoi ataakina are te Tia Kamaiu e bairei bwaai ibukim bwa ko na karaoi imwaain rokom.”
“N ururing rikaaki,” e taku Ron, “ti kakaitau bwa ti aki kaonoti ke ni bubuti bwa ti na mwakuri ia. Katukan akanne inanon bain te Uea e karekea ana tai n anganiira te taneiai are tina bon aki kona ni karekea ngke arona.”
Te taneiai anne n ikotaki ma te mwakuri ma te utu ni bwanuea mai Ioretan iaon te karikirake ibukin buokaia aomata are e bwaka iai nanoia te bwanuea. Ana utu Hammond a reitaki ma onaoraki n te aono ao kiriniki n anga te kataneiai nakoia taan mwakuri n te kuakua nakoia kain Ioretan iaon kamaiuaia ataei ake a tibwa bungiaki, ni kauarerekea te mate irouia ataei ake a tibwa bungiaki. Rinanon aia mwakuri ao aia mwakuri taanga ni mitinare ake tabeman, ana Buoka te LDS e katauraoa te kataneiai ao bwaai ni mwakuri ni katea taraakin te kiriniki ao bootaki ni buokiia naake aki toamau rabwataia n taai aika a na roko. Ibuakoia naake a buokiia taangan Hammond ao mitinare ake tabeman n te warebea bon te tienta are e reireiniia aine ake aki toamau rabwataia aroia ni katamneia ao ni karaoi kunnikai aika onoti ao bwaai riki tabeua. Konabwai aikai e anganiia aia tai ataei ni kona ni katamaroa aroia ibon irouia ao aia utu.
Maing: tamnei ni mwamwannano man ana Buoka te LDS; angatai: tamnei n anganano mai irouia ana utu Hammond
Tabeua karikirake n ikotaki ma mwakuri ma Bootaki ake a inaomata ao te tautaeka n Ioretan iaon kaekaan bwaai aika katawe ao n raumeaia ataein Ioretan ni karekea teuana mai buakon uoua te tikaoratibu ni katoa ririki n reirei n te Brigham Young Iuniwetirii. Teuana te taneiai ae karaunano are a tia ni mwakuri ma ngaia taangan Hammonds bon te Aro ni Katorika n Ratin ni katei umwanreirei ibukiia Kiritian aika kaain Iraqi are akea aia tabo ni bootaki.
Ma te Uea n Ana Nne ni Kureebe
N tikuia i Ioretan taangan Hammond a reiakina koauan ana berita te Uea nakoia ake a beku Ibukina: “N na rimoam. E na mena i angataira ao i angamaingira, ao E na mena tamneina inanora, ao Ana katobibiira Ana anera, ni uotira rake” (D&C 84:88).
“E ibuobuoki te Atua n te mwakuri,” e taku Ron. “E mena n te nne ni kureebe ma Ana tia mwakuri. Te taanga are a nako n te mition e raonaki n te nne ni kureebe iroun te toka are arokana te kureebe. Ti aki (tii) kakoauai kakai i Ioretan; ti maiuakini.”
Ma te koaua, anera ake a namakiniia “ni katobibiia” a raonaki irouia aekakiia kaain karawa, ma a raonaki naba irouia aekakiia aika iaon te aba, riki natiia, ake a boutoka aia baire ni beku n te tabo ae raroa man mweengaia.
Ao aia utu a kakabwaiaki n ana kakawakin te Uea, ni mwaakan te kamatoa. Nakoaia ae kakaawaki ao babaire ni kamwaingaia a karaoaki, ao raraoma ma kaangaanga inanon te bung a katokaki ngkai natiia a rairaki nakon te Uea, maroro n ikotaki, ao n tataro ao n aki mamatam i bon ibukiia.
Kakabwaia ake a karekei natiia a rang kamimi n te aro are te Tari ao Titita Hammond a kaoaki bwa a na reita aia uoua n ririki n aia mition nakon teniua, ni kabane natiia a kaota aia boutoka ae korakora. A namakinna ae te Uea e karaoa te bwai ae rang onoti ibukiia n aron are e kaotaki imwiin aia mwakuri aia karo.
Ma, te maeanako n ana utu Hammond are e namakinaki bon te anganano. Maenakoia n te raraoa ae mena n iteran te aonaaba ma ake a tangiriia e matoatoa. Ma e aki rang kaanganga n aron kangaangana mai imwaaina. Te rabakau ae boou e a karekea te reitaki ibukiia utu inanon maiuia imarenaia n tainako ngkana a kainnanoia. E taku Sandi, “Taanga e aki toki aia reitaki ma aia utu. Ti kawakina ara reitaki ma aia utu natira man mweengara. Bukina bwa Bwaai n Reitaki iaon te witeo ao imeeri, aman tibura aika tibwa bungiaki n ara tai ni beku, a kinaira ao a na kukurei ni butimwaira ngkana ti oki.”
Kauki Maata ao Naano
Maing: tamnei ni mwamwannano man ana Buoka te LDS; angatai: tamnei n anganano mai irouia ana utu Hammond
Ibuakon kakabwaia aika a mwaiti taangan Hammond a namakinna ae a karekea man aia mwakuri bwa a noora aia akoi ao aia iraorao kaain Ioretan. Ngke a moan karekea moan weteakiia taangan Hammond, a bon aki atai anuaia aomata ake a na beku ibukiia.
“Ma ti kunea bwa raoraora ae kaain te Muslim a nimamannei ao a mwamwannano,” e taku Ron, “ao ti kakoaua bwa ngkana a namakinna bwa ti na reke n te kaanganga, a na bon buokiira ni kawakiniira.
“Aia tangira e rang tamaroa. Kaain Ioretan a aki tangiria bwa a na ataa kainnanoia tabeman ngkana a kona n ibuobuoki. A tia ni butimwaiia taan birinako mai abaia mai imwaain ana tai Tawita. E mwaiti rongorongo man te B’aibara are e taekina iai ‘i mainikun Ioretan,’ ao tia waaki n tiainai ara reta ‘i Mainikun Ioretan’ bwa kinakira n te mwakuri n akoi are e reke ara tai n anga n rongorongon te buoka n te aba. Inanon bubua n ririki Ioretan e a tia n riki bwa te tabo n Akoi, ao te Uea e kakabwaiaia aomata ibukin anne.”
Te mwakuri ni kaan ma kaain Ioretan e karekea te iraorao ae korakora irouia taangan Hammond ma tabeman. “Ti kaoaki nakon tabeua baka n amwarake, te baka are banen bongin aia aki mamatam ae te Ramadan,” e taku Sandi. “Raoraora aika kaain te Muslim a kaoira naba nakon bootaki ni kabae, mare, ao tabeua bootaki n utu.”
Te Ekaretia e aki weteia ke ni kariaia bwabetitoakiia Muslim i Ioretan ke n tabo nako are e totoko iai te tua, ngaia are Hammonds aki tibwa taekan te Ekaretia. N onean mwiina, a boboto iaon karikirakean ao kateimatoan te reitaki—ma te utu n bwanuea, iraorao ibukin buokaia aomata n te aono, taanga ni mitinare ake a beku ma ngaiia, ao mataniwi n aro ao te tautaeka. Ngkana a titirakinaki ibukin taekan te Ekaretia, Hammond a kaunga te kakae bwa a na nakon LDS.org.
Te Wewete Nakon te Beku
Iangoan te taneiai are a rinanona Ron ao Sandi, tao a namakinna ae a okoro ibuakoia taanga ake a weteaki bwa a na beku—ke ake a na weteaki bwa a na beku?
Eng—ao tiaki. “Ti beku n te tabo ao n te tai are e kainnanoia te Uea irouia taanga ma aia konabwai ao aia taneiai ni maiuia,” a taku taangan Hammond. “Ma anne e koaua ibukiia ni kabane mitinare aika kaara. Ni kabane taanga ake iai aia konabwai ni beku n te mition a tia n tauraoi ni beku n aro aika onoti i bon irouia. A na tii kammwakura aia onimaki ae tau n nako n te tabo are e kainnanoia te Uea bwa a na mena iai, ao E na kabonganaia ni karaoa te bitaki ni maiuiia tabeman.”
“Taanga a kona ni karaoa te bitaki,” e taku Unimwane Robert D. Hales man te Kooram n Abotoro are Tengaun ma Uoman. “Taanga a kona ni karaoi bwaai aika a kamimi are akea ae e kona ni karaoia. …
“… Aro ake a kona ni beku iai taanga a uaana n akea tokina. Man aobitin te mition ibukin boutoka ao kataneiai ibukin te kairiiri nakon rongorongon te Utu, mwakuri n te tembora, ao ibuobuoki nakoia te botanaomata—iai te tai ni kabonganai konabwai nako ke tarena are e a tia ni kakabwaiako iai te Uea. …
“… Ko a tia ni karekea ae mwaiti inanon maium, waaki nako ao anga n akea boona n ana mwakuri te Uea ao te Tia Kamaiu. Bwaina te onimaki; te Uea e ataia bwa te tabo ra ae ko kainnanoaki iai. Te kainnano e rang korakora, tariu ao mwaaneu, ao taan beku a rang karako.”2