Bwaai aika a tangiraki ibukin te Kamatebwai

Iroun Rosemary Thackeray

E maeka te tia korokaraki i Utah, USA.

Katai aua kawai aikai ni kangkangiia ana taeka te atua i nanom.

Tamnei

recipe for learning

Ngke te kairake ngai, I kabanea mwaitin awa ni matakuakina tinau n te umwanikuuka. E kakaraoi amwarake aika kangkang, kariki, keeke, ao bwaai ibukiia ara utu. Imwiin tabeua te tai, I moana warekan rengarenga ibukin karaoan te amwarake, n ririmwin taian kaetieti, ao ni karaoa te amwarake. I aaki katine iaan tinau—I bon kona ni karaoia i bon irou.

Ai aron reiakinan arom ni kuuka, ti kamatebwaia te euangkerio ao ni karikirakea ara koaua man karaoana. Imwiina Riaai ngke e tuangiia ana utu taekan miiakinan te kai ni kamaiu, Nibwaai e taku bwa e tangiria n “nooria, n ongo, ao n atai baikai” i bon irouna (1 Nibwaai 10:17). N taekana teuana, ibukin Nibwaai e aki tau irouna tii ongorana nakon ana koaua tamana. E tangiria n kamatebwaia te bwai are e a kaman ataia tamana.

Bwaai aika a tangiraki ibukin kamatebwaian te euangkerio iai tabeua mwaneka aika a bebete. Ko kona ni kamanenai botoniango ni buokiko iaon kamatebwaian te euangkerio ma am utu, n te ekaretia, ke inanon oin am tai ni kamatebwai.

1. Katauraoi nakon kamatebwai.

Moana oin am kamatebwai ma te tataro. Butia Tamam are i Karawa bwa e na buokiko n oota n te bwai are ko warekia. Korea teuana ke uoua titiraki ao kakaea kaekaana. Te Tamnei ae Raoiroi e na kaota koauan te koaua ngkana ko wareware, iangoia, ao tataro (taraa Moronaai 10:5).

Katauraoi ibukin kamatebwaian te euangkerio n te ekaretia man warekan te reirei imwaain nakom. Te Nakomai, Ririmwiaireirei a kona ni kuneaki iaon LDS.org ao n te Gospel Library app.

2. Katabeko n am kamatebwai.

Wareware bwa ko aonga n oota. Mwaitin te iteraniba ae ko warekia ke baitiira ngkoe ni wareware e aki kakawaki n aron ootam ni bwaai ake ko wareki. Ko riai ni manga wa-wareki tabeua tiententi ni kaokiokia tabeua te tai. Kamanenaa te rikitionari n tarai taeka ake ko aki atai nanoia. N aron te katooto, tera nanon boong? Ko kona ni kabongana te Kairi nakon Boki aika Tabu.
Titiraki n taekan te bwai are ko warekia. Tao ko na mimi, “Tera ae e riki i Ierutarem n te tai are a kitanna iai Riaai ma ana utu? E aera aomata a rawa n ongo iroun Riaai?
Kataia n kaekai titiraki aika teniua n taekan nako reirein te euangkerio: E aera bwa e kakawaki nakoia aomata n taai akanne? E na kanga ni kaineti nakoira n te bong aei? E na kanga ni kaineti nakoiu?
Kakaai baaten ao reitaki. Ibukin te katooto, tera baaten arke I kona ni kinai n te kawai are Nibwaai e kaeka nakon ana mwakuri teuare buakaka. E kanga mwanangaia ana utu Nibwaai n tii te arona ma mwanangaia tibun Iteraera n otinako ma i Aikubita?
Korei am namakin ao iango inanon am tienero. “Ngkana ko korei am iango aika a kakawaki, ana roroko riki iango aika a mwaiti. Aron naba, te oota are ko karekea e na tauraoi rinanon maium” (Richard G. Scott, “Ni Karekean te Oota ao te Korakora n Kamanena Raoi,” Riaona, Aokati. 2002, 12, 14). Koroi tera ae nanonaki n te iango inanon maium.
Korea te tamnei. Teuana te kawai n rekootina te bwai are ko kamatebwaia bon korean tamneina. Teuana te tai ngke I kawara raoraou ibukin te tataro n te utu, tibuna te unaine e tibwaua te karaki n taekan te onimaki ao te tataro. Imwaain ae waaki te reirei, raoraou e anganiia ataei ake a uarereke te beeba ao te kureiaon n te aro are a na korotamneia te karaki ngke e tabe n taetae tibutoruiia te unaine . Te korotamnei e buokiia n tiku inanon te waaki, ao riki a titiraki inanon te waaki ni kamatataiia ni mwakoron te karaki.

3. Kamatebwaia ao maiuakina te euangkerio ni katoa bong.

Te kamatebwai e anaa te korakora ni karaoakina.; ti kainnanoia ni karekea iroura te atatai (taraa Motiaea 12:27). Unimwaane M. Russell Ballard n te Kooram n Abotoro n te Tengaun ma Uoman e reireniira ni “katea ara tai ao te tabo ni kamatebwai Booki aika Tabu ni katoa bong, e ngae ngkana tao ti ibukin tabeua te miniti” (“E na Riki Bwaai Aikai Nningai”) Ensign, Ritembwa. 1996, 60). Ngkana ti reiakinna n taainako, te kamatebwai e na tabe ni bebete. N te katooto, I kunea bwa ni koauana ngke I wareka ana mwakoro Itaia inanon ana Boki Moomon iai kiibu ake a boraoi ma ake n ana boki Itaia (n oneanmwin riaoakiia), a moanna n otaraoi nakoiu.

Ngkana e roko kamatebwaian te euangkerio, e aki tau ataakin bukin taekan bwaai tabeua. Ti riai n tangiria ni kamwakuri bwaai ake ti reiakin. Ngkana ti mwakuri iaon te koaua, te Tamnei ae Raoiro e kamatoa anne nakoira, ao ara koaua e rikirake. Ngkana ti maiuakina te koaua ane boraoi anne, ti moanna ni bitaki, n rikirake n rairaki nakon Iesu Kristo.

4. Tibwaua te bwai ae ko reiakinna.

Tuangiia tabeman taekan reirein te euangkerio n oin ara taeka e buokiira n uringa bwa reirei ao namakinan te Tamnei, are e kakorakora ara koaua. Tamaroan te tai n tibwatibwa ni katoa tain te tataro n utu. Ko kona naba n tibwatibwa ngkana ko maroro ma raoraom n te reirei ke ma kaain te utu n tain te katairiki.

Ngkana ti toui bebeten maneka aika aua aikai ao ni mwakuri korakora ni ukora te Tia Kamaiu, ti berita bwa “ana mwakuri te Atua aika a raba a na kaotaki [nakoira], man mwaakan te Tamnei ae Raoiroi” (1 Nibwaai 10:19).