Taimi Faaselesitila
E alala le tusitala i Lanarkshire i Matu, Sikotilani.
O nisi taimi e lagona ai e le o mamao tele le lagi.
I se tasi aso, sa aoao i matou e ou taitai o Tamaitai Talavou e uiga i taimi taua pe a e lagonaina le Agaga ma lagona le latalata i le Atua. Sa latou faaigoaina i latou o “taimi faaselesitila,” o se fuaitau faigofie sa faigofie ona manatua. Mo au, sa ou iloa lelei lava le uiga o se “taimi faaselesitila”; sa ou lagonaina muamua, e pei e te lagona sina vaega po o le tofo pe faapei le olaga i le malo selesitila. Ma sa ou mauaina le tele o nei taimi!
Ina ua uma ona faalauiloa mai e o matou taitai le manatu, sa matou o i fafo. Sa susulu le la i laau. Sa moeiini o matou mata. Sa ou lagona le la i ou foliga ao agi mai se savili mafanafana. Sa pepese manu felelei ma sa lue laau i le savili a o matou fiafia i foafoaga a le Atua. Sa o se taimi faaselesitila.
O le isi taimi sa ou maua ai se taimi faaselesitila ina ua maea ona papatisoina lau uo mamae. Ina ua ma toe savavali e toe foi atu i le falesa mo le taimi na totoe o le sauniga, sa ia tago i lou lima ma talanoa e uiga i le maoae o le avea o i maua o ni uo ma o le a avea pea o ni uo—e oo lava i le faavavau. O le a le galo lava ia te au lena tala. Sa ou olioli ma fiafia ma lagona le faafetai!
I se tausaga mulimuli ane, sa mafai ona ma toe lagona uma faatasi lena olioli a o ma tutu i luma ma matamata i lona tina a o ulu atu i vai o le papatisoga. Sa i ai moni lava le matagofie i mea uma.
Atonu o le nofoaga sili e maua ai nei aafiaga o totonu o le maota o le Alii. O le taimi muamua sa ou ulufale ai i le malumalu, sa faamanuiaina au e auai atu ma ou matua ma lou uso. Sa papatisoina au mo lou tinamatua o tinamatua, ma sa ou lagona sa ia fiafia.
O taimi faaselesitila e mafai ona tupu i soo se mea i soo se taimi—ao faalogo i musika po le taimi o afiafi faaleaiga po o le aoga. Ou te manatua se tasi o afiafi faaleaiga lea sa le mafai ai ona taofia le talie o tagata uma! O se tasi lena o ou taimi sili ona fiafia ai.
O nei taimi faaselesitila ua faamalosia ai lau molimau ma fesoasoani ai ia te au ia atili maua se agaga loto faafetai. Sa latou aoaoina au i ni lesona maoae. Aemaise lava, sa latou faafiafiaina au ma fiafia e uiga i le talalelei! Ou te iloa afai ou te faaauau pea ona filifili e ola i le talalelei, o le matagofie uma, fiafia, filemu, ma le alofa ou te lagona i taimi faaselesitila o se mea e mafai ona ou lagona pea—i se fuataga maoae—i le malo selesitila.