O Au? O Se Tagata Saua?

Ata

boy on playground

Sa manaia lava le aso i le aoga. Na faaalu e Sefo le malologa atoa e taaalo tarako ai ma lana uo lelei lava o Peni. I le mavae ai o le lua tausaga i lana aoga fou, sa fiafia Sefo i le maua ai o sana uo lelei. O Peni sa fiafia i mea na fiafia foi i ai Sefo, ma e tele lava mea la te talanoa i ai i taimi uma.

Ina ua oo atu Sefo i le fale, sa ia vaaia na faatalitali mai Tina ia te ia. Sa le’i foliga fiafia o ia. Na mouese le ataata a [Sefo]. “Sefo,” sa fai mai ai Tina, “Na valaau mai ananei le puleaoga ia te a’u. Fai mai sa e saua i se tamaitiiti o lau vasega.”

“Ou te le’i [faasaua]!” Na fai atu ai Sefo. Sa ia iloa o le avea ma se tagata faasaua o se mea sese. O se tagata saua e faanoanoa ma fefefe ai tagata. Sa le’i faia e Sefo se mea faapena.

“E te mo’i?” O le fesili lea a tina. Sa ia faia se faaavanoa i le nofoaumi mo Sefo. “Na fai mai le puleaoga sa oulua fai ma Peni ia Sama e aluese, e le i ai i le lua kalapu, ma e le mafai ona auai seiiloga e puna mai i le tumutumu o le faasee.”

Sa tilotilo i lalo Sefo. Na toetoe o aso uma na fai atu ai Sama ia i laua latou te taaalo. Ae o Peni o lana uo lelei, ma la te fiafia e taaalo na o laua. E le faapea ai la sa faasaua o ia, a ea?

“E leaga pe a ma taaalo na’o maua ma Peni?” O le fesili lea a Sefo. Sa foliga mai e le fea le ta’u o ia e se tasi, o se tagata saua ona o le taaalo ma lana uo lelei.

“E mafai lava ona oulua faaalu faatasi ni taimi se tele. Ae a i ai loa Sama, e sese le faia ia ona lagona le le aofia ma le tuuatoatasi. Na fai mai le puleaoga sa e taufaifai ia Sama ona o le le puna ese mai le faasee.”

“Ou te le’i faia!” Na fai atu ai Sefo. As na fai e Peni. Ae o ia na ata.

“E te manatua ou lagona i le taimi muamua na tatou siitia mai ai?” O le fesili lea a tina.

Na luelue le ulu o Sefo. Sa matuai le manaia lava le aoga i le taimi muamua. Sa tatalo soo o ia ina ia maua sana uo lelei.

“O le a se mea e te moomoo maimau pe ana fai e tagata? O le fesili lea a tina.

“Sa ou moomoo maimau pe ana latou valaaulia a’u e taalo i taaloga i le malologa puupuu. Pe nonofo faatasi ma i latou i le malologa umi.”

“Pe le o se mea manaia ea le i ai o sau uo lelei i le taimi nei?” Na fai atu ai Tina. “E mafai ona avea oe ma se tasi e fesoasoani i tagata e tuuatoatasi, pei na masani ona e i ai. O le a ou tuu atu ia te oe se lu’i. O taeao, ou te manao e te suea ni mea lelei se tolu e uiga ia Sama. Ona ta’u mai lea ia te a’u pe a tuua le aoga.”

“Atonu e mafai ona ou faia le mea lena,” na fai atu ai Sefo, ma pulatoa i ona seevae. Na te le’i mafaufau e avea o se tagata saua. Sa manao o ia ia agalelei e pei o Iesu. O taeao o le a ia faamalie atu ai ia Sama. Ma o le a ia fai atu ia Peni e manao e taalo foi Sama.

“Ei,” na fai atu ai Tina. Sa ia eu i luga le auvae o Sefo. “O oe o se tama lelei ma agalelei. O le a laki Sama i le avea o oe ma sana uo. Ma, e te iloa foi? Ou te mautinoa, o le a e iloa ai lou laki i le avea foi o Sama ma sau uo.”

Sa ataata teisi Sefo. E mafai ona avea pea Peni ma ana uo lelei. O le a le afaina le i ai o se isi foi uo.