O Le Faataoto i le Lagomeli Lemagafagafa

Ata

Bee

Ata na pueina e © iStock/Thinkstock

O nisi taimi ou te faia ai ni matafaioi e manaomia le galue i se siosiomaga filemu ma tuuatoatasi. … O le nofoaga saogalemu ou te fiafia lava i ai, o se potu e i le pito i luga o se fale tele. … E fai si faigata ona oo atu i le potu ma e matuai saogalemu mai le solivale e tagata. …

Ae peitai, e le o taimi uma e leai ai ni a’u au asiasi, aemaise lava i le taimi o le taumafanafana; aua, a ou nofo ae matala faamalama, e masani ona maulu mai ai iniseti felelei ma matou nonofo faatasi ai i lea nofoaga. …

O se tasi aso na lele mai ai se lagomeli taaloa mai atumauga tuaoi i totonu o le potu, ma i taimi ou te mapu ai i le mavae ai o se itula pe sili atu, e fai ma ou faalogoina ai lana hamu manaia pe a lele. Na iloa e le meaola mosi o ia o se pagota, peitai o ana taumafaiga uma lava e su’e le ava o le faamalama e alu ai i fafo, sa le faamanuiaina. Ina ua ou sauni e tapuni le potu ae ou aluese, sa ou tatala faavateleina ai le faamalama ma ou taumafai ai muamua e faasinoino ma sosoo ai ma le tulituli atu le lagomeli i le mea e saoloto ma saogalemu ai, ma le iloa lelei, afai ou te aluese ma le potu, o le a mate ai e pei o isi iniseti na lokaina ma mamate ai i le matutu o le siosiomaga tapunipuni. O le tele lava o lo’u taumafai e tulituli i fafo, o le tele foi lea o lona naunau e faatautee ma teena a’u taumafaiga. O lana hamu filemu sa i ai muamua na faasolo atu i se ūū ita; o le masau o lana felelea’i na oo ina te’e ma taufaamatau.

Sa ia faateia a’u i lona uina o lo’u lima—le lima lea semanu na te taitai atua o ia i le saolotoga. Mulimuli ane na tu o ia i luga o se moli na pipii i le taualuga o le potu, lea sa le mafai ona ou au i ai e fesoasoani pe faaafaina o ia. O le maini o le tiga o lana u faalealofa na osoa’e ai lo’u misialofa ae le o le ita i ai. Na ou iloa le tau moni o le sese o lona tetee ma le fiafaalii, ma sa ou tuua ai le meaola e mate ai. O le tolu o aso mulimuli ane, na ou toe foi atu ai i le potu ma maua i ai le tino mago, ma mate o le lagomeli i luga o le laulau [ou te] tusitusi ai. Ua na totogia lona lotomalo i lona ola.

O le le vaai mamao ma le malamalama manatu faapito o le lagomeli, sa ia manatu ai o a’u o se fili, o se faaoosala le faavaivai, o se fili faitino e ulumalo ma faatautala i le faatamaiaga o ia; ae o le mea moni, o a’u o lana uo, na ofoina atu se ala e faasao ai le ola lea na ia faaleaogaina ona o lona lava sese, sa [ou] taumafai e faaola o ia, e ui lava i lona ituaiga meaola, mai le falepuipui o le oti ae toe ave atu o ia i le saolotoga i le ea i fafo.

Pe ua tatou atamamai atu ea nai lo le lagomeli lea e leai se faatusatusaga i le va o lona ala lemagafagafa ma o tatou olaga? O nisi taimi e matele ai ina tatou faafetauia i le toatama’i ma le ita, e faasaga i mea faigata ia atonu e faaali mai ai le atamai sili atu ma le tausiga alofa, lea e faatutonu mai i lo tatou lagomalie le tumau mo o tatou faamanuiaga tumau. I faigata ma puapuaga o le olaga nei, o loo i ai se galuega paia lea e na o se tagata e le talitonu i se atua e le mafai ona ia iloatino. I le toatele o tagata, o le aveesea o le tamaoaiga na avea o se faamanuiaga, o se auala aoga ua taitai atu ai pe tatai ese ai i latou mai le pumoomoo o tuinanau manatu faapito agai i le la susulu ma le laolao, lea o loo faatalitali mai ai le anoanoai o avanoa pe a latou faia se taumafaiga. O le le fiafia, faanoanoa ma puapuaga e mafai ona avea ma faailoaga o le agalelei o se Tama atamai silisili.

Mafaufau i le lesona i le lagomeli lemagafagafa!