1 Korinito 10:13

Na aoao mai le Aposetolo o Paulo ia i tatou i auala e mafai ona tatou onosaia ai faaosoosoga.

13 Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i mea ua mafai ona outou tatalia; ae o le a, saunia se ala e sao ai, ina ia outou lava oono.

Faaosoosoga

Ata

Elder Robert D. Hales

“Ua iloa e le fili … le mea, ma le taimi, ma le auala e faaosooso ai i tatou. Afai tatou te usiusitai i uunaiga a le Agaga Paia, e mafai ona tatou aoao e iloa faatosinaga a le fili. …

“E le mafai ona fuaina lo tatou faamanuiaina i le malosi e faaosoosoina ai i tatou, ae e ala i le faamaoni tatou te tali atu i ai. E tatau ona tatou ole atu mo se fesoasoani mai lo tatou Tama Faalelagi ma saili le malosi e ala i le Togiola a Lona Alo o Iesu Keriso.”

Elder Robert D. Hales o le Korama a Aposetolo e Toasefululua konafesi aoao, Aperila 2009.

Taatele i Tagata

Atonu e eseese uma lava o tatou faaosoosoga, ae e faaosoosoina tagata uma. O faaosoosoga o se mea e ao ona i ai, ona, “e ao ina faaosoosoina e le tiapolo le fanauga a tagata, a leai e le mafai ona avea i latou ma pule ia te i latou lava” (MF&F 29:39).

E Faamaoni le Atua

Faamaoni—talitonuina, faatuatuaina. E mafai ona tatou talitonu i folafolaga a le Atua, o le a Ia fesoasoani e tauave ma laveai i tatou mai faaosoosoga.

E Sili Atu i Mea Tou te Gafatia

E tatau ona tatou taumafai e aloese i faaosoosoga. O nisi taimi tatou te faafaigataina ai mo i tatou lava, e ala i le le teenaina o faaosoosoga i le taimi lava e oo mai ai. E pei ona aoao mai Elder Neal A. Maxwell (1926–2004) o le Korama a Aposetolo e Toasefululua, “E moni lava na silafia e Iesu faaosoosoga tetele na faapea ona oo mai ia te ia, ae Na te le’i mafaufau ma saga mafaufau i ai. Peitai, na vave ona Ia teenaina. Afai tatou te taliaina tofotofoga, o le a le pine ae o latou faafiafiaina i tatou!” (Konafesi Aoao o Aperila 1987).

O Se Auala e Sola Ese Ai

O loo i ai lava se [auala] e sola ese ai—se isi filifiliga, se isi nofoaga e alu i ai, se isi mea e fai. Afai e le manuia taumafaiga uma, ia mulimuli i le faataitaiga a Iosefa o Aikupito, ma na ona sola ese mai ai (tagai Kenese 39:7–12).

Mafai ona Onosaia

Ua tuuina mai i tusitusiga paia nisi o mea faapitoa e fesoasoani ia i tatou i lo tatou tiutetauave o le aloese mai i faaosoosoga ina ia mafai ona tatou onosaia:

Ia mataala ma tatalo e le aunoa (tagai Mataio 26:41; Alema 13:28; 31:10; 34:39; 3 Nifae 18:18; MF&F 31:12).
Faalagolago ia Iesu Keriso (tagai Alema 37:33), aua “na tigaina o ia ina o tofotofoina, o le mea lea ua mafai ai o ia ona fesoasoani i e ua tofotofoina” (Eperu 2:18; tagai foi i le Alema 7:11).
“Ia outou faamaualalalo outou lava i luma o le Alii” (Alema 13:28) ma “faaeteete i le faamaualuga” (MF&F 23:1).
“Faalogo i le afioga a le Atua, ma … pipiimau i ai” (1 Nifae 15:24).