’A faʼaineine nō te hiero i te mau mahana atoʼa
I te ivaraʼa ʼo tōʼu matahiti, e ’orometua haʼapiʼi Paraimere faʼahiahia tō’u ʼo te tuahine Kohler te iʼoa. E mea māmahu roa vau, ’e nō tōna maitaʼi rahi e mea au roa nā’u ’ia haere nā muri iāna. I te hōʼē mahana ’ua hōroʼa mai ʼoia ia mātou tātaʼitahi i te hōʼē ʼapi parau. ’Ua pāpaʼi mātou pāʼātoʼa i te mea tā mātou i hinaʼaro i te rave ’ia paʼari anaʼe mātou. ’Ua pāpaʼi au : « Haere i te fare haʼapiʼiraʼa teitei ’e ’ia faʼaipoipo i roto i te hiero ». ’Ua tāpiri au i tāʼu parau i niʼa i te ’ōpani ’o tō’u vairaʼa ’ahu. I te pō, e ʼanaʼana mai te mori nō te mori porōmu nā roto mai i tōʼu haʼamāramarama. ’Ua hiʼo vau i tāʼu ʼapi parau. E faʼahaʼamanaʼo te reira iāʼu i tōʼu hinaʼaro ’ia haere i te hiero.
I taua taime ra, tē vai ra e 12 hiero anaʼe i te ao nei. ’Ua hinaʼaro vau i te haere i te mau hiero atoʼa.
I te mau taime atoʼa e faʼanaho tōʼu metua vahine ’e metua tane i te hōʼē tau faʼafaʼaearaʼa, e ’āfaʼi tāmau rāua i tō mātou ʼutuāfare i te hiero. Tē ora ra mātou i Oregon, Marite. Te hiero piri roa aʼe tei te 965 kilometera ïa te ātea i Cardston, Alberta, Canada. ’Aita e faʼatoʼetoʼeraʼa i roto i tō mātou pereʼoʼo uira. E pārahi tōʼu taeaʼe ’e tuahine ’e ʼo vau i te pārahiraʼa i muri. E faʼatautau mātou i te hōʼē tauera rari i rāpae mai i te haʼamāramarama ʼo te pereʼoʼo uira. I muri iho e tuʼu mātou i te reira i niʼa i tō mātou ’aʼī nō te haʼapūvaʼivaʼi.
E ʼoaʼoa rahi ’ia ʼite mātou i te pae hopeʼa i te hiero. ’Aita vau i ʼite rahi i te mea e tupu ra i reira, e ʼoaʼoa noa rā tōʼu mau metua ’ia haere mai rāua i rāpae au. ’Ua ʼite au e mea faufaʼa rahi te hiero. ’Ua ʼite au e fare te reira nō te Fatu. (I roto i te hōho’a, e ’ahu ’uo’uo tō’u)
I te 12 raʼa ʼo tōʼu matahiti ’ua rave au i te mau bāpetizoraʼa i roto i te mau hiero e rave rahi. I muri iho i te taime ’a fārerei ai au i tāʼu tāne faʼaipoipo, ’ua ’ite au ē ’ua here atoʼa ʼoia i te hiero ! ’Ua fa’aipoipohia māua i roto i te hiero nō Manti Utaha.
E nehenehe tā ʼoutou e faʼaineine nō te hiero i te mau mahana atoʼa. ’A haere i te hiero i te mau taime atoʼa e nehenehe ia ʼoutou. ’A tāpeʼa atu i te mau papa’i. I te 11ra’a o te matahiti o tā’u mo’otua tamāroa ’o Jarret, ’ua ’ohipa ’oia i ni’a i te ’ā’amu ’utuāfare i te mau sābati ato’a e tōna pāpā. ’Ua ’itehia mai iāna e rave rahi i’oa o te mau tupuna. I teie nei e 12 matahiti tōna, tē rave nei ’oia i te mau bāpetizora’a nō teie mau tupuna.
Tei roto anaʼe ʼoutou i te hiero, e nehenehe ʼoutou e haere i te vāhi tā Iesu i haere. Nōna teie fare. Tē tiʼaturi nei au ē e pure ʼoutou i te mau mahana atoʼa i te Metua i te Ao ra nō te tauturu ia ʼoutou ’ia faʼaineine i te tomo i roto i te hiero ’e ’ia ʼite i Tōna here.