Mau buka tei moʼe, ʼiteraʼa pāpū tei haʼamanaʼohia
Tē ora nei te ta’ata pāpa’i i Cagayan, Firipino
Tei niʼa iāʼu te mau mata atoʼa. E nehenehe ānei iāʼu ’ia pāruru i te ʼĒkālesia ma tōʼu noa ʼiteraʼa pāpū ?
I te hōʼē matahiti ’ua haʼamau vau i te hōʼē fā nō te haʼamaitaʼi i tāʼu haʼapiʼiraʼa i te pae vārua. E ’āfaʼi au i te mau buka ʼa te ʼĒkālesia, te mau buka iti, te mau buka haʼapiʼiraʼa, ’e te mau pāpaʼiraʼa moʼa i te mau vāhi atoʼa, tae noa atu i te fare haʼapiʼiraʼa, nō tōʼu hiaʼai i te mau parau ʼa te Atua. ’Ua haʼamarirauhia ra tāʼu mau tūtavaraʼa i te taime ʼa faʼaineine ai au nō te hōʼē hiʼopoʼaraʼa.
I te hōʼē mahana ’ua faʼatere te ʼorometua haʼapiʼi i te hōʼē paraparauraʼa ’e ’ua ani ʼoia i te mau pīahi i roto i te piha haʼapiʼiraʼa e ʼere i te katolika ’ia tiʼa mai i niʼa. ’O vau ana‘e te Feiā Moʼa i te mau mahana hopeʼa nei i roto i te piha haʼapiʼiraʼa. ’Ua tiʼa atoʼa mai e ono atu mau pīahi.
’Ua uiuihia mātou i muri iho : E aha tā ʼoutou ʼĒkālesia ? O vai te taʼata i faʼatiʼa i te reira ? Nāhea tā ʼoutou ʼēkālesia i te faʼatiʼaraʼahia ?
ʼO vau te pīahi hopeʼa i te pāhonora’a. ’Ua huru taiā vau i tōʼu ʼiteraʼa ē ’aita vau i ʼāfaʼi mai i tāʼu mau buka nō te ʼĒkālesia, ’ua tāmata rā vau i te haʼamanaʼo i te mau mea tāʼu i taiʼo. ’Ua puta mai te hōʼē ’īrava nō te Bibilia i roto i te feruriraʼa :
« E ti‘aturi ia Iehova ma tō ʼāʼau atoʼa ra ; ’eiaha rā e ti‘aturi i tō ’oe ihora haʼapa‘o.
« ’Eiaha e haʼamo‘e iāna i tō ’oe atoʼa ra mau haereʼa ; e nāna e faʼaʼite ia ’oe i tō ’oe ra mau haereʼa » (Maseli 3:5–6).
’Ua tiʼa atu vau i mua i te mau pīahi ma te itoito ’e ’ua moʼe tōʼu mau riʼariʼa. ’Ua parau vau ē e melo vau nō te ʼĒkālesia a Iesu Mesia i te Feiā Mo‘a i te Mau Mahana Hopeʼa nei. ’Ua faʼaʼite au i te ʼāʼamu no te hōʼē tamaiti ʼāpī, ʼo Iosepha Semita, tei ʼite i te Atua. ’Ua ʼite au i te hōʼē māhanahana i roto i tōʼu ʼōuma ’e ’ua tahe tōʼu roimata. ’Ua faʼaʼite au ’e ’ua faʼatiʼahia te ʼĒkālesia i te 6 nō ’ēperēra 1830 ’e ’ua faʼaʼite au ē ’ua piʼihia te hōʼē peropheta ʼa te Atua ’e ’ua faʼahoʼihia mai te autahuʼaraʼa. ’Ua faʼaʼite au ē e parau mau teie mau mea atoʼa.
’Ua hoʼonahia te mau hora e rave rahi nō te tuatāpaparaʼa i te ʼēvanelia. ’Ua tauturu te reira iāʼu ’ia pāruru i tōʼu nei faʼaroʼo ’e ’ia faʼaʼite i te ʼēvanelia. ’Ua ʼoaʼoa roa vau nō te mea e rave rahi mau hepetoma i muri iho e maha ʼo tōʼu mau hoa pīahi tei ’āmui iāʼu i roto i te ʼēkālesia.
Nā teie ʼohipa tei tupu i haʼapiʼi mai iāʼu i te faufaʼa rahi nō te hōʼē ʼiteraʼa pāpū. I te haʼamataraʼa ’ua uiui au nō te aha ra te Fatu i ʼore ai i faʼauru iāʼu ’ia ’āfaʼi mai i tāʼu mau buka i taua mahana ra. E tauturu ïa te reira iāʼu ’ia pāhono maitaʼi atu i te mau uiraʼa tei uihia mai. ’Ua ʼite rā vau ā e’ita tātou e tītauhia ’ia tāmau ʼāʼau i te mau mea atoʼa nō niʼa i te ʼĒkālesia ’aore rā ’ia tiʼaturi atu i te mau faʼahororaʼa—e tiʼa rā ia tātou ’ia tuatāpapa, ’ia ora, ’e ’ia faʼaʼite i te ʼēvanelia, ma te tiʼaturi i te Vārua Maitaʼi. ’Aita paha tāʼu mau buka, e ʼiteraʼa pāpū rā toʼu.