Ang Karaan nga Album sa PamilyaAng Gahum sa mga Istorya sa Pamilya
Ang tagsulat nagpuyo sa New York, USA.
Ang kabilin sa akong mga katigulangan nagpadayon pinaagi nako, kanunay nga nag-impluwensya sa akong kinabuhi sa mas maayo.
Usa ka buntag sa ting-init sa wala pa ang Ikaduhang Gubat sa Kalibutan, ang akong apohan sa tuhod nga lalaki nakamata nga kanunay niyang gihimo—sa dili pa mosubang ang adlaw. Migawas siya sa iyang balay sa usa ka bungtod nga nag-umbaw sa usa ka berde nga walog ug sa iyang baryo sa Romania, ug milingkod sa balili nga nag-umog sa yamog sa kabuntagon, naghunahuna og lawom—sa sama nga mga hunahuna nga taud-taod na. Usa ka edukado nga tawo nga dunay maloloy-on nga kasingkasing ug mausisaon nga hunahuna, gimahal ug gitahud siya sa tanan sa baryo. Ang iyang baryo, nahimutang sa yuta sa karaang sapa sa Olt, nga mao ang sanglitanan sa mahangturon nga imahe sa baryo sa Romania, diin ang karaang kustombre inubanan sa daw ingkantasya [fairyland] nga porma sa yuta, usa ka bahandianon nga kustombre sa nindot kaayo nga talan-awon, ug ang natural nga responsibilidad sa pag-atiman sa mga butang ug mga tradisyon nga napanunod sa tawo gikan sa katigulangan ug gipasa kini ngadto sa sunod nga henerasyon.
Pagsubang na sa adlaw, misulod siya sa balay ug mitug-an sa iyang asawa nga siya ganahan nga motan-aw kon unsa kaha ang kahimtang sa iyang haya, ug gusto siya nga mag-rehearsal sa haya. Mitakda siya og petsa, mipalit sa lungon, misuhol og pari ug propesyunal nga mga tigbangutan, ug miandam sa tanang ubang mga butang nga gikinahanglan sa mga tradisyon sa Greek Orthodox. Ang adlaw sa rehearsal sa haya miabut. Ang mga lamesa gibutang sa tunga-tunga sa baryo alang sa kumbira sa paghinumdom, ang tanan sa pamilya nagsul-ob og itom, ang pari miabut, ang akong apohan sa tuhod nga lalaki mihigda sa lungon, gipahimutang ang unlan aron siya komportable nga makasud-ong, ug misugod ang prosesyon sa haya. Sa dihang nahuman ang seremonya, ang tibuok baryo gidapit sa kumbira, diin ang akong lolo sa tuhod mituman sa iyang damgo sa pagsayaw sa iyang kaugalingong haya. Nabuhi pa siya og laing 20 ka tuig, kanunay nga nagsusi kon masulod ba siya gihapon sa iyang lungon.
Dili Lamang sa mga Ngalan ug mga Petsa
Wala gayud nako ikahimamat ang akong lolo sa tuhod, apan ang iyang istorya maoy akong paborito nga gipasa ngari kanako pinaagi sa akong mga apohan. Kada adlaw sila mosugilon sa akong mga igsoon ug kanako og mga istorya sa among mga katigulangan: diin sila gikan, unsa sila nahisama, sa ilang mga mithi, mga damgo ug mga pangandoy. Human mangaon matag Dominggo, ilang ipagawas ang karaan nga album sa pamilya, Sa kada pakli sa pahina, ang mga istorya mahimong buhi, ang nanglabay na ug ang kasamtangan ug isip mga kasingkasing nga nabugkos diha sa usa ka lakang ngadto sa gugma nga nakalahutay sa hagit sa panahon. Dili lang kay karaan na kini nga mga litrato nga dunay mga pangalan ug mga petsa sa luyo. Luyo sa matag nawong mao ang usa ka amahan o inahan, usa ka anak nga lalaki o anak nga babaye, usa ka igsoon nga lalaki o usa ka igsoon nga babaye. Para namo sila mga tinuod nga mga tawo nga may pangandloy ug mga damgo, panglimbasug ug mga kasagmuyo, mga kalampusan ug kapakyasan. Bisan og wala na sila sa pagkakaron, ang ilang mga estorya magpadayong buhi, ang ilang mga kabilin magpadayon sa sanag, ug ang ilang mga panagway magpadayon sa pagpahiyum gikan sa karaang album sa pamilya nga karon nabugkon diha sa gugma sa kasingkasing sulod sa unom ka generasyon.
Kalig-on sa mga Panahon sa Pagsulay
Sa dihang 19 na ko, ang akong mga ginikanan ug kasagaran sa akong pamilya patay na, ug daghan sa mga kabtangan nga akong napanunod nawala o gikawat. Ug gani adunay usa ka butang nga ang panahon, natural nga mga kalamidad, o bisan ang kamatayon dili gayud makalaglag: ang pagbati og gugma alang sa mga katigulangan ug kahibalo sa kasaysayan sa pamilya nga gibilin sa matag usa sa mga sakop sa akong pamilya. Tungod sa ilang kakugi, ang mga butang nga nagbugkos sa among mga kasingkasing napamatud-ang mas lig-on kay sa bisan unsang mortal nga mga pagsulay ug naghatag kanako sa kalig-on sa pagbuntog sa malisud nga mga kahimtang.
Sa dihang namatay ang akong mga ginikanan ug apohan, akong gibati ang hilabihan nga kasubo nga naghunahuna ko kon ako aduna bay igong kalig-on sa pagpadayon. Apan akong nabati ang ilang impluwensya gikan sa pikas tabil, ug kana nakatabang nako nga makaangkon og usa ka dili matarug pagpamatuod sa kinabuhi human sa kamatayon, ug sa wala madugay, sa mga ordinansa sa templo. Wala gayud ko makahinumdom unsay hitsura sa akong inahan, ingon man ikahimamat ang akong mga apohan sa tuhod, apan sa matag higayon nga mopunit ko sa karaang album sa pamilya, akong makita akong kaugalingon sa ilang mga mata. Ako mao ako tungod sa tanan niadtong kinsa nag-una kanako ug ang ilang mga kasinatian ug kaalam mao ang mihulma sa akong kinaiya ug naggiya kanako subay sa akong dalan.
Kanunay maghunahuna ko sa akong pamilya sa pikas nga bahin sa tabil ug sa mga sakripisyo nga ilang gihimo alang kanako aron makabaton og mas maayong kinabuhi. Naghunahuna ko sa mga ordinansa sa templo nga nakapahimo kanato nga magkahiusa pag-usab isip usa ka pamilya sa pipila ka mga adlaw. Ug ako naghunahuna sa Pag-ula ni Kristo, kinsa mihimo sa tanan nga posible. Iyang gibayran ang bili aron kita mabuhi. Tungod niini kita nahigugma Kaniya ug mosimba Kaniya uban sa pasalamat sa karon ug sa kahangturan.