Ang akong tiyo usa ka artist ug naghimo og gagmay nga kahoy nga mga barko sa sulod sa bildo nga mga botelya. Nagkinahanglan kini og dakong panahon, konsentrasyon, ug paningkamot sa paghimo niini.

Usa ka adlaw akong nakita ang tanan niyang mga himan ug nakamatikod kon sa unsang paagi ang matag himan gigamit alang sa usa ka piho nga detalye o sa paghulma sa barko. Samtang nagtan-aw ko niya nga nagtrabaho, nasurprisa ko sa paagi nga iyang gamiton ang mga himan sa paghimo niini nga mga barko. Nahinumdom ko sa istorya ni Nephi nga naghimo og barko (tan-awa sa 1 Nephi 17–18). Gihimo niya kini sumala sa pamaagi sa Ginoo, dili sa pamaagi sa tawo. Ang Dios naghatag kanato og mga himan sa paghimo og atong kaugalingong mga barko sa Iyang paagi. Ang mga kasulatan, hugot nga pagtuo, ug gugma sa Dios mao ang mga himan nga kinahanglan nakong gamiton sa akong kinabuhi aron mainampingong mohimo sa akong kaugalingong barko nga walay bisan unsang liki. Nagkat-on ko matag adlaw nga mahimong disipulo sa Ginoo.

Usa kadto ka bugnaw nga tingpamulak sa Denmark. Mao pay pagsugod nako sa akong full-time nga misyon, ug nanlimbasug ko sa akong pagpamatuod. Usa ko ka kinabig sulod sa 19 pa lamang ka bulan ug napuno ko sa kahadlok nga moatubang og langyaw nga nasud, usa ka pinulongan nga dili ko makasulti, ug makalibog nga mga dalan nga maglisud ko sa pagsubay. Ang ako kanhi puno sa pasalamat nga mga pag-ampo sa wala madugay nahimong pait nga mga pasangil: “Dios, nganong gipasagdan man ko nimo nga nag-inusara?”

Usa ka buntag nangamuyo ako Kaniya pinaagi sa pag-ampo. Apan imbis nga mangutana og “ngano” nga may kasuko sa akong kasingkasing, nangamuyo ako alang sa usa ka saksi sa kamatuoran sa ebanghelyo ug nga mapugngan ang akong mga pagduha-duha.

Human sa pag-ampo, akong gipakli ang akong mga kasulatan. Naablihan nako ang Deuteronomio 31:6: “Magmakusganon kamo ug magmadasigon kamo; dili kamo malisang kanila, ug dili kamo mahadlok kanila: kay ang Ginoo nga imong Dios mao ang magauban kanimo; dili ka pasagdan niya, ni pagabiyaan ikaw niya.”

Ang akong kasingkasing napuno sa kalipay samtang akong naamguhan ang tubag sa akong pag-ampo: Ang Dios kanunay diay nga nagauban kanako. Nagpaabut lamang Siya sa sinsero nga pag-ampo imbis sa mga pasangil sa pagbiya.

Ang Dios dili gayud mobiya nako, bisan kon ang tanan daw wala nay paglaum. Ug atong mabati ang kainit sa Iyang gugma pinaagi sa pag-ampo ug sa Iyang mga kasulatan.