Nāhea ’ia ʼite i te hau mau

Hōho’a

Jesus Christ in a crowd

’Ua vai na ’e e vai noa ā te hiaʼai hanahana ʼo te taʼata maitaʼi i te mau vāhi ato’a, nō te hau i roto i te ao nei. ’Eiaha roa atu tātou e faʼaru‘e i te tāpaeraʼa i teie fā. Noa atu rā, ’ua ha’api’i te peresideni Joseph F. Smith (1838--1918) ē, « E’ita roa e nehenehe i te vārua ʼo te hau ’e ʼo te here ’ia tae mai i te ao nei… maori rā, ’;ia fāriʼi te taʼata nei i te parau mau ’a te Atua ’e te parau poro‘i ʼa te Atua…, e ’ia fāriʼi i tōna pūai ’e tōna mana tei riro ho’i ’ei mea hanahana ».

Tē tiaʼi mau nei tātou ’e tē pure atoʼa nei nō te hau nui, tera rā, e mea nā roto i te taʼata hōʼē ’e i te mau utuafare e roaʼa ai ia tātou te huru hau tei fafauhia ’ei utu‘a nō te parau-ti‘a. Teie hau, o te hōʼē hōro‘a fafau ïa nō te misiōni ʼa te Faʼaora ’e te tusia tāraʼehara.

E ʼere te hau i te oraraʼa pāruruhia noa ’aore rā te ʼereraʼa te tamaʼi, te hitahita, te arora’a ’e te mārōraʼa. E tae mai te hau nā roto i te ’iteraʼa ē, ’ua ʼite te Faʼaora, ʼo vai tātou ’e ’ua ʼite ʼOia ē e faʼaroʼo tō tātou Iāna, ’ua here tātou Iāna, e tē haʼapaʼo nei tātou i Tāna mau faʼaueraʼa, ’e te reira, noa atu ā te mau tāmataraʼa pohe rahi ’e te mau ʼati ʼo te oraraʼa. (hiʼo PF&PF 121:7–8).

« I hea vau e fāriʼi ai te hau ? Tei hea te tautururaʼa ? ’Ia tupu te ’oto ’e te riri ra, e hi’o vau i roto iā’u nei. (« I hea Vau e Fāriʼi ai te Hau ? ») Te Mau Hīmene, no. 62. Te pāhonoraʼa ʼo te Faʼaora ïa, te puna ’e te tumu nō te hau. ʼO ʼOia te « Ariʼi nō te Hau » (Isaia 9:6).

Te faʼaha’ehaʼaraʼa ’ia tātou iho i mua i te Atua, te pureraʼa i te mau taime atoʼa, te tātarahaparaʼa i te mau hara, te tomoraʼa i roto i te pape nō te bāpetizoraʼa ma te āʼau tātarahapa ’e te vārua mārū, ’e te riroraʼa ’ei mau pipi mau nā Iesu Mesia e mau hōhoʼa hōhonu ïa nō te parau-tiʼa ʼo te faʼaʼutuʼahia e te hau mure ʼore.

E haʼapūraʼa te ʼĒkālesia i reira te feiā peʼe i te Mesia e tae ai i te hau. Tē parau nei vetahi feiā ’āpī i roto i teie nei ao ē, te haʼapa‘o nei rātou i te pae vārua, ʼaita rā e haʼapa‘oraʼa. E taʼahira’a mātāmua maitaʼi roa te haʼapa‘oraʼa i te pae vārua. ’Āre‘a rā, tei roto i te ʼĒkālesia tātou e aupuruhia ai, e haʼapiʼihia ai, ’e e faʼaʼamuhia ai i te parau maitaʼi ʼa te Atua. Hau atu ra i te faufa’a rahi, nā te mana ʼo te autahu‘araʼa i roto i te ʼĒkālesia e faʼafana‘o i te mau ʼōro‘a mo‘a ’e te mau fafauraʼa o te taʼamu i te mau ʼutuāfare ’e e faʼati‘a atoʼa ho‘i ia tātou tāta‘itahi ’ia ho‘i atu i te Atua te Metua ’e ia Iesu Mesia i roto i te bāsileia tiretiera. E hōpoi mai teie mau ’ōro‘a i te hau nō te mea e mau fafauraʼa te reira i te Fatu ra.

ʼO te mau hiero te mau vāhi i reira te rahiraʼa ʼo teie mau ʼōro‘a mo‘a e tupu ai ’e ’ua riro ato’a te reira ’ei hō’ē puna nō te haʼapuraʼa hau i roto i te ao nei. Te feiā e rātere nei nā roto i te mau ’āua o te hiero ’e ʼaore rā ʼo te haere nei i te mau ’ōpani ’īriti, ’ua putapū atoʼa ïa rātou i te reira hau.

ʼO Iesu Mesia tō tātou puna nō te hau mau. Noa atu te mau tāmataraʼa o te orara’a nei, nā roto i te Tāraʼehara ʼa te Faʼaora ’e Tōna aroha, e upoʼoti‘a te oraraʼa parau-ti‘a ’e te hau i roto ia tātou. (hiʼo Ioane 14:26–27; 16:33).