E taʼata tarai tōʼu metua tāne fētiʼi ’e e hāmani ʼoia i te mau pahī rāʼau naʼinaʼi i roto i te mau mōhina hiʼo. E tītauhia te taime rahi, te haʼapaʼo-maitaʼi-raʼa, ’e te tautoʼora’a nō te hāmani i te reira mau pahī.

’Ua ʼite au i te hōʼē mahana i te tāʼātoʼaraʼa ʼo tāna mau mauhaʼa ’e ’ua ʼite au e nāhea te mauhaʼa tātaʼitahi i te faʼaʼohipahia nō te hōʼē ʼohipa taʼa ʼē ’aore rā te tarairaʼa i te pahī. ’A hiʼo ai au iāna i te raveraʼa i te ʼohipa, ’ua māere au i te huru nō tāna faʼaʼohiparaʼa i te mau mauhaʼa nō te hāmani i teie mau pahī. ’Ua faʼahaʼamanaʼohia vau i te ʼāʼamu nō tō Nephi hāmaniraʼa i te hōʼē pahī (hiʼo 1 Nephi 17–18). ’Ua hāmani ʼoia mai te huru raveraʼa ʼa te Fatu, e ʼere i te huru raveraʼa ʼa te taʼata. ’Ua hōroʼa mai te Atua ia tātou i te mau mauhaʼa nō te hāmani i tō tātou iho mau pahī mai Tāna huru raveraʼa. Te mau pāpaʼiraʼa moʼa, te faʼaroʼo, ’e te here ʼo te Atua e mau mauhaʼa ïa e tiʼa iāʼu ’ia faʼaʼohipa i roto i tōʼu iho oraraʼa nō te hāmani maita’i i tōʼu iho pahī ma te pāpararī ʼore. Tē haʼapiʼi nei au i te mau mahana atoʼa ’ia riro ’ei pipi nā te Fatu.

E tau faʼatupuraʼa rāʼau toʼetoʼe i Danemaka. Nō haʼamata iho nei au i tāʼu misiōni rave tāmau, ’e tē fifi ra tōʼu ʼiteraʼa pāpū. E 19 avaʼe noa tōʼu faʼafāriuraʼahia ’e ’ua ’ī au i te mau mea pāpū ʼore nō te haere atu i te hōʼē fenua ʼeʼē, te hōʼē reo e’ita e noaʼa iāʼu i te parau, ’e te rahiraʼa porōmu e’ita e noaʼa iāʼu i te tere atu. ’Aita i maoro roa ’ua riro tāʼu mau pure tei ’ī i te hōʼē taime i te māuruuru ’ei mau faʼahaparaʼa māramarama : « E te Atua, nō te aha ’oe i vaiiho mai ai iāʼu ʼo vau anaʼe ? »

I te hōʼē poʼipoʼi ’ua tiʼaoro vau Iāna nā roto i te pure. ’Aita vau i ani ma te riri i roto i tōʼu ʼāʼau « nō te aha », ’ua tāparu rā vau nō te hōʼē ʼiteraʼa pāpū nō niʼa i te parau mau ʼo te ʼevanelia ’e te faʼaʼoreraʼa i tōʼu mau fēʼaʼaraʼa.

I muri aʼe i te pure, ’ua ’īriti au i tāʼu mau pāpaʼiraʼa moʼa. ’Ua maʼiri au i niʼa i te Deuteronomi 31:6 : « Faʼa’eta’eta ’e ’ia itoito roa, ’eiaha e taiā, ’eiaha roa e mata‘u ia rātou ; tē haere ato’a nei ho‘i tō Atua ʼo Iehova ia ’oe, e ’ore ʼoia e faʼaru‘e ia ’oe, e ʼore e haere ’ē ».

’Ua ’ī tōʼu ʼāʼau i te ʼoaʼoa i tōʼu ʼiteraʼa i te pāhonoraʼa i tāʼu pure : Tei pihaʼi iho noa te Atua i te mau taime atoʼa. Te tiaʼi noa ra ʼOia i te pure ma te ʼāʼau hinaʼaro mau ’eiaha rā te mau faʼahaparaʼa nō te fa’aru’era’a mai.

E’ita roa atu te Atua e faʼaruʼe iāʼu, noa atu e au ra e ’aita e tiʼaturiraʼa faʼahou. ’E e nehenehe tā tātou e ʼite i Tōna hihi mahana nā roto i te mau pure ’e Tāna mau pāpaʼiraʼa moʼa.