Ima eke Ofonde Ama Ebin Ndik Efeb

Ke esisit mme isua Ikie emi ekebede ke Edere-edere America, nka kiet emi ekotde “Akwa ini Edidemere” ama asiaha oyoho idut oro. Kiet kotu akpan ntak nka emi ekedi nditi mbon owo emi etiede nte edede kabanga nkpo Abasi.

Ekpri Joseph Smith ama okop mmem-idem oto ke mme nkpo emi enye okokopde oto mme okworo-iko emi ekedide ubak-mbon ido-ukpono edidemere emi. Oro edi kiet kotu ntak emi enye ekebiereke nditim ndiongo uduak Abasi ke ndibe akam.

Mme okworo-iko emi ema eworo edi ye nsio-nwut, odudu ido ukworo-iko kiet ye iko Abasi emi ekedade okposong nditing-nyiri mbanga akwa ndik hell emi anade-ebet anam-idiok.¹ Ukworo-iko mmo ikanamke mme owo eduo idap aba—edi emi ama esisin esisit idiok-ndap. Etie nte ke ufon ye ubono-nkpo mmo ekedi ndidige mme owo man eduk ufok Abasi.

Ke eset, ekesiwak ndida ndik nte usung ke ndida nam owo enam nkpo. Mme ete ye eka eda ndik enam-nkpo ye ndito mmo, mme enyene-utom ye anam-utom, ye mbon-mbre-ukara ye mme andifik-ubok.

Ntaifiok ke nkpo-udua efiok odudu ndik ndien esiwak ndida ndik nam nkpo. Ntak edi emi ebietde ubak usuanetop nkpo-udua esinode ndobo-etop ete edieke nnyin midepke udia-usenubok mmo eketode ubon-ibokpot mme ndinana obufa mbre video mme handset, nnyin iyedu uwem ukut, idikpa ikpong ye unana inemesit.

Nnyin imema emi inyung ikere ke nnyin ididuoho iduk ke oruk edikwangare emi, edi ke ubakini nnyin imenam ntre. Ndiok-nkan, ke ubakini nnyin imeda ukem usung emi inam mbio efen enam se nnyin iyomde.

Etop mi enyene ufon mbiba mfin emi: Akpa edi ndikpek ye nnyin ete ikere inyung ise ndaha emi nnyin isidade ndik isin man mbio efen enam nkpo—nnyin imesine do. Udiana edi ndikere usung eke ofonde akan ndida nam nkpo.

Akpa, yak nnyin iting-ibanga mfina emi asanagade ye ndik Nte ededi, akananam anie kotu nnyin ke emikekpakke oto ke ndik man edia-udia ofon, ekpaha seat belt, esingi-idem ofon, enim okuk, ye ke nditua-mkpofiok ke idioknkpo?

Edi akpaniko ke ndik ekeme ndinyene ata odudu ke mme edinam ye edu-uwem nnyin. Etie nte odudu oro esidi ke esisit-ini ndien ikponke. Ndik isiwakke ndinyene odudu ndikpuho esit nnyin, ndien akananam enye idikpuhoke nnyin isin ke mme owo emi emade se inen ye mbio emi eyomde ndikop-item Ete ke Enyong.

Mme owo emi ekopde ndik ekeme ndidoho enyung enam nti-nkpo, edi mmo idi ikereke nti-nkpo. Mmo esiwak ndikere ke esesin mmimo ke unwam iduhe, ndien eyat-esit. Nte ini akade-iso mme ekikere emi eyeda ekesim unana-mbuotidem, nsong-ibuot, ye enwan nko.

Ke ndiok-iso, ndutime ediyom nkpo eke uwem ye ndausung ikureke ke nkpo ererimbot kpot. Esinam mi mbom kini ami nkopde mbanga mbon Ufok Abasi nnyin emi enamde ndioi ukara—mme ke ufok mmo, ke ikoot Ufok Abasi mmo, ke itie utom, mme ke ebuana mmo ye mbio efen k’usen-k’usen.

Ke ediwak ini, mme owo ekeme ndibiom owo ikpe ke ndituai mbon efen, edi mmo ikemeke ndikut oro nno idem mmo. Mmo eyom ekop-item eno idiok mbet mmo, edi kini mbio efen minamke mme idiok mbet emi, mme owo emi etuno mmo ke iko-inua, idiok ekikere, ubakini ye ke edimia-mia.

Jehovah okodoho ete ke “ini emi … enyene itie oku akarade mme ke ndifik mme ke ndikpak mbio efen ke odudu, ke usung emi minenke, … odudu Abasi oworo [ndien] Spirit Abasi ofuho.”²

Ekeme ndidi odu mme ini emi nnyin ikerede ete ke imenen ke edinam nnyin ke ndinim ete ke eti iboro oworo oto do. Nnyin imekeme ndikere ete ke ndikara mbio efen, mfik, mme ndisong-ido edidi ke ufon mbio efen. Emi inenke, koro Jehovah anam anwanga ete ke, “mbunwum Spirit edi ima, ye idaresit, ye emem, ye ime, ye mfon-ido, ye eti ido, ye erinam-akpaniko, ye ifure-ifure ido, [ye] mfara-ke idem.”³

Danga nte ami ndidiongo Ete mi ke Enyong ofon, ami ndikut danga nte Enye ekpemede onyung adade ndito Esie usung. Enye idihe ayat-esit, otoho-utok, ye osio-idiok-usiene Abasi.⁴ Akpan ntak esie—utom ye ubong Esie—edi ndikpeme nnyin, mmenede nnyin ke enyong, nnyung nda nnyin usung nkesim uyoho Esie.⁵

Abasi eting Idemesie owut Moses nte “Abasi mbom, ye mfon, ye anyan-ime, awak-ima ke nti-nkpo ye akpaniko.”⁶

Ima emi Ete nnyin ke Enyong enyenede ono nnyin, ndito Esie, enengede okpon oyom usung-akan ukeme nnyin ndifiok.⁷

Nte emi oworo ete ke Abasi amama ndien isehe mme edu-uwem emi misangake ye mbet Abasi? Ihn-ihn, idige ntre!

Edi Enye oyom ukpuhore emi ofonde akan edu-uwem nnyin. Enye oyom ndikpuho ata uduot-obot nnyin. Enye oyom ndikpuho esit nnyin. Enye oyom ndikpuho esit nnyin.

Enye oyom nnyin inyan-ubok ndien imum iko Abasi ikama, inwana ye ndik nnyin, inyung ika-iso isanga ise Abasi ke mkpafaha ye nnen-nnen usung. Enye oyom emi ono nnyin koro Enye ama nnyin, ndien koro emi edi usung ekedade ekesim inemesit.

Ntem, didie ke Abasi oyom ndito Esie etiene Enye ke eyo nnyin emi?

Enye Okono Eyen Esie edi

Abasi okono Jesus Christ, Ikpong-ikpong Eyen Esie emi Obonde edi man ediwut nnyin eti usung.

Abasi edinwam oto ke mkpe-ubok, anyan-ime, mfon-ido,nsuhore-idem, ye ata ima.⁸ Abasi odu ye nnyin. Enye ama nnyin, ndien ke ini nnyin iduode, Enye oyom nnyin idaha ke enyong, ifiak inam, inyung ikabare isongo-ida ofon.

Enye edi Andinyanga nnyin.

Enye edi Uwutnkpo ye odudu nnyin.

Enye oyom ndisongo nnyin ye mbuotidem.

Enye onim ete ke nnyin iyekpeb-nkpo ito mme ndudue nnyin ndien inam nti mbumek.

Eti usung edi emi!⁹

Kiet kotu usung emi Satan oyomde nnyin isikpak mbio efen edi ke ndiyire nkpo kpa ye ndikpon-inua kabanga idiok emi odude ke ererimbot.

Ke akpaniko ererimbot osuk esidi idiok, ndien eyekaka-iso, ndidiok. Ata ediwak owo eke miduehe ke ebo ndutuho oto ke ndaha uduot-obot nko oto ke ibak eke ubonowo. Nnwo ye ibak emi odude ke eyo nnyin otim okpon onyung enyene-ndik.

Edi ke esit ofuri emi, ami mmema ndidu ke eyo emi akan ndikidu ke ini efen tongo nte eketongo ererimbot. Nnyin imebo ufon akan nte edide ke ndidu ke ini uforo, ntat-enyin ye ufon eke minyeneke udomo. Akpan-akpan, nnyin imebo ufon ke ndinyene uyoho iko Abasi Jesus Christ, emi anamde nnyin ifiok ata mfina eke ererimbot onyung owut nte nnyin ikpefebde nkpo-ndk emi mme ndiyo mmo.

Ke ini ami nkerede mbanga mme edidiong emi, ami nyom ndiduo ke edong mi nnyung nno Ete nnyin ke Enyong itoro ke anana-utit ima emi Enye enyenende ono ndito Esie.

Ami nnimke ke Abasi oyom ndito Esie ekop-ndik mme ndibiat ini nkere mbanga idiok eke ererimbot. “Koro Abasi ikonoho nnyin spirit ndik; edi spirit odudu, ye ima ye mfara-ke-idem.”¹⁰

Enye omono nnyin oyoho-oyoho ntak ndidara. Nnyin inyene ndiyom nnyung ndiongo idaresit emi nko. Jehovah esiwak nditi nnyin ete, “ekukop ndik,” “ikufehe ndik,” edi “esong esit,”¹¹ ndien “mkpri otu-erong, ekunyene ndik.”¹²

Ndito-eka irenowo ye iban, nnyin idi “mkpri otu-erong” Jehovah. Nnyin idi Ndisana-owo eke ukpere-edem ini. Ke esit-enying nnyin edi nsinifik ke ndibet edifiak ndi eke Andinyanga nnyung mbenge idem nnyin ye ererimbot man ikpenyime Enye. Mmodo, yak nnyin inam nkpo ino Abasi inyung ima mbonowo nnyin efen. Yak nnyin inam emi ye ata uduot mbuotidem, ke nsuhore-idem isehe edu-ukpono efen mme eboho owo efen ekededi ke ndek. Ndito-eka iban ye irenowo, ema eno nnyin ubiong-utom ke ndikot iko Abasi nnyung nkop uyo Spirit, man nnyin “ikpefiok mme idiongo ini, ye idiongo eke edidi Eyen Owo.”¹³

Ke ntre, nnyin inanake-ifiok kabanga enwan ererimbot, nko nnyin imediongo nte ini nnyin emi osongde. Edi emi iworoke ete ke akpana nnyin ifina idem nnyin ye mbio efen kpukpru ini kabanga ndik. Edi ke nnyin itrede ndikere mbanga ndaha mfina nnyin, nte ikpofonke ndikere mbanga nsinsi ubong, mfon-ido, ye akakan odudu eke Abasi nnyin, ndinim Enye ke akpaniko nnyung mbenge-idem ye oyoho esit idara nno edifiak-ndi Jesus emi edide Christ?

Nte mbio enwongo Esie, inaha nte nnyin iduo oto ndik koro ndioi nkpo ekeme nditibe. Ke nde oro, nnyin imekeme ndika-iso ke mbuotidem, uko, ubiere, inyung inyene mbuotidem ke iko Abasi ke nte nnyin inwanade ye mme mfina ye ufang ekedude k’iso.¹⁴

Nnyin ikesangake ke usung owo mbet ikpong. “Koro edi Jehovah Abasi fo … asanga ye afo; Enye idikpongke fi, idinyung iduokke fi.”¹⁵

“Jehovah eyenwana ekong ono mbufo, edi mbufo ekam edop uyo.”¹⁶

Ke ini nnyin isobode ye ndik, yak nnyin ida uko, iwut mbuotidem nnyin, ndien inyene uko ke enwongo oro ete “baba nkpo ekong ekebotde ebanga mbufo idikwe unen.”¹⁷

Nte nnyin idu ke ini afanikong ye ndutime? Ihn nnyin idu do.

Mbufo eyekut ukut ke ererimbot: edi esong esit; Ami nkakan ererimbot”¹⁸

Ndi nnyin imekeme ndinyene mbuotidem man inim ke akpaniko inyung inam nkpo nte odotde? Ndi nnyin iyekeme ndinim mme ubiere ye ndisana ediomo nnyin? Ndi nnyin iyekeme ndinim mme mbet Abasi mme ekpedi ke idiok ndaha? Ke akpaniko nnyin imekeme!

Nnyin imekeme ndinam koro Abasi ama onwongo ete ke, “Kpukpru nkpo eyesanga otokiet ke ufon [nnyin], edieke [nnyin] isangade ke edinen-ido.”¹⁹ Ke ntre, yak nnyin itop mme ndik nnyin iduok inyung idung ke idara, nsuhore-idem, idorenyin, ye osongo uko koro Abasi odu ye nnyin.

Ndima ufan mi, ndima ndito-eka mi irenowo ye iban ke Christ, edieke nnyin ikutde idem nnyin ke ndik ye oyomo-nsia, mme nnyin edikut ete ke iko inua nnyin, edu-uwem, ye edinam nnyin esin ndik ke idem mbio efen, ami ke ofuri odudu ukpong mi mbenge nte yak nnyin ikpeworo ke ufun ndik emi oto ke edisana uyoho-ini eke edikande ndik emi: edide ata ima Christ, koro “ima eke ofonde ama ebin ndik efeb.”²⁰

Edisana ima Christ akakan idomo okono unan, nnyik, enwan, ye ufik.

Edisana ima Christ anam nnyin isanga ke nsuhore-idem, ukpono, ye osongo-uko ke ubiong-utom nnyin nte mme anditiene edima Andinyanga nnyin. Edisana ima Christ onono nnyin mbuotidem ndika-iso nam nkpo ke ufot ndik nnyin ndien onim ofuri mbuotidem nnyin ke odudu ye mfon-ido eke Ete nnyin ke Enyong, ye ke Eyen Esie, Jesus Christ.

Ke ufok nnyin, ke itie mbubehe nnyin, ke ikoot Ufok Abasi nnyin, yak nnyin inam edisana ima Christ ada itie ndik ke esit nnyin. Ima Christ eyenam mbuotidem ada itie ndik!

Ima Esie eyenwam nnyin ndidiongo, nim ke akpaniko, nnyung mbuotidem ke mfonido eke Ete nnyin ke Enyong, edisana uduak Esie, iko Abasi Esie, ye ke mme mbet Esie.²¹ Ndima Abasi ye mbonowo nnyin efen eyewongore nkopitem nnyin ke mbet Abasi esin ke edidiong akan ke ndidi mbiomo. Ima Christ eyenwam nnyin ikabare inyene ekpri mfon-ido, itim ifen ino owo, itim ise owo enyin, inyung itim isinifik ke utom Esie.

Nte iyohode esit nnyin ye ima Christ, nnyin iyedemere ye obufa spirit nsehe ndien iyesanga idara-idara, uko-uko, idemere, ye uwem ke unwana ye ubong eke edima Andinyanga nnyin, Jesus Christ.

Ami nting iko ntiense, ye Apostle John nte ke, “Ndik ndomokiet iduhe ke ima [Christ].”²² Ndito-eka irenowo ye iban, ndima ufan mi, Abasi odiongo mbufo mfon-mfon. Enye ama mbufo eti-eti. Enye ofiok se ini-iso mbufo edide. Enye odoho mbufo ete “ekufehe, kam nim ke akpaniko”²³ ndien “ididung ke [edisana] ima esie.²⁴ Emi edi akam ye edidiong mi ke enying Jesus Christ, amen.