Mahimong Sama ni Shiblon
Ni Elder Michael T. Ringwood
Sa Seventy
“Moingon ako nganha kanimo, akong anak, nga ako nakaangkon na og dako nga hingpit nga kalipay diha kanimo, tungod sa imong pagkamatinud-anon ug sa imong pagkamakugihon” (Alma 38: 3).
Ang akong bayani sa Basahon ni Mormon mao si Shiblon. Tinuod gyud siya nga maayo. Wala siya mabalaka kon unsay hunahuna sa ubang mga tawo mahitungod kaniya. Nagpakabana lamang siya mahitungod sa pagsunod sa Langitnong Amahan. Ang iyang papa, si Alma nga Batan-on, misalig kaniya. Si Alma nalipay kaayo nga si Shiblon mituman sa mga sugo sukad sa batan-on pa siya (tan-awa sa Alma 38:2).
Ug si Shiblon nagpadayon sa pagpili sa matarung. Mitabang siya sa uban tungod kay siya naghigugma kanila ug tungod kay siya naghigugma sa Dios. Gibuhat niya unsa ang matarung tungod kay siya nasayud nga kini husto. Wala siya maningkamot aron makaangkon og ganti.
Sa akong misyon sa Korea, nagtrabaho ko kauban sa usa ka misyonaryo kinsa sama ni Shiblon. Matinud-anon ug masulundon siya sa Langitnong Amahan. Apan ang ubang mga misyonaryo wala maghunahuna nga siya usa ka maayo kaayo nga misyonaryo. Gusto ko nga masayud nga sila nasayop mahitungod kaniya! Apan ang akong presidente sa misyon miingon, “ang Langitnong Amahan nasayud nga siya usa ka maayong misyonaryo, ug ako usab. Ug karon ikaw usab nasayud, mao nga kinsa ang mas importante?”
Tingali maghunahuna kita nga lisud kaayo nga mahisama ni Shiblon ug mobuhat unsay matarung tungod kay kini mao ang husto. Apan ang ebanghelyo makatabang kanato! Sa dihang kita gibunyagan, kita magsugod nga mahimong mas maayo nga mga tawo. Kon kita moambit sa sakrament, mobag-o kita sa atong mga pakigsaad. Kita mahimong sama sa gusto sa Langitnong Amahan nga kita mahimo.